HLAZY 18 - Mara Bible RV (BSI)

Dâvi pachhana hla

Hla chhituhpa châta: Abeipa chakaotuhpa Dâvi Hla. A chariahpazy ku tawhta nata Sawla ku tawhta Abeipa ta a pachha noh ta Abeipa lâta hla a sapa a châ. He hawhta a sa:

¹ Hy Abeipa, ei thatlôna, Kyh ei cha pachâ kaw dia!

² Abeipa cha ei lôpanô, ei thokhy nata nâ pachhatuhpa châ ta, Ano cha ei Khazohpa, ei chhaipa lôpanô châ ta, Ei vyhphao, ei pachhana ki nata ei diahsua a châ.

³ Reithai tlâh Abeipa cha pado na ta, Ei chariahpazy tawhta pachhapa ta ei y.

⁴ Thina chaorizy ta na chazeipa ta, Raona tily ta na phaoh ta,

⁵ Athihkhih chaorizy ta na chahry ta, Thina khoheihzy ta eina chadô.

⁶ Nôpopa ta Abeipa cha pado na ta, Na bao awpa ta ei Khazohpa ei aw. Achhyna o tawhta ei ao thei ta, Ei awna ao a nah liata â ngia.

⁷ Alei he a chathopa ta a chalyu ta, A hie a hâhpa vâta, Tlâhpizy abôna chhao a chachhao ta â sih.

⁸ A hnapasu tawhta meikhuh puapa ta, A pakah tawhta meipaleih pua ta, Ano tawhta meiia a vaw pua.

⁹ Avâzy pahnaipa ta za chô ta, A phei ry liata zoh kaluhna a y.

¹⁰ Cherubi chô liata kiapa ta a zaw ta, Thlih mathlawzy kiahpa ta a vaw tlô.

¹¹ Zohna cha ano chhiehruh awpa ta tao ta, A chheipâh zydua khu awpa ta taopa ta, Vâ meihdo zohpazy a tao.

¹² A hmiakô liata khaihna tawhta, Pachie nata pareih vaw tla ta, A meihdozy a vaw chhô pahlie.

¹³ Abeipa cha avâzy tawhta a vaw thua ta, Chônôchaipa ta a ao papua ta, Pachie nata pareih thata a tla.

¹⁴ A châtaizy kapa ta âmo cha papai ta, Dôhlazy chakeihsa ta â chadaipai ha ei.

¹⁵ Hy Abeipa, na rana vâta, Na hnapasu tawhta hu a puapa ta, Tilaipi chaozy hmô theipa châ ta, Khizaw abônazy â lâ khai.

¹⁶ Chô lâ tawhta za pazapa ta na patu ta, Tisaih tawhta einâ daophi.

¹⁷ Ei chariah thatlôpa tawhta na pachha ta, Nâ haotuhpazy tawhta eina pachha, Ei châta ama tha a tlô tupa vâta.

¹⁸ Vâchhiena ei tyh noh ta na tei lao ei ta, Châhrasala Abeipa cha nâ baotuhpa a châ.

¹⁹ Ei chô liata â lypa vâta, Na pachha ta, Su kawhpa lâ einâ chhi haw.

²⁰ Ei sianazie hawhta Abeipa ta ei chô liata tao ta, Ei ku pathaihnazie hawhta lymâ eina pie.

²¹ Abeipa lâpizy a chhih na ta, Ei Khazohpa a heihsaipa ta moleina hmo tao beih va na.

²² A ryureina zydua ei hmiakô liata y ta, A bieraopazy kei tawhta thy va na.

²³ A hmiakô liata seina hnei leipa na ta, Thaileichâna tawhta keimasasyh ta ei pabohsa.

²⁴ Chavâta Abeipa ta ei sianazie hawhta lymâ na pie ta, A mohmô liata ei ku pathaihnazie hawhta lymâ eina pie.

²⁵ Zawngiah theipa hnohta zawngiahna palâsa chi ta, Seina hnei leipa hnohta seina hnei leipa na châna na palâsa.

²⁶ Pathaihpa hnohta na pathaihna palâsa chi ta, Piehpiepa cha a piehpiena hawhta na hrie tyh.

²⁷ Areisipa pachha chi ta, Akhotlâhpa na panawh tyh.

²⁸ Nâ ta ei meiôh pakhaih chi ta, Abeipa ei Khazohpa ta ei zohna a pakhaihsa tyh.

²⁹ Na baona ta pheisaihzy chanaoh na ta, Ei Khazohpa baona ta thokhy chhao ei zawpakhô.

³⁰ He Khazohpa lâpi cha phapaki ta, Abeipa bie cha â dozie pasia hapa châ ta, Ano cha a chhaituhpa zydua châta vyhphao a châ.

³¹ Abeipa dei leipa ta ahy ma Khazohpa a y? Eima Khazohpa dei leipa ta ahy ma lôpanô a y?

³² Khazohpa cha thatlôna ta chai nâ saihtuhpa châ ta, Ei lâpi phapakipa ta a taotuhpa a châ.

³³ Ei pheizy sakhih phei hawhta tao ta, Su sâhpazy liata â bohpa ta eina paysa.

³⁴ Ei kuzy he adyuhna châta pachu ta, Ei bâhzy ta dawh libaw â kei thei.

³⁵ Na pachhana vyhphao na pie chi ta, Na ku chachâh lâta na cha-ao chi ta, Na nôphana ta eina parônahsa chi.

³⁶ Ei phei chakâna su pakawh chi ta, Ei pheizy a chakhao beih vei.

³⁷ Ei chariahzy a chadai ei na ta, Ei pha lymâ ei; Pahleipadiapa ama châ khai hlâlei cha, A lie va na.

³⁸ Chhawh pathlah ei na ta, Thyu thei khao veih ei, Ei phei ry liata ama pao haw.

³⁹ Adyuhna châta thatlôna ta ei chai na saih chi ta, Nâ thyuhnaopazy ei ry liata na pazawh ei.

⁴⁰ Ei chariahpazy kei tawhta parâpaisa chi ta, Nâ haotuhpazy ei pahleipadia ha ei.

⁴¹ Baona hiapa ta awh ei ta, Châhrasala a pachha awpa y veih ei; Abeipa aw ei ta, Châhrasala âmo a chhy vei.

⁴² Thlih ta a phao pahaipa dohlei hawhta phy padi ei na ta, Khiliah chiatlao hawhta ei thiah ha ei.

⁴³ Phopizy nata atuna tawhta na pachhapa ta, Râhzy chhituhpa ta na tao chi ta, Ei pahno beih leipa phopi ta eina chakao.

⁴⁴ Ei bie ama theipa nahta ei rei a ngiah ei ta, Chihropazy ta ei ry amâ vaw daoh.

⁴⁵ Chihropazy ama palôh chhâ ta, Chalyuna chôta ama thokhyzy tawhta ama vaw pua.

⁴⁶ Abeipa cha hroh ta, Ei lôpanô cha reithaipa ta y sala, Ei pachhana Khazohpa cha palyupalihpa ta y mawh sy.

⁴⁷ Ano cha phuh nâ lapatuhpa Khazohpa châ ta, Phopizy ei ry liata a panawhtuhpa a châ.

⁴⁸ Ei chariahzy tawhta nâ pachhatuhpa châ chi ta, A châ na, nâ thyuhnaopazy chô lâta na cheihchalopa ta, Thachahra a hmâhpa chyhsa tawhta eina pachha ha chi.

⁴⁹ Cha vâna chata Hy Abeipa, Phopizy hry liata cha reithai aw na ta, Na moh reithaina hla ei sa aw.

⁵⁰ Abeipa cha ano paduapa bei hnohta pachhana rônahpa pie ta, A sathawthupa Dâvi nata a pathlazy chô liata, Zawngiahna chhâzaw ta a palâsa.