HLAZY 33 - Mara Bible RV (BSI)Abeipa kyhpachâna tleih beih leipa 1 Hy mosiapazy saih u, Abeipa liata a ly teh u; Adopazy châta la, Reithaina he ama tao awpa tlai na a châ. 2 Tlaipih ta Abeipa cha reithai u la, Totâ ri hrawhpa ta ano lâ hla sa teh u! 3 Ano lâta hla thiehpa sa u la, Thai kawpa ta totâzy tôpa ta, Pyu paro kawpa ta tô teh u. 4 Abeipa bie cha a do ta, A hmotaopa zydua ngâchhihpa ta a tao tyh. 5 Siana nata adona pasô ta, Leilô he Abeipa kyhpachâna tleih beih leipa ta a bie. 6 Abeipa bie ta avâzy khi taopa châ ta, A pakah hu ta avâ liata a ypa zydua khi taopa a châ. 7 Tilaipi tizy su kha ta pahmaoh ta, Ti athupazy cha hmosopakhyna suzy liata a sohpakhy. 8 Leilô zydua ta Abeipa cha chi ei sala, Khizaw chyhsa zydua ta ano cha za mawh ei sy! 9 Bie reih ta, A reipa hawhta vaw y ta; Bie pie ta, A biepiepa cha â ipa ta â duah. 10 Abeipa ta râhzy ryhraona cha hraoleipa ta pachâsa ta, Phopizy achhuahna a parao tyh. 11 Abeipa ryhraona deikua cha chhâzaw ta a duah ta, A palôh achhuahnazy chhao chhâ zydua ta â duah aw. 12 Abeipa a Khazohpa ta a hneipa râh cha, Râh huhiehpa châ ta; A ryuto châta â tlyhpa phopi chhao, Phopi huhiehpa a châ. 13 Abeipa ta avâ tawhta za sai ta, Chyhsa saw zydua za hmô ta; 14 Alei liata a pahrâpa zydua he, A pahrâna su tawhta za moh ta; 15 Ama palôh zydua a taotuhpa chata, Ama hmotaopa zydua a ngia lymâ. 16 Abei cha a pheisaih hluh ngaitapa vâta pachhapa ta y leipa ta, Pasaipha chhao a thatlô ngaitapa vâta pachhapa ta y vei. 17 Arâ cha pachhana châta apahniehna doleipa châ ta, A thatlôna rônahpa ta pachha thei vei. 18 Moh teh u, Abeipa mo cha ano a chituhpazy chô liata khaih ta, A kyhpachâna tleih beih leipa hnabeiseihtuhpazy chô liata a khaih tyh. 19 Chatanachata ama hrona cha thina tawhta pachha aw ta, Chakâh daihti liata a pahro aw ei. 20 Eima hro ta Abeipa cha hâ ta, Ano cha miah baotuhpa nata eima vyhphao a châ. 21 A moh pathaihpa eima ngâpa vâta, Ano liata eima palôh â ly. 22 Hy Abeipa, eima hnabeiseihna na châpa hawhta, Na kyhpachâna tleih beih leipa cha eima chô liata y mawh sy! |