HLAZY 102 - Mara Bible RV (BSI)

Pasataotuhpa thlahchhâna

Pasataotuhpa panaopa ta a y nota, Abeipa hmiakô liata nôu bie reina hla

¹ Hy Abeipa, ei thlahchhâna he thei la, Ei awna ao nâ lâ vaw tlô mawh sy!

² Ei nôpona noh liata na hmia na nyusai leipa la, Kei lâ na nah vaw pachôh la; Ei cha pado noh liata thlai nâ chhy mah y!

³ Ei hro chhôh nohzy he meikhuh hawhta lei ta, Ei rupazy meihô hawhta a kâ.

⁴ Ei palôh he sibiepa hawhta uah ta, Pati nie khohna chhao hnei khao va na.

⁵ Thata ta a hrô na ta, Ei rupazy ei vo liata â lâ khai haw.

⁶ Râhchawhpa riasi lyu na ta, Khi rypa vaku ei lyu.

⁷ A zia hmah ta a hra na ta, Vâphuh liata boby yrupa ei lyu.

⁸ Ei chariahpazy ta noh y ta na pasipasawh ei ta, Nâ mohnaopazy ta chhiesana châta Ei moh ama hmâh tyh.

⁹ Viahchhâ hawhta buchâh nie na ta, Ei dopa liata mothlih ei pahlao tyh.

¹⁰ Na ruchhôna nata hiehâhna vâta, Na chalo chi ta eina thy pathla ha chi.

¹¹ Ei hro chhôh nohzy he zâlâ nohawh hawh dei châ ta, Sibiepa hawhta ei uah.

¹² Nâ deikua cha, Hy Abeipa, Na beidyuchhai liata tlyzaw ta a tyuh chi ta; Chhâ zydua ta ama châ thei lymâ.

¹³ Thyu aw chi ta, Zaio cha zawh nâ ngiah aw; He he Zaio khokheina daihti châ ta, Daihti raopa a vaw tlô haw.

¹⁴ Châ chakaotuhpazy ta Zaio lôzy pasô ei ta, A dohlei chhao ama ngiachhie ngaita.

¹⁵ Phopizy ta Abeipa moh cha chi aw ei ta, Lei bei zydua ta na rônahna ama chi aw.

¹⁶ Abeipa ta Zaio cha sa pathi aw ta, A rônahna chhaota â vaw luah heih aw.

¹⁷ Ato vâiapa thlahchhâna thei ta, Ama thlahchhâna dytha vei.

¹⁸ He he chhâ a vaw y awpa châta ropa châ aw ta, Phopi a y mâh leipazy chhao ta Abeipa cha ama reithai aw:

¹⁹ Abeipa ta a su sâhpa pathaihpa tawhta za moh ta, Vâ tawhta lei lâ a za sai,

²⁰ Atâhpazy ahrôna theipa ta, Thi awpa ta raopazy pathlie awpa ta.

²¹ Chatanachata Zaio liata Abeipa moh phuah aw ei ta, Zerusale liata ano reithaina ama phuah aw.

²² Abeipa a chhy awpa ta, Phopizy nata abeinarâhzy amâ hmaohpakhy tita, Cha hawhta ama tao aw.

²³ Ei locho nota ei tha na pachhâ ta, Ei hro chhôh nohzy a pachyusa.

²⁴ “Hy ei Khazohpa, ei locho nota na la khah y, Nâma kôzy cha chhâ zydua a daihpa a châ,” tah na ta.

²⁵ Leilô abôna he hlâno ta na vaw bô hapa châ ta, Avâzy khi na kuzô a châ.

²⁶ Chazy cha leidia aw ei ta, Chysia hawhta ama chy khai aw; Poh hawhta ri aw chi ta, Thypa ama châ aw; Nâ deikua cha na y thlâh ha aw.

²⁷ Nâ cha na ualua ta khâ y chi ta, Na kôzy ta chhâna noh hnei vei.

²⁸ Châ chakaotuhpazy cha, Ama pathlazy â bohpa ta y ei sala, Ama chipathlazy cha, Na hmiakô liata pa-ipa ta y mawh ei sy.