HLAZY 138 - Mara Bible RV (BSI)

Alyna biereina hla

Dâvi Hla

¹ Hy Abeipa, ei palôh tlokhuh ta alyna bie cha hlâ aw na ta, Khazohzy hmiakô liata nâma reithaina hla ei sa aw.

² Nâma Achhyna o pathaihpa lâ a heipa ta a bôh na ta, Na zawngiahna nata ngâchhihna vâta, Na moh reithai aw na ta; Hmo to zydua hlâta na moh nata na bie na cheihchalo viapa vâta, Na moh ei reithai aw.

³ Ei cha pado noh ta, Nâ chhy chi ta, Ei hro tha na patlô tyh.

⁴ Hy Abeipa, na pakah biezy ama thei hapa vâta, Lei bei zydua ta alyna bie ama cha hlâ aw.

⁵ Abeipa abeina cha a rônah ngaitapa vâta, Abeipa lâpizy reithaina hla ama sa aw.

⁶ Abeipa cha chônôchaipa a châ tarawpa ta, Chyhsa nawhpazy pachâ ta; Akhotlâhpazy deikua cha, Â hlapi tawhta a pahno ei.

⁷ Nôpona hry liata ei chareipa chhao ta, Ei hrona pahlôh chi ta; Ei chariahpazy hiehâhna lâ na ku pazawhpa ta, Na ku chachâh lâta eina pachha tyh chi.

⁸ Abeipa ta ei châta â chhuahpa cha a patlô aw; Hy Abeipa, na kyhpachâna cha tlyzaw châta châ ta, Nâma ku tlai ta na taopazy he a heihsai khah y.