HLAZY 143 - Mara Bible RV (BSI)

Ei thlahpa ta Abeipa a vâ

Dâvi Hla

¹ Hy Abeipa, ei thlahchhâna he thei la, Ngiachhie ei châ hawna lâ he na nah vaw pachôh mah y! Na ngâchhihna vâta na chyhei la, Na siana vâta na chyhei mah y!

² Na hmiakô liata la, Ahrohpazy hry liata mosiapa ama y leipa vâta, Châ chakaotuhpa he pachiana liata a ngiakhei khah y.

³ Chariahpa ta ei thlahpa a chadai ta, Ei hrona he alei liata taichheih ta; Ama thi tawhta bohpi a châ hapazy hawhta, Zohna liata eina pahrâsa haw.

⁴ Chavâta ei thlahpa kei liata panao ta, Ei palôh kei liata ngiarohna ta a bie.

⁵ Hnôhlâ daihtizy a kaw theipa ta, Na hmotaopa zydua saipalie na ta, Na ku raihriazy ei rohpady tyh.

⁶ Ei kuzy nâ lâta pazawh tyh na ta, Ei thlahpa cha nâma vâpa ta alei hipa hawhta a dâh a phi tyh. Selah

⁷ Hy Abeipa, thlai na chyhei mah y! Ei thlahpa a panao ha hih! Na hmia na nyusai khah y, Chataleipatala khaohtlô lâ a zupazy hawhta ei y pathlei aw na.

⁸ Nâ ei cha ngâpa vâta, Na kyhpachâna tleih beih leipa kyh cha, My ta na patheisa tyh mah y. Nâ lâta ei thlahpa a chaluahpa ei châpa vâta, Ei sie nawpa lâpi na pahnosa tyh mah y.

⁹ Hy Abeipa, ei chariahpazy tawhta na pachha mah y, Châ chhai awpa ta nâ lâ ei vaw râ hih!

¹⁰ Ei Khazohpa na châpa vâta, Na khopa tao awpa ta na pachu mah y! Na Thlahpa phapa ta, Lâpi patlâpa liata nâ chhi mawh sy!

¹¹ Hy Abeipa, na moh vâta, Ei hrona he pabohsa la; Na siana vâta ei thlahpa he, Nôpona tawhta papua mah y!

¹² Ei chô liata na kyhpachâna tleih beih leipa vâta, Ei chariahpazy chhawh pathlah khai la; Ei khakhaipa zydua pahleipadia khai mah y; Châ chakaotuhpa ei châ hih!