HLAZY 20 - Mara Bible RV (BSI)

Pahniena châta thlahchhâna

Hla chhituhpa châta: Dâvi Hla

¹ Nôpona noh liata Abeipa ta châ chhy sala, Zakaw Khazohpa moh ta cha pabohsa mawh sy!

² Su pathaihpa tawhta baona cha vaw tuapa sala, Zaio tawhta tha cha patlô mawh sy!

³ Na hmohlâpazy a thei sala, Na raopa hlâna liata a ly mawh sy!

⁴ Na palôh khopa cha pie sala, Nâ chhuahna zydua hlao cha patloh mawh sy!

⁵ Na pachhana liata a lypa ta awh sih la, Eima Khazohpa moh ta pahniena pohrai chaluahpa ta, Abeipa ta na hiapa zydua hlao cha patloh mawh sy!

⁶ Tahmâ Abeipa ta a sathawthupa a pachha tahpa ei pahno haw; A vâ pathaihpa tawhta a zâ chhy aw ta, A ku chachâh lâta pachhana thatlôna ta a zâ chhy aw.

⁷ Thokha ta talailihzy ngâ ei ta, Ahropazy ta arâzy ama ngâ; Keimo deikua cha Abeipa eima Khazohpa moh eima ngâ.

⁸ Âmo cha a hluah ei ta ama pao, Keimo deikua cha thyu pi ta â ipa ta eima duah.

⁹ Hy Abeipa, abei he pachha la, Eima cha aw tita miah a chhy mah y.