HLAZY 116 - Mara Bible RV (BSI)

Hro pabohsana vâta Abeipa reithaina

¹ Ei ao thei ta, zawngiahna ei hiapa a theipa vâta, Abeipa kyh ei pachâ.

² Kei lâta a nah a pachôhpa vâta, Ei hro chhôh zydua ta ano cha ei pado aw.

³ Thina khoheihzy ta na chadôpa ta, Athihkhih pasa taonazy ta na patu ta, Nôpopa nata pachârôhpa ta ei y.

⁴ Chatawhcha hetana heta Abeipa moh ei pado: “Hy Abeipa, ei châ haw na, Ei thlahpa pachha mah y!”

⁵ Abeipa cha ngiachhie theipa nata asiapa châ ta, Eima Khazohpa cha zawngiah theipa a châ.

⁶ Abeipa ta sona a phahlapazy hrôbieh tyh ta, Panawhpa ta ei y nota eina pachha haw.

⁷ Hy ei thlahpa, nâ pahâna lâ kua heih mah y, Abeipa ta na chô liata a pha ngaitapa ta a tao ha hih.

⁸ Ei thlahpa he thina tawhta pachha chi ta, Ei mozy mothlih tlana tawhta pachhapa ta, Ei pheizy ahluana tawhta na pachha haw.

⁹ Chatanachata ahrohpazy râh liata, Abeipa hmiakô liata ei charei aw.

¹⁰ “Thata pasa pataosapa ei châ,” Ei tah no chhao ta, Ei ngiapâ thlâh haw.

¹¹ Chipa ta y na ta, “Chyhsapa zydua a haihpa sai ama châ,” Ei vaw tah thlâh ha cha.

¹² Ei chô liata a phana zydua vâta, Abeipa cha khâpa ei pie hri aw?

¹³ Pachhana nyu la aw na ta, Abeipa moh ei pado aw.

¹⁴ A chyhsa zydua hmiakô liata, Abeipa liata ei bietaizy ei patlô aw.

¹⁵ A mopathaihpazy thina cha, Abeipa pachâ a sôh ngaita.

¹⁶ Hy Abeipa, châ chakaotuhpa châ na ta, Na seichanô sawchapawpa, Châ chakaotuhpa ei châ hih.

¹⁷ Alyna bierei atheihna cha vaw hlâ aw na ta, Abeipa moh cha ei pado aw.

¹⁸ A chyhsa zydua hmiakô liata, Abeipa liata ei bietaizy ei patlô aw.

¹⁹ Abeipa o dôhpachhôh tlyhmia liata, Hy Zerusale, na khiliah khophie liata, Abeipa lâta ei bietaizy ei patlô aw. Abeipa cha reithai teh u!