HLAZY 22 - Mara Bible RV (BSI)

Pathlua lei awpa ta thlahchhâna

Hla chhituhpa châta: Mydi Sakhih Chanôpa ao ta sa awpa. Dâvi Hla

¹ Ei Khazohpa, ei Khazohpa, khazia eina pathlua chi? Khazia na pachha leipa ta nâ hla chi ta, Ei hrôna biezy thei leipa ta einâ hla chi tly?

² Hy ei Khazohpa, nohchhô ta awh na ta, Châhrasala nâ chhy va chi; Zâ ta chhao awh na ta, Apahâna hmô va na.

³ Chatahrasala nâ cha Pathaihpa châ chi ta, Izarei reithaina liata a hlao tyhpa na châ.

⁴ Miah pathlatuhzy ta cha ngâ ei ta, Cha ngâ ei ta, na pachha ei.

⁵ Cha aw ei ta, pachhapa ta y ei ta, Cha ngâ ei ta, ama hnabeidy vei.

⁶ Kei deikua cha chyhsapa châ leipa na ta, Châkariepa dei châ na ta; Chyhsazy mohnaopa nata pasipasawhpa ei châ.

⁷ Nâ hmôpa maihta na pahneisao ei ta, Ama hmao na pabyuh chiepa ta, Ama luh eina chahuah chie ei.

⁸ “Ano cha Abeipa ngâ tlôh ta, Ano ta pachha sala; Ano liata a ly tlôh ta, Ano ta bao mawh sy,” ama tah.

⁹ Nâ deikua cha chhi tawhta nâ thaohtuhpa châ chi ta, Ei nô sâhpi ei bâh no chhao ta, Nâma ngâ awpa ta nâ taotuhpa na châ.

¹⁰ Ei pi noh tawhta ei pahniena châ chi ta, Ei nô chhi liata ei y no tawhta ei Khazohpa na châ.

¹¹ Nâ hla cheita khah y, Nôpona a vaw hnia ta, Baotuhpa rai y veih ei.

¹² Viahchao tôhpa hluhpi ta na chadô ei ta, Bâsanâ viahchao tôhpa thatlôpazy ta eina dôh ei.

¹³ Chakeibarôhneipa pahâpahaohpa a rôh ngâpa hawhta, Ama pakah kawhpa eina â chie ei.

¹⁴ Ti hawhta leithapa ta y na ta, Ei ruzy â suhlie khai haw; Ei palôh kheilôh hawh châ ta, Ei chachôhna liata a ti khai haw.

¹⁵ Ei thatlôna beihkao hawhta hi karâpa ta, Ei paleih ei dâh lâta a bai ta, Thina dohlei liata eina soh chi.

¹⁶ Izy ta na chadô ei ta, Hmoparaopa pyzy ta na dôhpa ta, Ei kupheizy ama papyu haw.

¹⁷ Ei rupa zydua reih thei na ta, Na moh ei ta eina tawpâ ei.

¹⁸ Ei pohzy a rai ei ta, Ei chysia to awpa ta nuby amâ dao.

¹⁹ Hy Abeipa, nâ deikua cha a hla leipa la, Hy nâ baotuhpa y, na bao awpa ta a vy para mah y!

²⁰ Ei hrona he zaozi tawhta pachha la, Ei hrona sôhpa he i hmotaotheina tawhta pabohsa mah y!

²¹ Chakeibarôhneipa pakah tawhta na pachha la, Chaoliah ahrâhpa ki tawhta na pabohsa mah y!

²² Ei unawhzy hnohta na moh phuah aw na ta, Apakhypazy hry liata ei cha reithai aw.

²³ Abeipa a chipazy saih u, ano cha reithai teh u! Zakaw pathla zydua saih u, ano palyupalih u la, Izarei pathla zydua saih u, ano cha chi teh u!

²⁴ Ano cha pasa a taopa pasataona mohnao leipa ta, Pasi hra vei; A hmia nyusai leipa ta, A aw tita a nathlie tyh.

²⁵ Pakhypi rônahpa liata cha reithai aw na ta, Nâma châ chituhpazy hmiakô liata ei bietai ei patlô aw.

²⁶ Pasataopazy lôhrâtlôpa ta nie aw ei ta, Ano a tluatuhpazy ta Abeipa cha ama reithai aw! Nama palôhzy chhâzaw ta hroh thlâh ha mawh sy!

²⁷ Khizaw kaokih zydua ta a thei aw ei ta, Abeipa lâ amâ heih aw; Râh to liata chi tozy a hmiakô liata amâ bôh aw.

²⁸ Abeina cha Abeipa eih châ ta, Ano cha phopizy chô liata ryureituhpa a châ.

²⁹ Lei hneirôhpa zydua ta kyhchhipa ta ano cha a chhy aw ei ta, Dohlei lâta a zu awpa zydua ta a hmiakô liata amâ bôh aw; Anosasyh â pahro thei leipa chhao ta Abeipa cha â chhy aw.

³⁰ A chipathla ta ano cha chakao aw ta, Chhâ vaw y awpa hnohta Abeipa thâtih chhopa a châ aw.

³¹ A vy aw ei ta, Phopi a pih mâh leipa hnohta A siana thâtih phuah aw ei ta, A patlô haw tahpa ta ama chho aw.