HLAZY 23 - Mara Bible RV (BSI)

Abeipa nâ vaituhpa

Dâvi Hla

¹ Abeipa cha nâ vaituhpa châ ta, A phahla aw va na.

² Si panyupa suzy liata na pabyusa tyh ta, Ti achalihna kiahzy liata einâ chhi tyh.

³ Ei hrona he pahro pathi tyh ta, Ano moh vâta siana lâpizy liata einâ chhi tyh.

⁴ Thina nohpahli saikao sao hraw sah la, Hmophaleipa chi aw va na; Nâ ei hnohta y chi ta, Na sômasi nata chôchahrei ta thlah eina palôh tyh.

⁵ Ei khakhaipazy mohmô ta, Ei hmiakô liata tlâhkhai nâ chhuahdy chi ta, Ei luh he sathaw thu chi ta, Ei nyu chhao a khô pathlah.

⁶ Ei hro chhôh noh zydua ta, Phana nata zawngiahna ta eina zi lymâ tlai aw; Chatanachata Abeipa o liata tlyzaw ta ei pahrâ thlâh ha aw.