HLAZY 38 - Mara Bible RV (BSI)

Abeipa ypâna châta thlahchhâna

Dâvi Hla: Atheithlâhna hla

¹ Hy Abeipa, hiehâhpa ta na ra leipa la, Pathi iapa ta na chhorei khah y!

² Na châtaizy kei liata a chaloh ta, Na ku ta eina nâ chi.

³ Na palôh châ leina vâta, Ei sapa hriiah pathaih leipa ta; Ei moleina vâta, Ei ruzy tlâh vei.

⁴ Ei paraona ta ei luh na vao ta, Phaohri hawhta thata eina vi.

⁵ Ei hruna kyh vâta, Ei hmahzy thupa ta pahnâh ta;

⁶ Nôpopa ta a khu na ta, Noh y ta pachârôhpa ta ei y.

⁷ Ei chai ei zôh thata palo ta, Ei sapa hriiah pathaih vei.

⁸ Thachhâ panaopa ta y na ta, Palôh pasapa ta thata ei hrô.

⁹ Hy Abeipa, ei khopa hmo cha na hmiakô liata y ta, Ei hrôna chhao he nâma tawhta nyupa châ vei.

¹⁰ Ei châh-ao a chalyu ta, Ei tha eina chhâ khâh; Ei mo pavâna chhao, Eina leisai haw.

¹¹ Ei hri ohpa vâta, Ei viasa lôhkhyzy ta nâ hla ei ta, Ei heinawhzy taihta eina chahrih ei.

¹² Ei hrona la a chhuahpazy ta khoheih na chôkhâh ei ta, Na pasasa a chhuahpazy ta raona bie reipa ta, Noh y ta haipa bie tao awpa ama pachâ tyh.

¹³ Châhrasala kei cha nahpâpa hawhta châ na ta, Khâpa hmah thei va na; Reih pathlie thai leipa hawhta y na ta, Ei pakah â va na.

¹⁴ Bie a thei leipa nahpâpa hawhta châ na ta, A pakah liata chhoreina bie a y leipa hawhta ei châ.

¹⁵ Châhrasala Hy Abeipa y, Kei cha nâma châ hâpa châ na ta, Hy Abeipa ei Khazohpa y, Nâ chhy awpa cha nâma na châ.

¹⁶ “Ei phei â chakhao tita, Nâ palai thlu tyhpazy ta, Ama palôh einâ eih awpa ei pasaih khah y,” tah na ta.

¹⁷ Ei chô liata pasana khâ y ta, Pao awpa ta ei mâ haw.

¹⁸ Ei paraona palâhâh na ta, Ei moleina vâta pei ei tah ngaita.

¹⁹ Ei khakhaipazy cha thatlôpa nata pasaiphazy châ ei ta, Âdoleipa ta nâ haotuhpazy ama hluh kaw.

²⁰ Âmo chata phana cha chhiena ta na thô ei ta, Phana ei khohpa vâta eina leih ei.

²¹ Hy Abeipa, na siesai leipa la, Hy ei Khazohpa, nâ hla khah y!

²² Hy ei pachhana Abeipa y, Na bao awpa ta a para mah y!