HLAZY 115 - Mara Bible RV (BSI)

Abeipa moh parônahsana

¹ Keimo lâ châ leipa sala, Hy Abeipa, keimo lâ châ leipa sala, Na kyhpachâna tleih beih leipa nata na ngâchhihna vâta, Nâma moh rônah nawpa tlao châ mawh sy!

² Khazia phopizy ta, “Ama Khazohpa cha khataih liata a y haw?” ama tah aw?

³ Keimo Khazohpa cha vârâh liata y ta, A khopa maih a tao tyh.

⁴ Ama khazoh nothlahpazy cha, Tâkâ nata ngôh zy châ ei ta, Chyhsa ku ta taopazy ama châ.

⁵ Pakahzy hnei ei ta, Reih pathlie thai veih ei; Mozy hnei ei ta, Hmô veih ei.

⁶ Nakhaohzy hnei ei ta, Thei veih ei; Hnapasuzy hnei ei ta, Roh thei veih ei.

⁷ Kuzy hnei ei ta, Hria thai veih ei; Pheizy hnei ei ta, Sie thai veih ei; Ama rao tawhta ao pua thei hra vei.

⁸ Nothlahpa a taotuhpazy cha, Nothlahpa hawhta châ ei ta; Nothlahpa a ngâtuhpa zydua chhao, Nothlahpa hawhta ama châ.

⁹ Hy Izarei pathlazy saih u, Abeipa cha ngâ teh u! Abeipa cha Izarei baotuhpa nata vyhphao a châ.

¹⁰ Hy Arawna pathlazy saih u, Abeipa cha ngâ teh u! Abeipa cha Arawna pathlazy baotuhpa nata vyhphao a châ.

¹¹ Nâmo, Abeipa a chituhpazy saih u, Abeipa cha ngâ teh u! Abeipa cha ano a chituhpazy baotuhpa nata vyhphao a châ.

¹² Abeipa ta miah a thei thlâh ha ta, Byhnâ miah a pie aw; Izarei pathlazy byhnâ pie aw ta, Arawna pathlazy byhnâ a pie aw.

¹³ Abeipa a chituhpazy cha, A lai a chyh ta byhnâ a pie aw ei.

¹⁴ Abeipa ta nâ nata na sawzy cha, Cha papôhsa via rili mawh sy!

¹⁵ Lei nata vâ taotuhpa Abeipa ta, Byhnâ cha pie mawh sy!

¹⁶ Avâzy khi Abeipa vârâh châ ei ta, Alei deikua he chyhsa sawzy a pie ei.

¹⁷ Athipazy ta Abeipa cha reithai leipa ei ta, Sidiana lâ a sie hapazy ta Abeipa cha reithai veih ei.

¹⁸ Keimo deikua cha, Tahmâ tawhta chhâzaw nata tlyzaw ta, Abeipa cha eima reithai aw. Abeipa cha reithai teh u!