HLAZY 129 - Mara Bible RV (BSI)

Zaio khakhaipazy pahnie nawpa ta thlahchhâna

 sâh lâ kiana hla

¹ Tahmâ cha Izarei ta, “Ei thyutlia no tawhta ei hluhpi na pasasa ei ta,

² A châ na, ei thyutlia no tawhta ei hluhpi na pasasa ei ta, Châhrasala na pahnie veih ei.

³ Leipalietuhpazy ta ei ky liata lei palie ei ta, Lei pathuana tlâh seihpa ama tao,” tah mawh sy!

⁴ Abeipa cha asiapa châ ta, Hmoparaopazy chaori a â pachhôtuhpa a châ.

⁵ Zaio a haotuhpa zydua cha, Maophyuhpa ta y ei sala, Hnôh pasysapa châ mawh ei sy!

⁶ A seih hlâta a uah ha tyhpa, Vâphuh liata sibiepa hawhta châ mawh ei sy.

⁷ Cha sibiepa cha sâh taituhpa ta a ku biena taihta chahu beih leipa ta, Sapiah chahrytuhpa ta a bâh biena taihta chahry beih hra vei.

⁸ Cha su a chapiapazy ta, “Abeipa byhnâ nama chô liata y mawh sy! Abeipa moh ta byhnâ eima cha awpa!” Tah beih hra veih ei.