HLAZY 144 - Mara Bible RV (BSI)

Ei lôpanô nata ei thokhy

Dâvi Hla

¹ Abeipa, ei lôpanô cha reithaipa ta y mawh sy, Ano ta ei kuzy he hrâsiezie pachu ta, Ei ku parozy he a dyuhzie a pachu.

² Ano cha ei châta ngâchhihpa nata ei thokhy châ ta, Ei diahsua nata nâ pachhatuhpa a châ; Ei vyhphao nata ei chhaina châ ta, Phopizy ei ry liata panawhtuhpa a châ.

³ Hy Abeipa, chyhsapa he khâpa ma châ ta, Na pahno tyh tly? Chyhsa sawchapawpa chhao he khâpa ma châ ta, Na pachâ tyh tly?

⁴ Chyhsapa cha hu ei kha sopa hawh dei châ ta, A hro chhôh nohzy cha nohpahli a lei tyhpa hawh dei a châ.

⁵ Hy Abeipa, avâzy za pahnai la, Za chô mah y! Tlâhpizy hria la, Meikhuh pua mawh sy!

⁶ Dôhla pathliesa la, Na chariahpazy hiepatla mah y; Na châtaizy ka la, Âmo cha patypamâ mah y!

⁷ Chô lâ tawhta na ku za paza la, Na pachha la, ti laipa tawhta na thaoh la, Chihropazy ku tawhta na pachha mah y.

⁸ Ama pakah ta haipa bie a reih tyhpazy châ ei ta, Ama ku chachâh lâ cha adoleina ku a châ.

⁹ Hy Khazohpa, hla thiehpa cha sapa aw na ta, Tlaipih ri hrawhpa tôpa ta ei cha reithai aw.

¹⁰ Nâ cha beizy pahniena a pietuhpa châ chi ta, Zaozi thatlôpa tawhta châ chakaotuhpa Dâvi a pachhatuhpa na châ.

¹¹ Ama pakah ta haipa bie a reih tyhpa, Chihropazy ku tawhta na pachhapa ta na pabohsa la; Ama ku chachâh lâ adoleina ku a châpazy tawhta, Na pachhapa ta na pabohsa mah y.

¹² Eima sawchapawzy thyutlia lochona daihti cha, Chichei daw phapa hawhta châ ei sala; Eima sawchanôzy thyutlia lochona daihti chhao, Abei o liata otôh khiepazy hawhta châ mawh ei sy.

¹³ Eima sawvâzy cha, Kôvei chi to ta bie ei sala, Eima mietakuzy chhao, Lyuzy liata thysâh hluhpi pataw mawh ei sy.

¹⁴ Eima viahchaozy vô lymâ ei sala, Hrih leipa ta pataw lymâ mawh ei sy. Eima lâlaizy liata, Chana nata pachârôhna zy y khah sy!

¹⁵ Cha hawhpa byhnâ ta vaoheipazy cha ama hu â hieh na! Abeipa ama Khazohpa ta a hneipazy cha ama hu â hieh na!