HLAZY 118 - Mara Bible RV (BSI)

Abeipa kyhpachâna reithaina

¹ Abeipa lâ alyna bie hlâ teh u, Ano cha pha ta, A kyhpachâna chhâzaw ta a tleih beih leipa a châ.

² Izarei ta reih sala, “A kyhpachâna chhâzaw ta a tleih beih leipa a châ,” Tah mawh sy.

³ Arawna pathlazy ta reih ei sala, “A kyhpachâna chhâzaw ta a tleih beih leipa a châ,” Tah mawh ei sy.

⁴ Abeipa a chituhpazy ta reih ei sala, “A kyhpachâna chhâzaw ta a tleih beih leipa a châ,” Tah mawh ei sy.

⁵ Nôpopa ta ei y nota Abeipa cha pado na ta, Abeipa ta nâ chhy ta, Ei nôpona eina pathlâpa haw.

⁶ Abeipa ta ei chhâh a châ ta, Chavâta chi aw va na. Chyhsa ta kheihta eina tah thei aw?

⁷ Abeipa ta ei chhâh a châpa ta na bao ta, Chavâta nâ haotuhpazy ama paopa ei hmô aw.

⁸ Chyhsapa ngâpa hlâta, Abeipa a chhaipa a pha via.

⁹ Beimachâzy ngâpa hlâta, Abeipa a chhaipa a pha via.

¹⁰ Phopi zydua ta na dôh ei ta, Abeipa moh ta ei chhawh pathlah khai ha ei.

¹¹ Na dôh ei ta, Su to tawhta na dôh ei ta, Abeipa moh ta ei chhawh pathlah khai ha ei.

¹² Kheihzy hawhta na palô ei ta, Châhrasala ahloh thih liata mei hawhta pachhaipa châ ei ta, Abeipa moh ta ei chhawh pathlah khai ha ei.

¹³ Chariahpa ta na vaw tôh ta, Ei pao daihmâ; Châhrasala Abeipa ta eina bao.

¹⁴ Abeipa cha ei thatlôna nata ei hla châ ta, Ei pachhana a vaw châ haw.

¹⁵ Mosiapazy poh o liata la, Pachhana thaphana hlazy ta bie ta, Hetana heta ama sa tyh: “Abeipa ku chachâh lâta riahpha ngaitapa ta tao ta,

¹⁶ Abeipa ku chachâh lâta cheihchalo ta, Abeipa ku chachâh lâta riahpha ngaitapa ta a tao.”

¹⁷ Thi leipa aw na ta, Hroh aw na ta, Abeipa hmotaopazy ei phuah aw.

¹⁸ Abeipa ta thata na chhorei ta, Thina lâ deikua na hlâ vei.

¹⁹ Siana chhikaozy na pahypa teh u, Cha lâ tawhta a ngia aw na ta, Abeipa lâ alyna bie ei reih aw.

²⁰ Cha cha Abeipa chhikao châ ta, Mosiapazy cha, cha lâ tawhta amâ ngia aw.

²¹ Hy Abeipa, na chyhei chi ta, Ei pachhana na châpa vâta, Alyna bie ei cha hlâ.

²² O satuhpazy alô kho leipa kha, Abôna lô a vaw châ haw.

²³ Cha cha Abeipa taopa châ ta, Eima mo liata â ngia ngaita.

²⁴ He he Abeipa taopa noh châ ta, He noh he a ly sih la, Thaphapa ta y ei suh u.

²⁵ Hy Abeipa, miah pachha la, Hy Abeipa, hlao miah patloh mah y!

²⁶ Abeipa moh ta a vypa cha reithaipa ta y mawh sy! Abeipa o tawhta byhnâ eima cha awpa ei.

²⁷ Abeipa cha Khazohpa châ ta, Eima chô liata a khaihna a pakhaihsa haw. Atheihna sahroh cha chaori ta hraih u la, Maisâh kizy liata hraih teh u!

²⁸ Hy Abeipa, nâ cha ei Khazohpa châ chi ta, Alyna bie ei cha hlâ aw; Ei Khazohpa châ chi ta, Ei cha palyupalih aw.

²⁹ Abeipa lâ alyna bie hlâ teh u; Ano cha pha ta, A kyhpachâna chhâzaw ta a tleih beih leipa a châ.