HLAZY 113 - Mara Bible RV (BSI)

Areisipa palyupalihna

¹ Abeipa cha reithai teh u! Hy Abeipa chakaotuhpazy saih u, Abeipa cha reithai u la, Abeipa moh cha reithai teh u!

² Tahmâ tawhta chhâzaw nata tlyzaw taihta, Abeipa moh cha reithaipa ta y mawh sy!

³ Noh chhina tawhta noh tlana taihta, Abeipa moh cha reithaipa ta y mawh sy!

⁴ Abeipa cha phopi zydua hlâta chônô viapa châ ta, A rônahna avâzy hlâta â sâh via.

⁵ Abeipa eima Khazohpa hawhpa he ahy y ta, Vâ chô sâhpa liata pahrâpa ta,

⁶ Alei nata avâ zâ moh tyhpa ahy a y?

⁷ Ano cha dyhchhiepazy dohlei tawhta pathyu ta, Apuapa sopakhyna tawhta phahlapazy chalopa ta,

⁸ Beimachâzy hnohta patyusa ta, A phopi beimachâzy hnohta a patyusatuhpa a châ.

⁹ Chanô chohpa hnohta chhôhkha pie ta, Sawzy pie ta nô palôhtlâhpa ta a tao. Abeipa cha reithai teh u!