HLAZY 110 - Mara Bible RV (BSI)

Abeipa chachâh lâta a tyuhpa

Dâvi Hla

¹ Abeipa ta ei Beipa hnohta, “Na chariahpazy ei phei tlyna ta ei tao hlâlei cha, Ei chachâh lâta a tyuh mah y,” tah ta.

² Abeipa ta Zaio tawhta na thatlôna chôchahrei vaw tuah sala, Na chariahpazy hry liata ryureih mah y!

³ Hrâ na sie noh ta, Âmo lôhthai ta na phopi châ vaw hlâ aw ei ta; Pathaihna nata rônahna ta a tobipa ta, My diati tlapa hawhta, Na thyutliazy tha thiehpa ta nâ lâ amâ vy aw.

⁴ “Melkizade theihthaina yzie hawhta, Tlyzaw ta theihthaipa na châ aw,” tahpa ta, Abeipa ta bie châ taih ha ta, A palôh panano aw vei.

⁵ Ei Beipa cha na chachâh lâta y ta, A hiehâhna noh liata beizy a chhawh pathlah aw.

⁶ Phopizy pachiapa ta, Athihpa rizy ta pabie aw ta; Alei kawh ngaitapa liata râh luhpazy A chhawh pathlah khai aw ei.

⁷ Lâpi liata vahtie ti doh aw ta, Chavâta a luh a pachhua thei aw.