HLAZY 26 - Mara Bible RV (BSI)

Ngâchhihna palâhâhna

Dâvi Hla

¹ Hy Abeipa, ei dona hrokhei na ta, Tleisai leipa ta Abeipa ei ngâ hapa vâta, Thai na pachâsa mah y.

² Hy Abeipa, nâ chupa ta na mohpasia la, Ei pathipalôh nata ei pachâna pasia mah y.

³ Na ngâchhihna ei hmiakô liata y ta, Na biehmeiseihpa liata a hrohpa ei châ.

⁴ Chyhsa doleipazy hnohta a tyuh leipa na ta, Phapakheipazy a pakyh veih ei na.

⁵ Moleipazy pakhypi pasi na ta, Hmoparaopazy hnohta a tyuh aw va na.

⁶ Ei kuzy he seina hnei lei awpa ta a sipa ta, Hy Abeipa, na maisâh chahlô aw na ta;

⁷ Alyna biereina tlâh awhpa ta, Na hmotao noâhpa zydua ei chho aw.

⁸ Hy Abeipa, na yna o tlaichhai kaw na ta, Na rônahna pahrâna su ei tlaichhai ngaita.

⁹ Ei thlahpa he moleipazy hry ta pahleipadia leipa la, Ei hrona he thisaih palo hmâhpa chyhsazy hry ta pahleipadia khah y.

¹⁰ Cha hawhpazy ku liata hmo chhiepa tao achhuahna y ta, Ama ku chachâh lâ panaopapanazy ta a bie.

¹¹ Kei deikua cha, ei dona ta hroh aw na ta, Na chatlai la, na ngiachhie mah y.

¹² Ei phei he su bypa liata a duah ta, Pakhypi rônahpa liata Abeipa cha ei reithai aw.