HLAZY 109 - Mara Bible RV (BSI)Chariahpazy viarithô awpa ta thlahchhâna Hla chhituhpa châta: Dâvi Hla 1 Hy ei reithaipa Khazohpa y, A chalih thlâh ha khah y! 2 Hmoparaopa nata dôthaipa zy ta ama pakah na â chie ei ta, Paleih haihthaipa hmâpa ta bie eina rei thlu ei. 3 Ahaona bie ta na chadô ei ta, A chhâpa y leipa ta einâ dyuh ei. 4 Ei kyhpachâna cha leihna ta na thô ei ta, Châhrasala kei la thlah ei chhâ lymâ. 5 Hmo phapa cha hmo chhiepa ta na thô ei ta, Ei kyhpachâna ahaona ta eina thô ei. 6 Leihtuhpa a dyuh awpa ta chyhsa moleipa rao la, Leihtuhpa cha a chachâh lâta a duah mawh sy. 7 Pachiapa ta a y tita, Thaileichâpa ta pua sala; A thlahchhâna chhao moleina hawhta pachâpa châ mawh sy! 8 A hro chhôh nohzy chyu sala, Mohropa ta a su a thla mawh sy! 9 A sawzy paw leipa ta y ei sala, A lapinô nôhmeipa châ mawh sy! 10 A sawzy viavipa ta kudao ei sala, Ama pahrâna khih rypa tawhta lâhlapi lâta nie awpa tlua mawh ei sy! 11 Dyu a pacheisatuhpa ta a hneipa zydua lapa khai sala, Khichhaipazy ta a hriapasana theizy hrao mawh ei sy! 12 A chô liata phana a palâsa awpa y khao leipa ei sala, A saw hârapazy a ngiachhie awpa y khah ei sy! 13 A pathlazy chhawh pathlahpa ta y ei sala, Chhâ a vaw pazi awpa liata a moh pahno khao leipa châ mawh sy! 14 A pathlatuhpazy moleina Abeipa hmiakô liata a thei thlâhpa ta y sala, A nô moleina mypa châ khah se! 15 Ama moleinazy Abeipa hmiakô liata khâ y sala, Âmo atheithlâhna alei tawhta chhawh pathlah ha mawh sy! 16 Phana palâsa a chhuah leipa ei ta, Dyhchhiepa nata phahlapazy taola ei ta, Palôh keichheihpazy thie amâ chhuah. 17 Chhiesa pahâsa ta, Chhiesanazy a chô liata vaw tlô sala; Byhnâ awna liata â ly leipa vâta, Byhnâ cha ano tawhta â hlapi ta y mawh sy! 18 Chhiesana cha poh hawhta a bu ta, A chhiesapazy cha ti hawhta a chhôh lâ a ngia sala, Sathaw hawhta a rupazy liata a ngia mawh sy! 19 Chhiesanazy cha chysia hawhta a tobi sala, Chaisaih hawhta noh chareih a saih mawh sy! 20 Cha hawhna chata nâ leihtuhpazy cha Abeipa ta thô sala, Ei chô liata bie chhiepa a reihtuhpazy cha thô mawh sy! 21 Nâ deikua cha, Hy Abeipa Zehôvâh y, Na moh vâta ei chô liata a phapa ta tao la; Na zawngiahna phana vâta, Na pachha mah y! 22 Dyhchhiepa nata phahlapa châ na ta, Ei chhôh liata ei palôh hmahphaopa ta a y. 23 Zâlâ nohawh hawhta lei na ta, Khawsu hawhta chatho pathlahpa ta ei y. 24 Chaheihna vâta ei pakhuzy a thachhâ ta, Ei sa a zaoh khai haw; Ei thawh tyhpa kha hmô awpa y khao vei. 25 Nâ leihtuhpazy pahneisao awpa vaw châ ha na ta, Eina hmô nah ei ta, ama luh eina chahuah chie tyh ei. 26 Hy Abeipa ei Khazohpa, na bao la, Na kyhpachâna tleih beih leipa vâta, Na pachha mah y! 27 Cha cha nâma ku a châ tahpa pahno ei sala, Hy Abeipa, na taopa a châ tahpa pahno mawh ei sy! 28 Âmo cha chhiesatuhpa châ ei sala, Nâ deikua cha byhnâ pietuhpa châ mah y! Ama thyu tita maophyuhpa ta y ei sala, Châ chakaotuhpa deikua cha thaphapa ta y mawh sy! 29 Nâ leihtuhpazy cha nohzaona ta tobipa châ ei sala, Nozana poh a bu mawh ei sy! 30 Ei pakah ta Abeipa lâ alyna bie thata hlâ aw na ta, Zasâh manôh hry liata ei reithai aw. 31 Abeipa cha phahlapa chachâh lâta a duah ta, Thi awpa ta thailei a pachâsatuhpazy ku tawhta pachhatuhpa a châ. |