Lallaba 2 - Macaafa Qulqulluu Afaan Oromoo

Qannootti Jiraachuun Kan Waa'ee Hin Baafne Ta'uu Isaa

¹ Ani ofii kootii,<<Mee dhaqeen gammachuu qoree, wanta gaariis ilaala!>> jedhee nan ka'e; kunoo, kunis immoo wanta waa'ee hin baafnee dha*;

² <<Kolfi maraatummaa dha, gammachuunis maal namaaf godha?>> nan jedhe*;

³ daadhii wayniitiinis namummaa koo gammachiisuu nan yaade, yaadni garaa koo garuu amma iyyuu ogummaadhaan na geggeessaa jira; ani gowwaa fakkaadhee ilmaan namootaa bara muraasa itti biyya lafa irra jiraatan kanatti wanta gaarii gochuun isaaniif ta'u arguu barbaadeen ture*.

⁴ Ani hojii koo nan bal'ifadhe; manneen nan ijaarradhe, mukkeetii wayniis nan dhaabbadhe;

⁵ iddoo dhaabaa nan tolfadhe, mukkeetiis nan dhaabbadhe; mukkeetii ija garaa garaa godhatanis achi keessa nan dhaabe.

⁶ Mukkeetiin caakkicha keessaa akka ittiin obaafamaniifis kuufama bishaanii achitti nan tolche.

⁷ Garboota dhiiraa fi dubartii nan bitadhe, garboonni manatti dhalatanis jiru; warra ana dura Yerusaalem keessa jiraatan caalaa saawwan baay'ee fi bushaayee baay'ee qabaadheera*.

⁸ Meetii, warqee, badhaadhummaa mootonnii fi warri kutaa biyya garaa garaa bulchan qabaatanis walitti qabadheera; faarfatoota dhiiraa fi dubartii akkasumas saajjatoota ilmaan namootaa itti gammadan baay'een qaba*.

⁹ Warra ana dura Yerusaalem keessa jiraatan caalaas guddadheera, ogummaan koos anuma biratti hafe*.

¹⁰ Wanta iji koo hawwe hundumaa ani hin dhowwanne, garaa koos gammaduu irraa hin dhowwine; wanta ani itti dadhabe hundumaatti garaan koo in gammada, wanta ani itti dadhabe hundumaa keessaa, kun qooda koo ture.

¹¹ Garuu wanta harki koo hojjetee fi wantan itti dadhabe hundumaa gara galee yommuun ilaalu, wanti kun hundinuu waa'ee hin baasu, akka nama qilleensa ari'uu tis; aduu jala wanti bu'aa qabu hin jiru*.

¹² Ani kana irratti ogummaa, maraatummaa, gowwummaas deebi'ee ilaaluutti nan ka'e; namni, mootii tokko booddeedhaan mootii ta'uuf jiru, isa dur hojjetame irra kan caalu maal hojjechuu danda'a ree*>>

¹³ Egaa ifni dukkana irra akkuma caalu, akkasuma ogummaan gowwummaa irra caaluu isaa nan arge;

¹⁴ namni ogeessi yaada guutuudhaan in arga, namni gowwaan garuu, dukkana keessa deddeebi'a; wanti lachuu isaaniitti dhufu garuu tokkichuma akka ta'e hubadheera*.

¹⁵ Egaa,<<Wanti nama gowwaatti dhufu anattis in dhufa erga ta'ee, maaliifan ogeessa ta'e ree?>> jedheen garaa kootti yaade; kana irrattan, <<Kunis immoo wanta waa'ee hin baafnee dha>> jedhe.

¹⁶ Seenaan nama ogeessaa seenaa nama gowwaa irra caalee bara baraan hin yaadatamu; baroonni yommuu darban hundumti isaa in irraanfatama; namni ogeessi attamitti akkuma nama gowwaatti du'a ree*!

¹⁷ Wanti aduu jalatti hojjetamu waan na gaddisiiseefan jireenya jibbe; wanti hundinuu waa'ee hin baasu, akka nama qilleensa ari'uu tis.

¹⁸ Nama isa na booddee dhufuuf dhiisuun giddii waan anatti ta'uufan wantan aduu jalatti itti dadhabee hojjedhe hundumaa jibbe;

¹⁹ namichi sun nama ogeessa yookiis gowwaa ta'uu isaa eenyutu beeka>> Garuu inni wanta ani aduu jalatti itti dadhabee ogummaadhaan hojjedhe irratti gooftaa in ta'a; kunis immoo wanta waa'ee hin baafnee dha*.

²⁰ Kanaafan wanta harki koo aduu jalatti itti dadhabe hundumaaf deebi'ee garaa kutadhe;

²¹ namni tokko ogummaa, beekumsaa fi harka-tolinaan wanta itti dadhabee hojjete hundumaa nama isa hin hojjetiniif dhiisuun giddii itti in ta'a; kunis immoo wanta waa'ee hin baafnee dha, guddaas nama in gaddisiisa;

²² namni wanta aduu jalatti itti dadhabee, garaa isaatiinis itti dhama'u hundumaa keessaa maal argata>>

²³ Barri isaa hundinuu dhiphinaan, wanti inni itti dadhabus gaddaan guutuu dha; halkan illee yaadni isaa boqonnaa hin qabu; kunis immoo wanta waa'ee hin baafnee dha*.

²⁴ Namni nyaatee, dhugee, wanta hojjetettis gammaduun isaaf gaarii dha mitii ree>> Kunis immoo harka Waaqayyoo keessaa akka dhufu nan arge;

²⁵ Waaqayyo biraa yoo ta'e malee, eenyutu nyaachuu yookiis gammaduu danda'a ree*>>

²⁶ Waaqayyo nama isa duratti gaarii ta'eef ogummaa, beekumsa, gammachuus in kenna; isa namni cubbamaan walitti qabee tuule garuu, Waaqayyo nama isa duratti gaarii ta'eef akka inni kennu in godha; kunis immoo wanta waa'ee hin baafnee dha, akka nama qilleensa ari'uu tis*.