HLAZY 24 - Mara Bible RV (BSI)

Rônahna Beipa

Dâvi Hla

¹ Alei nata a chhôh liata a ypa zydua he Abeipa eih châ ta, Khizaw nata a chhôh liata a pahrâpa zydua chhao Abeipa eih a châ.

² Alei he tilaipizy chô liata bô ta, Chavahzy chô liata a padua.

³ Ahy ma Abeipa tlâh cha kiah aw ta, A su pathaihpa liata a duah aw?

⁴ Ku pathaihpa nata palôh pathaihpa hneipa ta, Hmo doleipa liata a hro hmâh beih leipa ta, Haipa ta bie â taih beih leipa chyhsa ta, Abeipa tlâh cha kiah aw ta, A su pathaihpa liata â duah aw.

⁵ Cha chyhsa cha Abeipa tawhta byhnâ to aw ta, A pachhana Khazohpa tawhta siana a hmô aw.

⁶ Cha hawhpa chhâ cha Abeipa a tluatuhpa châ ei ta, Zakaw Khazohpa hmia a tluatuhpazy ama châ. Selah

⁷ Rônahna Beipa â vaw ngia thei nawpa ta, Hy thokhy chhikaozy saih u, Nama luh chôzy pasâh la; Hy ochhi hlôpazy saih u, A pasâh muh vy!

⁸ Rônahna Beipa cha ahy e? Ano cha Abeipa thatlôpa nata hmotaotheipa châ ta, Adyuhna liata Abeipa hmotaotheipa a châ.

⁹ Rônahna Beipa â vaw ngia thei nawpa ta, Hy thokhy chhikaozy saih u, Nama luh chôzy pasâh u la, Hy ochhi hlôpazy saih u, A pasâh teh u!

¹⁰ Rônahna Beipa cha ahy maw? Ano cha Pheisaihzy Abeipa châ ta, Rônahna Beipa a châ.