HLAZY 36 - Mara Bible RV (BSI)Khazohpa kyhpachâna sôhpa Hla chhituhpa châta: Abeipa chakaotuhpa Dâvi Hla 1 Moleina ta moleipa palôh chhôh chaipa liata bie reih ta, Moleipa mohmô liata cha Khazohpa china rai y vei. 2 A paraona hmôpa châ leipa aw ta, Chavâta chyhsa ta nâ hao bao aw veih ei tahpa ta, Anosasyh ta â dôvei. 3 A pakah biezy cha haipa nata dôveina bie sai châ ta, So kawpa nata a phapa ta hmotaopa a bâsai haw. 4 A rakhô liata hmo chhiepa patuapaluapa ta, Hrozie pha leipa liata anosasyh ta a soh ta, Moleina dytha vei. 5 Hy Abeipa, na zawngiahna cha avâ kaw daih ta, Na ngâchhihna ta meihdo taih a kaw tlô. 6 Na siana cha Khazohpa tlâhzy hawhta châ ta, Na ryureina chhao ti a thu ngaitapa hawhta a châ; Hy Abeipa, chyhsapa nata sazy na pabohsa ei. 7 Hy Khazohpa, na kyhpachâna tleih beih leipa cha a sôh kaw dia! Na mathlaw nohdi ry liata chyhsa sawzy amâ chhai tyh. 8 Na o liata ativyna zawhzi ta lôhrâtlôpa ta y ei ta, Nâ lyna chavahzy tawhta do awpazy na pie tyh ei. 9 Nâma liata hrona hnawh y ta, Na khaihna liata khaihna eima hmô. 10 Châ pahnotuhpazy hnohta na kyhpachâna tleih beih leipa paluahsa lymâ la, Palôh dopazy hnohta na siana paluahsa lymâ mah y! 11 Apalaipa phei ta eina siehnao awpa pasaih leipa la, Moleipa ku ta eina papua awpa pasaih khah y. 12 Cha liata hmoparaopazy paopa ta a zawh ei ta, Chati pathlahpa ta y ei ta, Thyu thei khao veih ei. |