HLAZY 103 - Mara Bible RV (BSI)

Hro ta Abeipa reithaina

Dâvi Hla

¹ Hy ei thlahpa, Abeipa cha reithai la, Ei chhôh liata a ypa zydua saih u, A moh pathaihpa cha reithai teh u!

² Hy ei thlahpa, Abeipa cha reithai la, A hmotao phapa zydua my khah y.

³ Ano cha na paraona zydua a ngiathaituhpa châ ta, Na pasana zydua patlâhtuhpa a châ.

⁴ Khaohtlô tawhta na hrona a chatlaituhpa châ ta, Kyhpachâna tleih beih leipa lakho cha pakho ta, Zawngiahna lakho châ pakhotuhpa a châ.

⁵ Hmo pha to ta na khopazy lôhrâ cha patlô ta, Na thyutliana pahmôhpi locho no hawhta a pathieh heih tyh.

⁶ Abeipa cha siana ta rai hria ta, Tlybaipa zydua châta adona ta a hriapa ei.

⁷ Mawsi hnohta a lâpizy pahnosa ta, Izarei sawzy hnohta a hmotaopazy a pahnosa.

⁸ Abeipa cha zawngiahna nata ngiachhiena a hneipa châ ta, Hiehâhna kyh liata nainô sôpa ta, Kyhpachâna tleih beih leipa ta a biepa a châ.

⁹ Khâ ra leipa aw ta, A hiehâhna chhâzaw ta chhy ngâ thlâh ha aw vei.

¹⁰ Eima moleinazy hawhta eima chô liata tao leipa ta, Eima paraonazy hawhta viari miah thô vei.

¹¹ Alei tawhta avâ â sâhpa tlu khi ta, Ano a chituhpazy chô liata a kyhpachâna a rônah ngaita.

¹² Nochhi nata notla â hlapa tlu ta, Eima paraonazy cha keimo tawhta lâhlapi lâta a pasie haw.

¹³ Paw ta a sawzy a ngiachhiepa hawhta, Abeipa ta ano a chituhpazy cha a ngiachhie ei.

¹⁴ Kheihawhta taopa ma eima châ tahpa pahno ta, Dohlei dei eima châpa â thei thlâh haw.

¹⁵ Chyhsapa la, a hro chhôh nohzy sibiepa hawh dei châ ta, Râh pawpi hawhta kaw pawh ta,

¹⁶ Thlih ta hmô ta a lei tyh; A yna ta ano cha pahno khao vei.

¹⁷ Abeipa kyhpachâna tleih beih leipa deikua cha, Ano a chituhpazy chô liata chhâzaw nata tlyzaw ta y ta, A siana chhao ama samohzy taihta a y.

¹⁸ A kyhpachâna tleih beih leipa nata a siana cha, A biehrai zyh ta, A biepiepazy tao awpa ta a thei thlâhpazy chô liata a y lymâ.

¹⁹ Abeipa ta vârâh liata a beidyuchhai padua ta, Â beinarâh cha ato chô liata ryureituhpa a châ.

²⁰ Hy nâmo, a vâlyuhchâpazy saih u, Abeipa cha reithai u la; Nâmo, a biepiepazy zyh ta, A biereipa ao a theipa thatlôpazy saih u, Abeipa cha reithai teh u!

²¹ Hy Abeipa pheisaihzy saih u, Abeipa cha reithai u la; A khopa tao ta ano a chakaotuhpazy saih u, Abeipa cha reithai teh u!

²² A hmotaopa zydua ta Abeipa cha reithai u la, A ryureina su zydua ta Abeipa cha reithai teh u! Hy ei thlahpa, Abeipa cha reithai mah y!