HLAZY 44 - Mara Bible RV (BSI)

Baona châta thlahchhâna

Hla chhituhpa châta: Kôrâ sawchapawzy Maskili ao ta sa awpa

¹ Hy Khazohpa, hlâno daihtizy liata, Miah pathlatuhpazy daihti liata na hmotaopazy kha; Miah pathlatuhpazy ta miah chho ei ta, Eima nah ta eima thei haw.

² Nâma ku tlai ta phopizy papuapa ta, Miah pathlatuhpazy cha loh chi ta; Phopizy pasasa chi ta, Miah pathlatuhpazy deikua cha na pabohsa ei.

³ Ama zaozi ta râh he pahnie leipa ei ta, Ama bâh ta pachhana tlôkhei hra veih ei; Ama chô liata nâ lypa vâta, Na ku chachâh lâ nata nâma bâh tlai ta âmo cha pachha chi ta, Na hmia khaihna ta na pachha ei.

⁴ Hy Khazohpa, nâ cha ei Beipa châ chi ta, Zakaw châta pahniena phuah mah y.

⁵ Nâma vâta eima khakhaipazy chati pathlah pi ta, Na moh vâta miah thyuhnaopazy eima tlysao haw.

⁶ Ei libaw he ngâ leipa na ta, Ei zaozi ta na pachha thei hra vei.

⁷ Nâma tlai ta eima khakhaipazy tawhta miah pachha chi ta, Miah a haotuhpazy maophyuhpa ta na paysa ei.

⁸ Keimo la noh y ta Khazohpa a palaikhei pi ta, Na moh chhâzaw ta eima reithai aw. Selah

⁹ Tahmâ deikua cha miah dythapa ta, Eima noh miah pazao ha chi ta, Eima pheisaihzy hnohta adyuhna lâ sie khao va chi.

¹⁰ Eima khakhaipazy tawhta a râpai awpa ta miah tao chi ta, Miah a haotuhpazy ta miah ama hrao haw.

¹¹ Thie awpa mietaku hawhta miah tao chi ta, Phopizy hry liata miah na hiepatla haw.

¹² Na chyhsazy he sôh chyhta ta zuah chi ta, Ama mâ rupa zie ta haw va chi.

¹³ Eima opazy pahneisao awpa ta miah tao chi ta, Eima kiapâh liata a ypazy ta mohnaopa ta, Ama pasipasawh awpa ta miah na tao haw.

¹⁴ Râhzy liata chhiena lâta rei tyh awpa ta miah tao chi ta, Phopizy luh chahuah chie awpa ta miah na tao haw.

¹⁵ Ei nohzaona cha noh y ta ei hmiakô liata y ta, Nozana ta ei hmia a khu khai haw.

¹⁶ Pasipasawhtuhpa nata reipachhietuhpa pyu vâta, Chariahpa nata phuh latuhpa vâta, Cha hawhta a ypa ei châ.

¹⁷ Cha my leipa pi ta, Na biehrai eima parao leipa chhao ta, Cha zydua cha eima chô liata a vaw tlô pyly.

¹⁸ Eima palôh kua leipa ta, Eima pheizy ta na lâpi tleisai beih vei.

¹⁹ Chatanachôta changiezy laihna su liata miah hriechheih chi ta, Thina nohpahli ta miah na khu haw.

²⁰ Eima Khazohpa moh mypa ta, Râh hropa khazoh lâta eima kuzy a pazawhpa eima vaw châ ha khiahta cha,

²¹ Khazohpa ta hmô aw vei ma? Ano cha palôh liata bieru chhao, A pahno theipa châ tlôh ta.

²² Nâma vâta noh y ta thiepa ta y pi ta, Mietaku thie awpa hawhta pachâpa eima châ.

²³ Hy Abeipa, a hra mah y, Khazia nâ mo thlâh haw? Thyu la, Tlyzaw ta miah dytha khah y!

²⁴ Khazia na hmia nyu chi ta, Eima pasataona nata tlybaina zy he na my thlâh ha tly?

²⁵ Eima hrona he dohlei liata a byu ta, Eima py chhaohlei liata â bai.

²⁶ Thyu la, miah bao awpa ta a vy mah y! Na kyhpachâna tleih beih leipa vâta miah chatlai mah y!