HLAZY 19 - Mara Bible RV (BSI)

Abeipa ryhpa phapakina

Hla chhituhpa châta: Dâvi Hla

¹ Avâzy khita Khazohpa rônahna phuah ei ta, Vâruapa khita a kuzôthaina a palâsa.

² Noh chareih ta bie reih ei ta, Zâ chareih ta pahnona ama phuah.

³ Reih pathlie leipa ei ta, Bie reih hra leipa ei ta, Ama ao chhao thei awpa y vei.

⁴ Chatahrasala ama ao ta leilô zydua chahryh ta, Ama biezy khizaw kaokih taihta a pathâh. Noh châta avâzy liata poh o parai ta,

⁵ Noh cha a chhôhpadâhpa tawhta a vaw puapa myuhneituhpa lyu ta, Chyhsa thatlôpa ta arâpasuana liata a ly kawpa ta â râpa a lyu.

⁶ Avâ chhâna tawhta vaw chhi ta, Avâ chhâna liata tla ta, A lalôhna a nyusai theipa y veih ei.

⁷ Abeipa ryhpa cha phapaki ta, Hro a taopathi; Abeipa bieraopa cha ngâ a chhih ta, Ahrupa a pasosa.

⁸ Abeipa pachuna cha a do ta, Palôh a palysa; Abeipa biepiepa cha khaih ta, Mo a pavâsa.

⁹ Abeipa china cha pathaih ta, Chhâzaw châta â daih; Abeipa ryureina cha hmeiseih ta, A sia paki.

¹⁰ Chazy cha ngôh hlâta kho a chhih via ei ta, Ngôh suapa hlâta ama sôh via; Kheihti hlâta thlôh via ei ta, Kheihthlawh hlâta ama thlôh via.

¹¹ Chazy chata châ chakaotuhpa he zikyu nâ râ chi ta, Chazy a zyhpa cha lymâ rônahpa a dao aw.

¹² Ahy ma ano taochheipazy a pahno thei tly? Ei pahno leipa paraonazy nâ ngiahthai mah y.

¹³ Molei raruahpazy tawhta châ chakaotuhpa he pabohsa la, Ei chô liata bie ama hnei awpa pasaih khah y! Chatanachata phapakipa châ aw na ta, Moleina rarôh ypa tawhta thaichâpa ta ei y aw.

¹⁴ Hy Abeipa, ei lôpanô nata nâ chatlaituhpa y, Ei pakah tawhta bie a puapa nata ei palôh liata pachâna a ypazy he, Na mohmô liata a pyh tlâh châ mawh sy.