HLAZY 31 - Mara Bible RV (BSI)

Abeipa ku liata apavaosana

Hla chhituhpa châta: Dâvi Hla

¹ Hy Abeipa, nâ châ chhai na ta, Maophyuhpa ta na paysa leipa la, Na siana vâta na pachha mah y!

² Kei lâta na nah pachôh la, Thlai na pachha mah y! Ei chhaipa lôpanô na châpa la, Ei pachhana thokhy thatlôpa na châpa mah y!

³ Ei lôpanô nata ei thokhy châ chi ta, Na moh vâta na chhihtha la, Na cha-ao mah y.

⁴ Ei chhaipa châ chi ta, Sao eina chôkhâhpa tawh ei ta na thaoh mah y.

⁵ Na ku liata ei thlahpa cha pavaosa na ta, Hy Abeipa, Khazoh ngâchhihpa y, Nâ ta eina chatlai ha chi.

⁶ Khazoh nothlah hraoleipa a ngâpazy a hao ei na ta, Kei deikua la Abeipa ei ngâ.

⁷ Ei pasataona hmô chi ta, Ei hro pachârôhna chhao na hmôpa vâta, Na ngâchhihna liata thaphapa ta ei ly aw.

⁸ Ei chariahpa ku liata na hlâ leipa chi ta, Ei pheizy su kawhpa liata na paduasa.

⁹ Hy Abeipa, na ngiachhie mah y, Nôpopa ta ei y hih; Pachârôhna vâta ei mo thachhâ ta, Ei thlahpa nata ei pôhpa chhao a tha a chhâ.

¹⁰ Vâsâhpa ta ei hro hmâh na ta, Ei kôzy ahrôna ta khô ta; Ei paraona vâta ei tha chhâ ta, Ei ruzy pua a hmy khai haw.

¹¹ Ei khakhaipazy vâta mohnaopa vaw châ ha na ta, Ei vaihzy liata mohnaopa ta y pachaipa ta, Ei hmia pahnopazy châta chhao chichhihpa châ bâ na ta, Khiliah liata nâ hmôpazy ta einâ râsai ei.

¹² Athipa hawhta mypa ta y na ta, Beih keipa hawhta ei châ haw.

¹³ Chyhsa hluhpi bieparu thei na ta, Su to chichhihna ta a bie; A paraohpa ta na tei ei ta, Ei hrona la amâ chhuah.

¹⁴ Châhrasala Hy Abeipa, nâma cha ngâ na ta, “Ei Khazohpa na châ,” ei tah.

¹⁵ Ei daihtizy na ku liata y ta, Ei chariahpazy ku tawhta na pachha la, Nâ taolatuhpazy ku tawhta na pachha mah y!

¹⁶ Châ chakaotuhpa chô liata na hmia pakhaihsa la, Na ngâchhihna vâta na pachha mah y!

¹⁷ Hy Abeipa, nâ ei cha pado hih, Maophyuhpa ta na paysa khah y; Moleipazy cha maophyuhpa ta soh la, Sidiapa ta Athihkhih lâ sie mawh ei sy.

¹⁸ Hmao haiphiahpazy reihpathlie thei leipa ta y mawh ei sy; Haiphiahpazy cha apalaina nata mohnaona ta bie ei ta, Mosiapazy a reipachhie tyhpa ama châ.

¹⁹ Chyhsa sawzy mohmô ta, Châ chituhpazy châta phana na pachôpa hluh ngaita ta, Châ chhaituhpazy châta na raihria a hluh ngaita!

²⁰ Chyhsazy teina tawhta amâ boh thei nawpa ta, Âmo cha na yna liata nyu chi ta; Bie ei chahrapazy paleih tawhta amâ boh thei nawpa ta, Na byureih liata na nyu ei.

²¹ Khihpi liata dôhpa ta ei y nota, A ngâchhihna noâhchhihpa ei chô liata a palâsapa vâta, Abeipa cha reithaipa ta y maw sy.

²² Kei hra ta ei rawrôhpa ta, “Na mohmô tawhta chhawh pathlahpa ta ei y haw,” tah na ta; Châhrasala baona hiapa ta ei cha aw tita, Zawngiah awpa ta ei châ hawna ao na thei heih.

²³ Hy a mopathaihpa zydua saih u, Abeipa cha kyhpachâ muh vy! Abeipa ta ngâchhihpa pabohsa ta, Apalaipa deikua cha thata viari a thô tyh.

²⁴ Abeipa a hâtuhpa zydua saih u, Thatlôpa ta y u la, Nama palôh riahphapa ta y mawh sy.