HLAZY 34 - Mara Bible RV (BSI)

Abeipa phana reithaina

Dâvi Hla: Abimele hmiakô liata hru pakhei ta, Abimele ta papua ta, a sie ha nota a phipa hla

¹ Abeipa cha khâ reithai aw na ta, Ano reithaina cha ei pakah liata a y ngâ thlâh ha aw.

² Ei hro ta Abeipa a palaikhei ta, Areisipa ta thei sala a ly mawh sy.

³ Abeipa cha na cheihchalokhei u la, A moh palyupalih khoh suh vy!

⁴ Abeipa cha tlua na ta, Nâ chhy ta; Ei china zydua tawhta eina pachha haw.

⁵ Ano a mohtuhpazy cha khaih ei ta, Ama hmia nozapa ta y beih aw vei.

⁶ Dyhchhiepa cha awh ta, Abeipa ta a thei; A nôpona zydua tawhta a pachha.

⁷ Abeipa a chituhpazy cha, A vâlyuhchâpazy ta chadô ei ta; Ama kiapâh liata riehmo paryh ei ta, Âmo cha ama pachha tyh.

⁸ Abeipa phazie he padi u la, moh tua rai u, Ano liata ngâna a pahniehpa chyhsa cha a nohlao na!

⁹ Hy a mopathaihpazy saih u, Abeipa cha chi muh vy; Ano a chituhpazy cha a phahla aw veih ei.

¹⁰ Chakeibarôhneipa lochopazy a phahlapa ta ama nodi ta, Abeipa a tluatuhpazy deikua cha hmo phapa ky aw veih ei.

¹¹ Sawzy saih u, a vy u la, na nathlie teh u, Abeipa china kyh ei cha pachu aw ei.

¹² Nama hry liata ahy rai ta, Hrona tlaichhai sala, Noh hluhpi hro awpa khopa ta, Phana na hmô khoh khiahta cha,

¹³ Moleina tawhta na paleih vaih la, Haipa bie reipa tawhta na hmao vaih mah y.

¹⁴ Moleina a heihsaipa ta hmopha tao la, Adyhna tlua la, a chadai mah y.

¹⁵ Abeipa mo cha mosiapazy lâ a heih ta, Ama awna lâ a nah a pachôh tyh.

¹⁶ Moleina hmo a taotuhpazy cha, Âmo atheithlâhna alei tawhta pahlei awpa ta, Abeipa hmia ta â dyuh tyh ei.

¹⁷ Mosiapazy ta baona hiapa ta ama aw tita, Abeipa ta thei ta, Ama nôpona zydua tawhta a pachha tyh ei.

¹⁸ Abeipa cha palôh keichheihpazy a hnia ta, Thlahpa a ngiapachhipazy a pachha tyh.

¹⁹ Mosiapa cha pasa hluhpi tao ta, Châhrasala cha zydua tawhta Abeipa ta a pachha lymâ.

²⁰ A rupa zydua pabohsa ta, Miakha hmah tlie vei.

²¹ Moleina ta moleipa cha thie aw ta, Mosiapa a haotuhpazy cha thailei pachâsapa ama châ aw.

²² Abeipa ta ano a chakaotuhpazy hrona cha chatlai tyh ta, Ano a chhaituhpazy cha ahy hmah thailei pachâsapa châ aw veih ei.