HLAZY 42 - Mara Bible RV (BSI)

BU NONA ( Hla 42.1—72.20 ) Khazohpa vâna

Hla chhituhpa châta: Kôrâ sawchapawzy Maskili ao ta sa awpa

¹ Sakhi vahtie ti vâpa ta a pahlapa hawhta, Hy Khazohpa, nâma vâpa ta ei hro a pahla.

² Ei hro he Khazohpa vâpa ta a dâhphi ta, Khazohpa hrohpa vâpa ta a dâh a phi. Khati ta ma sie aw sah la, Khazohpa hmia ei hmô aw tly?

³ Chyhsazy ta noh y ta, “Na Khazohpa cha khataih liata a y haw?” na tah ei ta; Ei mothlihzy he chhô nah zâ ta ei pati a châ bâ.

⁴ Ei hro ei palâhâh nahta, He hmozy he ei thei tyh: Zasâh manôhzy hnohta sie hrapa ta, Khazohpa o lâ a pangaipazy chhihtha tyh ei na ta; Thaphapa ta awh ta alyna bie reina chôta, Kyhchhi a hmâhpazy ei chhihtha tyh ei.

⁵ Hy ei thlahpa, khazia ma a khu chi ta, Khazia ma ei chhôh liata a tymâpa ta na y? Khazohpa hnabeiseih mah y. Ei pachhana cha reithai aw na ta,

⁶ Ei khazohpa cha ei reithai heih aw. Ei thlahpa cha ei chhôh liata a khu thlâh ha ta, Chavâta nâ ei châ thei kaw dia! Zawdâh nata Hâmaw râh tawhta châ thei na ta, Mizari Tlâh tawhta ei châ thei.

⁷ Na tisaozy a aohpa ta, Ti athupa nata ti athupa a awsao ei ta, Na tilyzy nata na tichatlaopazy ta eina vao ei.

⁸ Nohchhô ta Abeipa ta, A kyhpachâna tleih beih leipa cha biepie ta, Zâ ta a hla ta na ypâ ta, Cha cha ei hrona Khazohpa lâta ei thlahchhâna a châ.

⁹ Khazohpa ei lôpanô hnohta, “Khazia eina my ha chi? Khazia chariahpa tlybaina vâta, Mâchhiesapa ta ei khie aw?” tah na ta.

¹⁰ Ei ruzy zaozi ta chhawhpa pasapa hawhta, Ei khakhaipazy ta na taola ei ta; Noh y ta ei hnohta, “Khataih liata ma na Khazohpa cha a y haw?” ama tah.

¹¹ Hy ei thlahpa, khazia a khu chi ta, Khazia ei chhôh liata a tymâpa ta na y? Khazohpa hnabeiseih mah y. Ano cha reithai heih aw na ta, Ei pachhana nata ei Khazohpa cha ei reithai aw.