HLAZY 21 - Mara Bible RV (BSI)

Abeipa thatlôna liata alyna

Hla chhituhpa châta: Dâvi Hla

¹ Hy Abeipa, abei cha na thatlôna liata a ly ta, Na pachhana liata a thapha kaw dia!

² A palôh khopa pie chi ta, A hmao ta a hiapa thlyu va chi. Selah

³ Byhnâ hluhpi ta ano cha dy chi ta, A luh liata ngôh suapa lakho na pakho.

⁴ Hrona cha hiah ta, pie chi ta, Chhâzaw nata tlyzaw ta noh pasina na pie.

⁵ Na pachhana liata rônahna hmô ta, Palyupalihna nata abeina ta na tobi.

⁶ Chhâzaw ta byhnâ a to awpa ta tao chi ta, Na ypâna alyna liata thaphapa ta na paysa.

⁷ Abei ta Abeipa cha ngâ ta, Chônôchaipa zawngiahna vâta a chalyu aw vei.

⁸ Na ku ta na chariahpa zydua hmô aw ta, Na ku chachâh lâta na khakhaipazy a patu aw.

⁹ Nâ vaw luah tita âmo cha meihô hawhta tao aw chi ta, Abeipa ta âmo cha a pathi iapa ta palâ khai aw ta, Meisaih ta a kâ patlô khai aw ei.

¹⁰ Ama pathlazy alei tawhta pahleipadia aw chi ta, Ama chizy chyhsa sawzy tawhta na pahleipadia khai aw.

¹¹ Parao châ chhuahpa ta, Na chhie nawpa ta cha tei hra ei sala, Ama hlaotloh aw vei.

¹² Libaw a keipa ta ama hmia mopâ aw chi ta, Nâma tawhta na parâpaisa aw ei.

¹³ Hy Abeipa, na thatlôna liata palyupalihpa ta y aw chi ta, Na hmotaotheina reithaipa ta hla eima sa aw.