HLAZY 141 - Mara Bible RV (BSI)

Abeipa ao nathliena

Dâvi Hla

¹ Hy Abeipa, ei cha pado hih, Kei lâ a vy patoh la; Ei cha pado tita, Ei ao lâ na nah vaw pachôh mah y!

² Ei thlahchhâna he, Ropahâhpa hawhta na hmiakô liata châ sala; Ei ku chaluahpa he, Zâlâ atheihna hawhta châ mawh sy!

³ Hy Abeipa, ei pakah vaituhpa soh la, Ei hmao ochhi he vaih mah y!

⁴ Ei palôh he kheihawhpa moleina lâ hmahta paheisa leipa la, Moleina hmo taopa liata na patlaihsa khah y; Moleina a taopa chyhsazy hnohta, Ama pati pahâhpa nie awpa na pasaih khah y!

⁵ Mosiapa ta cha na tu mawh sy, Cha cha eina khokheipa vâta a châ; Na chhorei mawh sy, Ei luh châta sathaw châ ta, Ei luh ta dytha khah sy. Chatanachôta hmo moleipa ama taopazy a dyuh na ta, Thlah ei chhâ lymâ.

⁶ Ama ryureituhpazy lôkâhpa tawhta thy pathlahpa ama châ tita, Ei bie thlôhpazy ama thei aw.

⁷ Chyhsa ta alei palie ta alei a pazaopa hawhta, Eima ruzy Athihkhih pakah liata hiepatlapa ta a y aw.

⁸ Hy Abeipa, ei Beipa, Ei mozy heta nâma lâ moh ta, Nâma ei châ chhai tyh; Hro chichhihpa ta na siesai khah y!

⁹ Khoheih eina chôkhâhpa tawh ei ta na pabohsa la, Hmoparaopazy khoheih tawhta na pabohsa mah y!

¹⁰ Kei ta â bohpa ta ei siepakhô hai nota, Hmoparaopazy cha âmo saozy liata a ao mawh ei sy.