HLAZY 105 - Mara Bible RV (BSI)

Abeipa hmotao noâhchhihpazy

¹ Abeipa lâ alyna bie hlâpa ta a moh pado u la; Phopizy hry liata a hmotaopazy pahnosa teh u!

² Ano lâ hla sapa ta, Ano cha reithai u la; A hmotao noâhpa zydua phuah teh u!

³ A moh pathaihpa parônahsa u la, Abeipa a tluatuhpazy palôh cha, Thaphapa ta y mawh sy!

⁴ Abeipa nata a thatlôna tlua u la, A hmia khâ tlua muh vy!

⁵ A hmotao noâhpazy a thei thlâh ha u la, A hmonoâhpazy a theipa ta, A pachiana biezy a thei thlâh ha teh u.

⁶ Hy a chakaotuhpa Abarahâ pathla saih u, Hy â tlyhpa Zakaw sawzy saih u, Chazy cha a thei thlâh ha teh u.

⁷ Ano cha Abeipa eima Khazohpa châ ta, A ryureina alei chô zydua liata a y.

⁸ A biehrai khâ a thei ta, A bietai chhâ sâh hluhpi taihta â thei thlâh haw.

⁹ Cha tlai cha Abarahâ hnohta a biehrai kha châ ta, Aisika hnohta a bietai châ hra ta;

¹⁰ Zakaw hnohta bieraopa ta pa-i ta, Izarei hnohta chhâzaw biehrai ta taopa ta,

¹¹ “Kâna râh cha pie aw na ta, Cha cha na ryuto râh a châ aw,” a tah.

¹² Maluh chyhta dei châ ei ta, Rei khi chhao a tloh leipa, Khichhaipa dei ama châ nona kha,

¹³ Phopi miakha tawhta miakha lâta viavi ei ta, Khinarâh miakha tawhta miakha lâta ama viavi laih.

¹⁴ Ahy ta hmah ama tlybai awpa pasaih leipa ta, Âmo vâta beizy ra ta,

¹⁵ “Ei sathawthupazy hria leipa u la, Ei hrohsopazy pasasa khuh vy,” a tah.

¹⁶ Râh liata chakâhna patlôsa ta, Niepa hnawh zydua a chhie khai ha nota,

¹⁷ Ama hmia lâta chyhsa pakha pasiesa ta, Cha cha sei ta zuapa Zawsi kha a châ.

¹⁸ A pheizy keihrai ta pasasa ta, A rao liata thua raopaky pakypa a châ.

¹⁹ A bie reipa a vaw tlô hlâlei cha, Abeipa bie ta ano cha a pasia lymâ.

²⁰ Abei ta chyhsa tuah ta ano cha pathlie ta, Phopizy ryureituhpa ta ano cha a tao haw.

²¹ A o liata hyutuhpa ta tao ta, A hneipa zydua chô liata ryureituhpa ta a tao.

²² Abeisawzy pha a tahzie hawhta chhorei ta, Beimachâzy sona pachu awpa ta, Ano cha ryureituhpa ta a tao.

²³ Izarei cha Izi râh lâ zu ta, Zakaw Hamâ râh liata a pahrâ.

²⁴ Abeipa ta a phopi cha ama chi thata papôh ta, Ama khakhaipazy hlâta thatlô viapa ta a tao ei.

²⁵ A phopi a hao awpa ta Izi mo palôh pakuasa ta, Ano a chakaotuhpazy chô liata piehpie ngaitapa ta a pataosa ei.

²⁶ A chakaotuhpa Mawsi tuah ta, Â tlyhpa Arawna chhao tuah ta.

²⁷ Âmo chata Izi mo hry liata ngianazy tao ei ta, Hamâ râh liata hmonoâhpazy ama tao.

²⁸ A biezy ama chakhiapa vâta, Zohna tuah ta, râh a pazohsa.

²⁹ Ama tizy thisaih lâta paliesa ta, Ama ngazy a pathisa.

³⁰ Ama râh cha cha-uzy ta bie ta, Ama beizy chhôhpadâhpa taihta â ngia.

³¹ Abeipa ta bie reih ta, Mathyupa hluhpi vaw tlô ta, Ama râh cha thlohmia ta a bie.

³² Ama râh liata vâsua vyuhpa ta pareih patlasa ta, Râh zydua liata mei pachiezy a patlasa.

³³ Ama kre zôhzy nata theiku kôzy chanaoh ta, Ama râh liata thozy a thlie khai haw.

³⁴ Abeipa ta bie reih ta, Khawsuzy vaw pua ei ta; Khawsu chi to rei tiah leizy ama vaw pua.

³⁵ Chazy chata ama râh liata chi hrohpa zydua nie khai ei ta, Chhaohlei thei zydua ama nie khai haw.

³⁶ Ama râh liata sawchapaw uhtheipa zydua Abeipa ta tusao ta, Ama chapaw thatlôna thei hmiatuapa zydua a tusao khai haw.

³⁷ Chatawhcha Izarei cha tâkâ nata ngôh chhaota a chhi papua ta, Ama chizy hry liata a paopa y veih ei.

³⁸ Âmo china ta Izi cha a tla thlu hapa vâta, Ama puapa cha Izi chhao ta â ly kaw.

³⁹ Abeipa ta Izarei sawzy khu awpa ta meihdo pazawhsa ta, Zâ ta khaih awpa ta mei a pie ei.

⁴⁰ Hiah ei ta, mamozy vaw patlasa ta, Avâ tawhta viahchhâ hluhpi a pie ei.

⁴¹ Lôpanô pahy ta, Ti a vaw chathôh ta; Chavah hawhta râh raohpa liata a loh laih.

⁴² A chakaotuhpa Abarahâ hnohta a bietai pathaihpa kha, Khâ a thei thlâh ha ta.

⁴³ Chavâta a phopi cha a ly ngaitapa ta a chhi papua ta, A chyhsa a tlyhpazy cha hla sana chôta â chhi papua ei.

⁴⁴ Phopi hropa râhzy cha âmo pie ta, Phopizy hria chiehpa ryu ta a patosa ei.

⁴⁵ Chatanachata a bieraopazy a vao aw ei ta, A ryhpazy ama zyh lymâ aw. Abeipa cha reithai teh u!