HLAZY 101 - Mara Bible RV (BSI)

Ngâchhihna hro

Dâvi Hla

¹ Ngâchhihna nata adona kyh hla ta sa aw na ta, Hy Abeipa, nâma reithaipa ta ei sa aw.

² Phapakipa ta hro ei chhuah aw, Khati ta kei lâ nâ vy aw? Palôh dopa phaopa ta, Ei o liata ei vaw y aw.

³ Hmo pha leipa kheihawhpa rai, Ei mohmô liata soh aw va na. Lâpi a tleipazy hmotaopa a hao na ta, Kei liata a bai aw vei.

⁴ Chyhsa palôh chhiepa a hla aw na ta, Hmo moleipa rai pahno aw va na.

⁵ Ahy rai arulâta a vaih a leihtuhpa cha, Ei pahleipadia aw. Ahy rai a mo â sâhpa nata palôh laipa cha, Chhyh thai aw va na.

⁶ Râh chyhsa ngâchhihpazy Ei hnohta ama pahrâ thei nawpa ta, Âmo cha khokheipa ta moh aw ei na ta; Phapakipa chyhsa ta eina chakao aw.

⁷ Dôvei hmâhpa chyhsa cha, Ei o chhôh liata pahrâ leipa aw ta; Haipa bie a reihpa chhao, Ei mohmô liata y aw vei.

⁸ Râh liata moleipa zydua cha, My chareih ta pahleipadia aw ei na ta; Hmoparaopa zydua cha, Abeipa khihpi tawhta ei chhawh pathlah aw ei.