HLAZY 40 - Mara Bible RV (BSI)

Pachhana vâta reithaina

Hla chhituhpa châta: Dâvi Hla

¹ Abeipa cha hâ hualua na ta, Kei lâta a nah pachôh ta ei awna a thei.

² Leidiana khaohtlô tawhta na thaoh ta, Chiatlao kiapa tawhta na thaopa ta, Ei pheizy lôpanô chô liata soh ta, Ei lâsie a pabohsa.

³ Hla thiehpa ei pakah liata soh ta, Eima Khazohpa reithaina hla cha; Chyhsa hluhpi ta hmôpa ta chi aw ei ta, Abeipa liata ngâna ama pahnieh aw.

⁴ Abeipa a ngâpa chyhsa cha a nohlao na; Ano cha apalaipa lâ a heih leipa ta, Haipa bie lâta a pavia leipa a châ.

⁵ Hy Abeipa, ei Khazohpa, Na hmotao noâhpazy he thata châ ta, Miah na pachânazy he thata a châ kaw dia! Nâma nata pakho tlâh y tlâ veih ei. Chazy cha phuahpa ta ei chhopa chhao ta, Chho khai tiah awpa châ vei.

⁶ Atheihna nata hmohlâpa liata a ly leipa chi ta, Ei nah na pahypa chi ta; Raopa hlâna a hnaw leipa chi ta, Moleina hlâna chhao a hnaw va chi.

⁷ Chatawhcha kei ta, “Moh teh, ei vy ha hih, Châbu chatypa liata ei thâtih ropa châ ta,

⁸ Hy ei Khazohpa, na khopa taona liata a ly na ta, Na ryhpa cha ei palôh liata a y,” tah na ta.

⁹ Pakhypi rônahpa liata pachhana thâtih pha chho na ta, Hy Abeipa, moh tua, Na pahnopa hawhta, Ei hmao he chalihsa va na.

¹⁰ Na pachhana cha ei palôh liata nyu leipa na ta, Na ngâchhihna nata na pachhana tlao ei phuah; Na kyhpachâna tleih beih leipa nata na ngâchhihna chhao, Pakhypi rônahpa liata nyu va na.

¹¹ Hy Abeipa, na zawngiahna hmô awpa na pakhâ leipa la, Na kyhpachâna tleih beih leipa ta na pabohsa sala, Na ngâchhi­hna ta khâ na pabohsa mawh sy!

¹² Paraona rei tiah leipazy ta na chadô ei ta, Ei moleinazy ta eina pha ha ei, Avâ chhao ua ngâh khao va na; Ei luh liata sâ hlâta hluh via ei ta, Ei palôh tha a panao khai haw.

¹³ Hy Abeipa, eina pachha awpa chi cha nâ lynazie châ sala, Hy Abeipa, na bao awpa ta a para mah y!

¹⁴ Ei hrona pahlei a chhuahpazy cha, Nozapa ta y ei sala, Hnabeidypa ta y mawh ei sy! Ei hmahphaona liata a lypazy cha, Nohzaopa ta kua mawh ei sy!

¹⁵ “Khawh, Khawh!” nâ tahtuhpazy cha, Ama maophyuh hapa vâta, Nôpopa ta y mawh ei sy.

¹⁶ Nâ châ tluatuhpa zydua deikua cha, Nâma liata a lypa ta ama thapha sala; Na pachhana a pasôtuhpazy cha, “Abeipa cha rônahpa a châ,” Tah lymâ mawh ei sy!

¹⁷ Kei la dyhchhiepa nata phahlapa châ na ta, Châhrasala Abeipa ta eina pachâ tyh. Hy ei Khazohpa, Nâ cha nâ baotuhpa nata nâ pachhatuhpa châ chi ta, Rie hawh khah y!