HLAZY 16 - Mara Bible RV (BSI)

Ryuto phapa

Dâvi chaphôhtuna: Mikatâ ao ta sa awpa

¹ Hy Khazohpa, na pabohsa mah y, Nâma châ chhaipa ei châ hih.

² Abeipa hnohta, “Ei Zibeipa châ chi ta, Nâma leipa ta la phana rai hnei va na,” ei tah tyh.

³ Alei liata mopathaihpazy he, Chyhsa pha patluapazy châ ei ta, Âmo cha ei lyna chaipa ama châ tyh.

⁴ Khazoh hropa a pazipazy cha ama vâsâhna a pôh aw; Dopa hlâna thisaih ama hlâpazy patlai leipa aw na ta, Ei hmao ta ama moh pado hra aw vei.

⁵ Abeipa, nâ cha ei vyuh nata ei nyu châ chi ta, Ei tovyuh na pabohsa tyh.

⁶ Su khochhihpazy liata ei râhri na pakhâhpa chi ta, Ryu ngia ngaitapa eina patosa chi.

⁷ Ryh nâ raopatuhpa Abeipa cha ei reithai aw, Zâ ta chhao ei palôh ta eina pachu tyh.

⁸ Abeipa cha khâ hmia pasah na ta, Ei ku chachâh lâta a ypa vâta, A chalyu aw va na.

⁹ Chavâta ei palôh thapha ta, Ei hro â ly ngaita; Ei pôhpa chhao â bohpa ta a y aw.

¹⁰ Athihkhih liata ei thlahpa siesai leipa aw chi ta, Na Mo Pathaihpa thuzao awpa pasaih aw va chi.

¹¹ Hrona lâpi na pahmôsa chi ta, Na yna liata lyna kipa y ta, Na ku chachâh lâta tlyzaw thaphana a y.