HLAZY 139 - Mara Bible RV (BSI)

Palôh pahnotuh Khazohpa reithaina

Hla chhituhpa châta: Dâvi Hla

¹ Hy Abeipa, liahsa ta na moh chi ta, Eina pahno chi!

² Ei tyupa nata ei duapa pahno chi ta, Ei pachânazy chhao lâhlapi tawhta na pahno.

³ Ei siepa nata ei môpa zy liahsa na moh chi ta, Ei hrozie zydua na pahno khai.

⁴ Hy Abeipa, ei paleih liata bie a y hlâ chhao ta, Na pahno chhielie khai tyh.

⁵ Ei hmia ei hnoh ta na chadô chi ta, Ei chô liata na ku na pahnieh.

⁶ Cha tlu ta pahnona cha, Kei châta noâhchhihpa châ ta; A sâh tu ha ta, Ei pahnona ta a pha khao vei.

⁷ Na thlahpa tawhta khataih lâ ei sie aw? Na mohmô tawhta khataih lâ ei râ aw?

⁸ Avâ lâ kiah aw sah la, Cha liata y tlôh chi! Athihkhih liata ei rakhô dao aw sah la, Cha liata y tlôh chi!

⁹ My khihdei mathlaw ta a zawpa ta, Notla tilaipi chhâna liata pahrâ aw sah la;

¹⁰ Cha liana chhao cha na ku ta nâ chhi aw ta, Na ku chachâh lâta eina patu aw.

¹¹ “Zohna ta na khu khai aw ta, Ei kiapâh liata khaihna chhao he zâ a vaw châ aw,” tah aw sah la,

¹² Zohna chhao ta nâma hmia liata cha, Khâpa hmah pahli thei tlôh va; Zâ chhao noh hawhta khaih ta, Na châta la zohna chhao khaihna hawhta a châ.

¹³ Ei pathipalôh zydua he nâ ta tao chi ta, Ei nô chhi liata nâ paduatuhpa na châ.

¹⁴ Chichhihpa ta taopa châ na ta, Noâchhihpa ta taopa ei châpa vâta, Ei cha reithai. Na hmotaopazy cha noâh a chhih ngaita ei ta, Cha cha ei hro ta a pahno pasia.

¹⁵ Arulâta taopa ei châ no khata, Alei su ry chaipa liata â ngia ngaitapa ta taopa châ na ta, Ei rureihpa he nâ tawhta nyupa châ vei.

¹⁶ Ei pôhpa pachiahpa a ki mâh leipazy na mo ta hmô ta, Cha cha na châbu liata ropa a châ; A zydua ta na tao paki hlâlei cha, A daihtita ta na paki lymâ ei.

¹⁷ Hy Khazohpa, na pachânazy kei châta sôh ngaita ta, Na pachâna pahlyhpakhypa cha a kawh ngaita dia!

¹⁸ Reih aw sah la, Sadi hlâta hluh via ei ta; A vaw hra na ta, Na hnohta ei y thlâh ha chy.

¹⁹ Hy Khazohpa, hmoparaopazy cha, Thie ha la ei tah kaw dia! Nâmo, thisaih palo a khohpa saih u, Na siesai teh u.

²⁰ Hy Khazohpa, haipa ta cha reipachhie ei ta, Na chariahpazy ta hraoleipa ta na moh ama reih hih.

²¹ Hy Abeipa, nâma châ haotuhpazy cha a hao ei na ta, Nâma cha thyuhnaotuhpazy ei pasi ngaita ei.

²² Âmo cha a hao chhâna ta a hao ei na ta, Ei chariahpazy ta ei pachâ ei.

²³ Hy Khazohpa, na moh pasia la, Ei palôh pahno mah y! Na pasia la, Ei pachânazy pahno mah y!

²⁴ Keima liata moleina hro a y ma moh la, Tlyzaw lâpi liata nâ chhi mah y!