HLAZY 12 - Mara Bible RV (BSI)

Ngâchhihpazy ama lei

Hla chhituhpa châta: Semini ao ta sa awpa. Dâvi Hla

¹ Hy Abeipa, na bao mah y, Khazohpa a pachâpazy y khao leipa ei ta, Ngâchhihpazy cha chyhsa sawzy hry tawhta ama lei ha hih.

² Chyhsa to ta ama vaihzy hnohta haipa bie reih ei ta, Reithai pakheina hmao ta reithaipa ta, Haidihaiduahna palôh ta bie ama reih tyh.

³ Abeipa ta hmiahmôchâna hmaozy chhawh pathlah sala, Apalaina paleih chhao chhawh pathlah sala,

⁴ “Eima paleih ta pahnie aw pi ta, Eima hmaozy keimo liata y ta, Eima zibeipa cha ahy ma a châ tly?” A tahtuhpazy chhao, Abeipa ta chhawh pathlah mawh sy.

⁵ “Dyhchhiepazy hraopa châ ei ta, Phahlapazy amâ hrôpa vâta, Tahmâ thyu aw na ta, Âmo a teituhpazy tawhta ei pabohsa aw ei,” Abeipa ta a tah.

⁶ Abeipa biezy cha bie pathaihpa châ ta, Alei liata patina meihô liata tâkâ a thlipasohpa hawhta, Ei sari a thlipasohpa a châ.

⁷ Hy Abeipa, âmo cha pabohsa la, He chhâ tawhtapa he chhâzaw ta vaih mah y.

⁸ Su to liata moleipazy chitlaih ei ta, Chyhsa sawzy hry liata piehpiepazy cheihchalopa ta ama y.