HLAZY 119 - Mara Bible RV (BSI)

Abeipa Ryhpa phazie reithaina א (Aleph)

¹ Hrozie phapakipa chyhsazy cha nohlao ei ta, Abeipa ryhpa a chhihtuhpazy cha ama nohlao na!

² A bieraopazy a zyhtuhpazy cha nohlao ei ta, Pathipalôh tlokhuh ta ano a tluapazy cha ama nohlao na.

³ Âmo cha hmo doleipa tao leipa ei ta, A lâpizy amâ chhih lymâ!

⁴ Na pachuna biezy papua chi ta, A phapa ta zyh awpa ta bie na pie.

⁵ Na bieraopazy zyh awpa ta, Ei hroziezy a i sala ei tah kaw dia!

⁶ Chatanachata na biepiepa zydua zyh aw na ta, Maophyuhpa ta y aw va na.

⁷ Na ryhpa siazie a chu aw na ta, Palôh dopa phaopa ta ei cha reithai aw.

⁸ Na bieraopazy ei zyh lymâ aw; Na siesai cheita khah y!

ב (Beth)

⁹ Thyutliapa ta kheihta a hro a pathaihsa thei aw? Na bie hawhta a hro a vaih khiahta cha, A hro a pathaihsa thei aw.

¹⁰ Ei palôh zydua ta cha tlua na ta, Na biepiepazy tleisai awpa na pasaih khah y!

¹¹ Na bie ei palôh liata a vao na ta, Chavâta na chô liata molei khao aw va na.

¹² Hy reithai tlâh Abeipa, Na bieraopazy na pachu mah y.

¹³ Na pakah ta na phuahpa ryhpa bie zydua, Ei hmao ta ei phuah lymâ aw.

¹⁴ Na bieraopazy ta na palysa ta, Hneirôna zydua liata a lypa hawhta ei ly tyh.

¹⁵ Na pachuna biezy pachâ tyh aw na ta, Na lâpizy ei chhih lymâ aw.

¹⁶ Na bieraopazy liata a ly aw na ta, Na bie my aw va na.

ג (Gimel)

¹⁷ Na bie zyhpa ta ei hroh thei nawpa ta, Châ chakaotuhpa chô liata a phapa ta tao mah y.

¹⁸ Na ryhpa bie pha ngaitapazy ei hmô pasia thei nawpa ta, Ei mozy pavâsa mah y.

¹⁹ Alei liana he khitlyhpa deita châ na ta, Na biepiepazy na nyu khâh khah y!

²⁰ Na pachiana dopazy ngiabâhpa ta, Ei thlahpa ta khâ a cha vâ tyh.

²¹ Apalaipazy ra chi ta, Na biepiepazy a paviasaipa cha, Chhiesapa ta ama y tyh.

²² Na bieraopazy a zyhtuhpa châ na ta, Pasipasawhna nata mohnaona zy Kei tawhta na lapa ha mah y.

²³ Ryureituhpazy a tyuhpakhypa ta, Keima teina bie pachia hra ei sala, Châ chakaotuhpa heta la, Na bieraopazy ei pachâ lymâ aw.

²⁴ Na bieraopazy cha ei lyna châ ta, Ryh nâ raokheituhpazy ama châ.

ד (Daleth)

²⁵ Ei hro he dohlei liata khâchâ a bai ha ta, Na bie hawhta na pahro heih mah y!

²⁶ Ei lâpizy cha chho na ta, Eina chyhei ha chi; Na bieraopazy na pachu mah y!

²⁷ Na pachunazy pahno thai awpa ta na bao la, Na hmotao noâhpa kyhzy ei pachâ tyh aw.

²⁸ Pachârôhna vâta ei hro thachhâ ngaita ta, Na bie hawhta tha na patlô heih mah y!

²⁹ Kei tawhta hrozie do leipa pasie la, Zawh nâ ngiah la, Na ryhpa bie na pachu mah y!

³⁰ Ngâchhihna hro a tlyh ha na ta, Na ryhpazy ei vao thlâh haw.

³¹ Hy Abeipa, na bieraopazy khâchâ a patu na ta, Maophyuhpa ta na paysa khah y!

³² Ei palôh na pahy kawh tita, Na biepiepazy lâpi a chhipa ta ei râ aw.

ה (He)

³³ Hy Abeipa, na bieraopazy lâpi na pachu la, Achhâna taihta ei chhih aw.

³⁴ Novâhna na pie mah y; Chatanachata na ryhpa zyh aw na ta, Ei palôh tlokhuh ta ei zyh aw.

³⁵ Na biepiepapazy lâpi liata nâ chhi mah y, Cha cha ei lyna châ tlôh ta.

³⁶ Ei palôh he keimasasyh athôhna lâta paheisa leipa la, Na biepiepazy lâta tlao paheisa mah y.

³⁷ Ei mo he hraoleipa hmozy mona tawhta paheisaisa la, Na lâpizy achhihna liata hrona na pie mah y.

³⁸ Chipa ta na y thei nawpa ta, Châ chakaotuhpa hnohta na bietai patlô mah y.

³⁹ Na ryhpazy cha pha tlôh ta, Reipachhiena ei chi kawpa he na pahleipa mah y.

⁴⁰ Na pachunazy ei vâ ngaita; Na siana vâta na pahro heih mah y!

ו (Waw)

⁴¹ Hy Abeipa, na kyhpachâna tleih beih leipa cha kei lâ a vy sala, Na pachhana cha na bietai hawhta kei lâ a vy mawh sy!

⁴² Na bie ei ngâpa vâta, Nâ pasipasawhtuhpazy a chhy nawpa ei hnei aw.

⁴³ Ei hnabeiseihna cha na ryhpa liata y ta, Chavâta biedopa ei pakah tawhta la pathlah khah y.

⁴⁴ Na ryhpa zyh lymâ aw na ta, Chhâzaw nata tlyzaw ta khâ ei zyh lymâ aw.

⁴⁵ Na pachunazy ei tluapa vâta, Khotalaipa ta ei charei aw.

⁴⁶ Beizy hmiakô liata na bieraopazy reih aw na ta, Hmia pachhiepa châ aw va na;

⁴⁷ Na biepiepazy liata a ly na ta, Na biepiepazy ei pasô ngaita.

⁴⁸ Na biepiepa ei pasôpazy lâta ei ku pazawh aw na ta, Na bieraopazy ei pachâ tyh aw.

ז (Zayin)

⁴⁹ Na bie liata hnabeiseihna na pahneisa ha tlôh chi ta, Châ chakaotuhpa hnohta na bie kha a thei mah y.

⁵⁰ Na bietai ta eina pahro heih tyhpa kyh cha, Pasa ei tao daihti liata ei thlalôhna a châ tyh.

⁵¹ Apalaipazy ta thata na pahneisao ei ta, Châhrasala na ryhpa tleisai va na.

⁵² Hy Abeipa, ryhpa hlôpazy ei thei châh ta, Cha ryhpazy chata thlah eina palôh tyh.

⁵³ Na ryhpa a heihsaituhpa moleipazy vâta, Ei hie thata a hâh tyh.

⁵⁴ Ei khitlyna o liana heta, Na bieraopazy cha ei hlazy ama châ tyh.

⁵⁵ Hy Abeipa, zâ ta na moh a thei tyh na ta, Na pachuna bie ei zyh tyh.

⁵⁶ Na pachunazy zyhpa cha, Ei châta byhnâ a châ tyh.

ח (Heth)

⁵⁷ Hy Abeipa, nâ cha ei tovyuh châ chi ta, Na bie zyh awpa ta bie ei châ vaw taih haw.

⁵⁸ Ei palôh tlokhuh ta na khokheina cha hiah na ta, Na bietai hawhta na ngiachhie mah y.

⁵⁹ Ei hroziezy pachâ sualuah na ta, Na bieraopazy lâta ei pheizy chakâ na ta,

⁶⁰ Na biepiepazy zyh awpa ta, Hawh leipa ta ei para tyh.

⁶¹ Hmoparaopazy chaori ta na chazei hra sala, Na ryhpa bie my beih va na.

⁶² Na pachiana siapazy vâta, Zâcho ta thyu na ta ei cha reithai tyh.

⁶³ Kei cha nâma châ chituhpa zydua viasa châ na ta, Na pachuna bie a zyhpazy viasa ei châ.

⁶⁴ Hy Abeipa, alei he na kyhpachâna ta a bie; Na bieraopazy na pachu mah y!

ט (Teth)

⁶⁵ Hy Abeipa, na bie hawhta, Châ chakaotuhpa chô liata a phapa ta na tao haw.

⁶⁶ Na biepiepazy a ngiapâpa châ na ta, Pahnona nata pachiana phapa na pa­chu mah y.

⁶⁷ Pasa pataosapa ei châ hlâ tawh chhao ta, Cha tleisai ha na ta; Tahmâ deikua cha na bie ei zyh lymâ.

⁶⁸ Nâ cha Khazoh phapa nata hmo pha a taopa châ chi ta, Na bieraopazy na pachu mah y.

⁶⁹ Apalaipazy ta haipa ta na pachhie ei ta, Châhrasala ei palôh tlokhuh ta na pachunazy ei zyh lymâ.

⁷⁰ Ama palôh cha sa thaw kuapa hawhta a kuhchha ta, Kei deikua na ryhpa liata ei ly.

⁷¹ Na bieraopazy ei chu thei nawpa ta, Riepatheipa ta ei vaw ypa kha kei châta a pha na.

⁷² Ngôh nata tâkâ sâh hluhpi hlâta, Ei châta na pakah ryhpa bie pha via syulyu tlôh ta.

י (Yodh)

⁷³ Na ku ta na tao chi ta, Eina padua chi; Na biepiepazy ei chu thei nawpa ta, Novâhna na pie mah y.

⁷⁴ Na bie liata hnabeiseihna ei hneipa vâta, Nâma châ chituhpazy ta na hmô aw ei ta amâ ly aw.

⁷⁵ Hy Abeipa, na pachianazy â do tahpa pahno na ta, Pasa eina pataosapa chhao chi he â dopa a châ.

⁷⁶ Châ chakaotuhpa hnohta na bietai hawhta, Na kyhpachâna tleih beih leipa ta thlah na palôh mawh sy.

⁷⁷ Na ryhpa cha ei lyna châ tlôh ta, Ei hro thei nawpa ta, Na zawngiahna cha kei lâ a vy mawh sy.

⁷⁸ Apalaipazy cha haipa ta eina teipa vâ ei ta, Maophyuhpa ta y ei sala; Kei deikua cha, Na pachuna biezy ei pachâ tyh aw.

⁷⁹ Châ chituhpazy kei lâ a vaw heih ei sala, Na bieraopazy a pahnopa maih a vaw heih mawh ei sy.

⁸⁰ Maophyuhpa ta ei y lei nawpa ta, Ei palôh he na bieraopazy liata phapakipa ta y mawh sy!

כ (Kaph)

⁸¹ Ei thlahpa ta na pachhana vâ ta, Na bie liata ei hnabeiseihna a y.

⁸² Na bietai mokhâhpa ta ei mo bâ ta, “Khati ta ma thlah eina palôh aw chi?” ei tah tyh.

⁸³ Meikhuh liata savo titheih hawhta ei châpa chhao ta, Na bieraopazy my beih va na.

⁸⁴ Châ chakaotuhpa he khachâ ma pasa ei tao chy aw tly? Nâ taolatuhpazy he khati ta ma na pachia aw ei tly?

⁸⁵ Apalaipazy ta khaohtlô na chao khâh ei ta, Na ryhpa bie hawhta hroh veih ei.

⁸⁶ Na biepiepa zydua ngâ a chhih ta, Âmo deikua cha haipa bie hmâpa ta eina taola ei; Na bao mah y!

⁸⁷ Alei tawhna heta na pahleipadia daihmâ ei ta, Châhrasala na pachuna biezy a heihsai beih va na.

⁸⁸ Na pakah bieraopazy ei zyh lymâ thei nawpa ta, Na kyhpachâna ta na pabohsa mah y.

ל (Lamedh)

⁸⁹ Hy Abeipa, na bie cha chhâzaw ta y ta, Vârâh liata â i ngaitapa ta â duah thlâh haw.

⁹⁰ Na ngâchhihna chhâ zydua châta a daih ta, Leilô he tao chi ta, Â ipa ta â duah lymâ.

⁹¹ Na raozie lymâ hawhta tanoh taihta a duah ei ta, Hmo to zydua nâma châ chakaotuhpa sai ama châ.

⁹² Na ryhpa he ei lyna châ vei mawh sala, Ei pasataona liata ei leidia ha aw.

⁹³ Na pachunazy hmâpa ta na pahro ha chi ta, Chavâta na pachunazy my beih aw va na.

⁹⁴ Na eih châ na ta, Na pachuna a tluapa ei châpa vâta, Na pachha mah y.

⁹⁵ Hmoparaopazy ta thie nâ chhuahpa ta na hâ ei ta, Kei deikua cha na bieraopazy ei pachâ tyh.

⁹⁶ Phapakina zydua chhâna hmô ha na ta, Nâma biepiepa deikua cha chhâna hnei vei.

מ (Mem)

⁹⁷ Na ryhpa cha ei pasô kaw dia! Noh y ta ei pachâ tyh.

⁹⁸ Na biepiepazy ei hnohta khâ a ypa vâta, Ei chariahpazy hlâta so viapa ta eina tao.

⁹⁹ Na bieraopazy ei pachâ tyhpa vâta, Nâ pachutuhpa zydua hlâta novâhna ei hnei via.

¹⁰⁰ Na pachuna biezy ei zyhpa vâta, Machâpazy hlâta ei no a vâh via.

¹⁰¹ Na bie ei zyh thei nawpa ta, Moleina lâpi to tawhta ei phei â sysai haw.

¹⁰² Eina pachu hapa vâ chi ta, Na ryhpa tleisai beih va na.

¹⁰³ Na biezy cha ei pakah châta a thlôh kaw dia! Kheihti hlâta ei pakah liata a thlôh via.

¹⁰⁴ Na pachunazy tawhta novâhna hnei na ta, Chavâta hrozie doleipa to ei hao.

נ (Nun)

¹⁰⁵ Na bie cha ei phei châta meiôh châ ta, Ei lâpi châta khaihna a châ.

¹⁰⁶ Na ryhpa siapazy zyh awpa ta, Bietai taopa ta ei pa-i haw.

¹⁰⁷ Hy Abeipa, thata pasa pataosapa ei châ hih; Na bie hawhta na pahro mah y!

¹⁰⁸ Hy Abeipa, ei châ haw na, Lôhthai ta reithaina ei chaw hlâpazy he a pyh la, Na ryhpazy na pachu mah y.

¹⁰⁹ Ei hrona he ei ku liata a y tyhpa chhao ta, Na ryhpa deikua cha my beih va na.

¹¹⁰ Hmoparaopazy ta khoheih na chôkhâh ei ta, Châhrasala na pachuna biezy paviasai va na.

¹¹¹ Na bieraopazy cha kei châta ei chhâzaw ryuto châ ta, Ei palôh alyna a châ.

¹¹² Na bieraopazy tao awpa ta ei palôh pahei na ta, Chhâzaw ta, achhâna taihta ei tao lymâ aw.

ס (Samekh)

¹¹³ Lôh no a phaohpa chyhsa cha a hao na ta, Kei deikua cha na ryhpa ei pasô.

¹¹⁴ Nâ cha ei nyuna su nata ei vyhphao châ chi ta, Na bie liata ei hnabei a seih tyh.

¹¹⁵ Nâmo, moleina hmo a taopazy saih u, Ei Khazohpa biepiepazy ei zyh thei nawpa ta, Na siesai syulyu ha teh u.

¹¹⁶ Ei hro thei nawpa ta, Na bietai hawhta na hrôbieh la, Ei hnabeiseihna liata maophyuhpa ta na paysa khah y!

¹¹⁷ Na cha-ao mah y; Chatanachata a boh aw na ta, Na bieraopazy cha ei pachâ lymâ aw.

¹¹⁸ Na bieraopazy a tleisaipa zydua cha, Chyhsa doleipa nata piehpiepa ama châpa vâta, Na dytha ha ei.

¹¹⁹ Lei chyhsa moleipa zydua cha, Thua saiiepa hawhta na thy ha ei; Chavâta kei cha na bieraopazy ei pasô.

¹²⁰ Ei pôhpa he nâma chipa ta a chalyu ta, Na pachianazy ei ngiaroh kaw tyh.

ע (Ayin)

¹²¹ Âdopa nata asiapa ta tao tyh na ta, Nâ tlybaituhpazy liata na siesai khah y.

¹²² Châ chakaotuhpa pha nawpa bie a taih la, Akhotlâhpazy ta eina tlybai awpa ei pasaih khah y.

¹²³ Na pachhana mokhâhpa ta ei mo bâ ha ta, Na bietai siapa mokhâhpa ta ei mo a bâ khai haw.

¹²⁴ Na kyhpachâna tleih beih leipa hawhta, Châ cha­kaotuhpa chô liata tao la, Na bieraopazy na pachu mah y.

¹²⁵ Châ chakaotuhpa châ na ta, Na bieraopazy ei pahno thei nawpa ta, Novâhna na pie mah y!

¹²⁶ Na ryhpa parao ha ei ta, Hy Abeipa, rai na hria daihti a tlô haw.

¹²⁷ Chavâta na biepiepazy cha, Ngôh hlâta pasô via na ta, Ngôh suapa hlâta ei pasô via.

¹²⁸ Chavâta na pachunazy â do khai tah na ta, Hrozie doleipa ei hao.

פ (Pe)

¹²⁹ Na bieraopazy cha noâh a chhih ta, Chavâta ei hro ta a zyh lymâ.

¹³⁰ Na biezy chhopasiana ta khaihna pie ta, Nomaohpazy hnohta novâhna a pie tyh.

¹³¹ Na biepiepazy ei vâ kawpa vâta, Ei pakah â na ta ei hu a hiah kaw tyh.

¹³² Na moh a pasôpazy na ngiachhie tyhpa hawhta, Kei lâ a vaw heih la, Na ngiachhie mah y.

¹³³ Na bie hawhta ei keih chakânazy vaih la, Moleina ta ei chô liata bie a hnei awpa pasaih khah y.

¹³⁴ Na pachunazy ei zyh thei nawpa ta, Chyhsazy tlybaina tawhta na chatlai mah y.

¹³⁵ Châ chakaotuhpa chô liana he na hmia pakhaihsa la, Na bieraopazy na pachu mah y.

¹³⁶ Na ryhpa bie ama zyh leipa vâta, Ei mozy tawhta mothlih chavah a loh tyh.

צ (Tsadhe)

¹³⁷ Hy Abeipa, nâ cha asiapa châ chi ta, Na ryhpazy chhao â do.

¹³⁸ Bieraopa na taopazy sia ta, Tlokhuh ngâ tlâhpazy ama châ.

¹³⁹ Ei khakhaipazy ta na biezy ama my hapa vâta, Ei phahnai ngiahna ta eina nie khai haw.

¹⁴⁰ Na bietai cha a phapa ta pasia hapa châ ta, Châ chakaotuhpa heta a pasô ngaita.

¹⁴¹ Chyhsa nawhpa nata mohnaopa châ na ta, Chatahrasala na pachunazy my va na.

¹⁴² Na siana cha chhâzaw siana châ ta, Na ryhpa chhao biedopa a châ.

¹⁴³ Nôpona nata pachârôhna ta na tla thlu ta, Châhrasala na biepiepazy cha ei lyna a châ.

¹⁴⁴ Na bieraopazy cha chhâzaw ta a do ta, Ei hro thei nawpa ta, Novâhna na pie mah y.

ק (Qoph)

¹⁴⁵ Hy Abeipa, ei palôh tlokhuh ta cha aw na ta, Na chyh-ei mah y! Na bieraopazy ei zyh aw.

¹⁴⁶ Cha pado na ta, Na pachha mah y; Na bieraopazy cha ei zyh lymâ aw.

¹⁴⁷ Khihdei hlâta thyupa ta, Baona hiapa ta awh na ta; Na biezy liata ei hnabei a seih tyh.

¹⁴⁸ Na bie ei pachâ thei nawpa ta, Zâ vaina chhâ hlâlei cha ei mo ei padeih thlâh ha tyh.

¹⁴⁹ Na kyhpachâna tleih beih leipa vâta ei ao thei la, Hy Abeipa, na ryhpa hawhta na pahro heih mah y.

¹⁵⁰ Ei chô liata hmo pha leipa tao a chhuahpazy ta nâ vaw hnia ei ta, Âmo cha na ryhpa tawhta a hla kawpazy ama châ.

¹⁵¹ Nâ deikua cha Hy Abeipa, Lâhnia liata y chi ta, Na biepiepa zydua chhao adopa a châ.

¹⁵² Na bieraopazy cha chhâzaw châta taopa a châzie, Hlâno tawhta ei vaw pahno haw.

ר (Resh)

¹⁵³ Na ryhpa ei my beih leipa vâta, Ei pasataona he moh la na pachha mah y.

¹⁵⁴ Ei bie a duakheipa ta na pachha la, Na bietai hawhta na pahro heih mah y.

¹⁵⁵ Na bieraopazy ama tlua leipa vâta, Pachhana cha hmoparaopazy tawhta â hla kaw.

¹⁵⁶ Hy Abeipa, na zawngiahna cha thata a châ kaw dia, Na ryhpa hawhta na pahro heih mah y.

¹⁵⁷ Nâ taolatuhpazy nata nâ khakhaipazy hluh kaw ei ta, Châhrasala na bieraopazy tleisai beih va na.

¹⁵⁸ Ngiapâleipazy moh ei na ta, Na biepiepazy ama zyh leipa vâta, Ei pasi kaw ei.

¹⁵⁹ Na pachunazy ei pasôzie he pachâ la, Hy Abeipa, na kyhpachâna tleih beih leipa vâta, Ei hrona he pabohsa mah y.

¹⁶⁰ Na bie zydua a do ta, Na pachiana siapa zydua chhâzaw ta a y thlâh ha aw.

שׂ nata שׁ (Sin nata Shin)

¹⁶¹ Ryureituhpazy ta a chhâpa y leipa ta na taola ei ta, Ei palôh deikua cha na biezy chipa ta tlao â chalyu.

¹⁶² Hraona sôh hluhpi a hmôpa hawhta, Na bie liata ei ly ngaita.

¹⁶³ Haipa he a haopa ta pasi na ta, Na ryhpa deikua cha ei pasô ngaita.

¹⁶⁴ Na ryhpa siapazy vâta, Noh kha ta ei sari ei cha reithai tyh.

¹⁶⁵ Na ryhpa a pasôtuhpazy cha, Thlalôhna ipa hnei ei ta, Khâpa ta hmah papao thei aw veih ei.

¹⁶⁶ Hy Abeipa, na pachhana hnabeiseih na ta, Na biepiepazy ei tao lymâ.

¹⁶⁷ Na bieraopazy cha ei hro ta zyh ta, Ei pasô ngaita.

¹⁶⁸ Na pachunazy nata na bieraopazy zyh lymâ na ta, Ei hrozie zydua he na hmiakô liata â lâ khai.

ת (Taw)

¹⁶⁹ Hy Abeipa, ei awna he na kô vaw tlô sala, Na bie hawhta novâhna na pie mah y!

¹⁷⁰ Ei hiana he na kô vaw tlô sala, Na bie hawhta na pachha mah y.

¹⁷¹ Na bieraopazy eina pachupa vâ chi ta, Ei hmaozy reithaina ta a khô pathlah.

¹⁷² Na biepiepa zydua â do khaipa vâta, Ei paleih heta na bie reithaipa ta sa mawh sy.

¹⁷³ Na pachunazy ei tlyh hapa vâta, Na bao awpa ta na ku khâ a mâ thlâh ha mawh sy.

¹⁷⁴ Hy Abeipa, na pachhana vâ ngaita na ta, Na ryhpa cha ei lyna a châ.

¹⁷⁵ Ei cha reithai thei nawpa ta na pahro la, Na ryhpa biezy ta na hrôbieh mawh sy.

¹⁷⁶ Mietaku a leipa hawhta viavi na ta, Châhrasala na biepiepazy ei my leipa vâta, Châ chakaotuhpa he vaw tlua mah y.