HLAZY 10 - Mara Bible RV (BSI)

Moleipazy pahlei nawpa ta thlahchhâna

¹ Hy Abeipa, khazia lâhlapi liata a duah chi ta, Nôpona noh liata nâ nyu tly?

² Moleipazy ta a khotlâh kawpa ta dyhchhiepazy chadai ei ta, Âmo khoheih chôpa liata âmosasyh a pa-ao mawh ei sy.

³ Moleipa cha a palôh khopa a palaikhei ta, Athôhna khohlei khohpa chyhsa ta Abeipa cha chhiesapa ta â heihsai tyh.

⁴ Hmoparaopa apalaina hmia a phaohpa cha, Khazohpa tlua leipa ta, A pachâna zydua liata, “Khazohpa y vei,” a tah tyh.

⁵ Khatino rai ta a lâpizy patlâ ta, Na pachianazy hra cha, Chô lâ a hmô pha leina liata y tlôh ta, A khakhaipazy a pahneisaoh tyh ei.

⁶ A palôh liata, “A chalyu beih aw va na, Chhâ zydua ta chhiena a tyh aw va na,” tah ta.

⁷ A pakah cha chhiesana, dôveina nata tlybaina zy ta bie ta, A paleih ry cha chhoruna nata paraona zy ta a bie.

⁸ Khihzy liata a tyuhpa ta a byhkhâh ta, Moleina hnei leipazy cha anyuna suzy liata thie ta, Baotuhpa hnei leipazy a mo ta â byh tyh.

⁹ Chakeibarôhneipa hawhta chhohbuh hry liata a byupa ta a byh ta, Dyhchhiepazy patu awpa ta a byhpa ta, A sao liata a aopa dyhchhiepazy cha a patu lymâ ei.

¹⁰ A patupazy cha taikhypa ta pazawh ta, A thatlôna ta a papao ei.

¹¹ A palôh liata, “Khazohpa my ha ta, A hmia nyukhâh ha ta, Khati hmahta hmô aw vei,” a tah tyh.

¹² Hy Abeipa, thyu la, Hy Khazohpa, na ku chalo la, Pasataopazy my khah y.

¹³ Khazia moleipa ta Khazohpa a heihsai ta, A palôh liata, “Na pasia bao vei,” a tah tly?

¹⁴ Na hmô mâh tâh, Ruchhôna nata nôchhiena zy ngiapa ta, Na ku liata soh chi ta; Dyhchhiepa ta cha pangai ta, Paw hnei leipa baotuhpa na châ.

¹⁵ Moleipa nata hmoparaopa bâh thlie la, A moleina cha a chhâna taihta paphuahsa mah y.

¹⁶ Abeipa cha chhâzaw nata tlyzaw ta bei châ ta, Phopizy a râh tawhta ama leidia aw.

¹⁷ Hy Abeipa, pasataotuhpazy khopa thei ha chi ta, Ama palôh thapatlôpa ta, Na nah na pachôh aw.

¹⁸ Paw hnei leipa nata tlybaipazy châta adona tao aw chi ta, Chatanachata lei chyhsazy ta pachhipary khao aw veih ei.