Amoos 5 - Macaafa Qulqulluu Afaan Oromoo

Yaada Garaa Akka Geddarataniif Waamuu Isaa

¹ Yaa warra biyya Israa'el, dubbii ani boo'aa isin irratti dubbachuuf ka'u kana dhaggeeffadhaa*!

² Israa'el isheen akka durbaa lafa dhoofteetti, deebitees hin kaatu; biyya ofii ishee keessatti kuftee ciifti, kan ishee kaasus hin jiru.

³ Waaqayyo gooftaanoo, <<Biyya Israa'el keessaa mandarri tokko nama kuma, duulatti yoo baase, isaan keessaa namni dhibbi in hafaaf; mandarri tokko immoo nama dhibba tokko duulatti yoo baase, namni kudhan in hafaaf>> jedheera*.

⁴ Waaqayyo, warra biyya Israa'eliin, <<Ana barbaaddadhaa, jiraadhaas*!

⁵ Iddoo sagadaaf beekaman Bet'elin hin barbaadinaa! Giilgalin hin dhaqinaa! Bersheebaattis hin ce'inaa! Warri Giilgal boojuutti in galu, Bet'el gad deebitee wanta waa'ee hin baafne in taati>> jedha*.

⁶ Egaa Waaqayyoon barbaaddadhaa, jiraadhaas! Kanaa'achi inni akka ibiddaatti mana Yoseef irra in bu'a, xaph in godhas; Bet'el irraa kan dhaamsus hin argamu.

⁷ Isin warra dhugaa namaa dubbii hadhaa'aatti geddartanii, qajeelinas lafatti gattaniif wayyoo*!

⁸ Inni urjoota <<Torbii>> jedhaman, urjoota <<Sadee>> jedhamanis uume, inni dukkana ifa ganamaatti diddiiru, guyyaas dukkaneessee halkan godhu, inni bishaan galaanaa waamee, irra lafaatti lolaasus, maqaan isaa Waaqayyoo dha*!

⁹ Inni isa jabaa irratti badiisa in bobeessa, masaraattis balleeffamuu in fida.

¹⁰ Isin isa wal ga'ii karra dallaa keessatti dhugaadhaaf falmuu in jibbitu, nama dubbii hir'ina hin qabne dubbatus in ciiggaatu*.

¹¹ Isin nama dadhabaa dhidhiittanii bulchitanii, midhaan isaas karaa malee waan irraa fudhattaniif, dhagaa soofamaadhaan mana in ijaarrattu, garuu keessa hin jiraattan; iddoo dhaabaa waynii ija namaa harkisus in qopheeffattu, garuu daadhii waynichaa hin dhugdan!

¹² Isin warri nama qajeelaa cunqursitanii gabbarsuus fudhattanii, nama dhabes firdii akka hin arganne gootan, irra-daddarbaan keessan attam akka baay'atu, cubbuun keessanis attam akka guddatu ani beeka*!

¹³ Kanaafis kun yeroo hamaa waan ta'eef, namni hubataan yeroo akkasiitti calluma in jedha.

¹⁴ Isin akka jiraattanitti wanta gaarii barbaadaa malee, wanta hamaa gochuu hin barbaadinaa! Yoos akkuma isin jettan in ta'a; Waaqayyo gooftaan maccaas dhuguma isinii wajjin in jiraata*.

¹⁵ Wanta hamaa jibbaa, wanta gaariis jaalladhaa! Wal ga'ii karra dallaa keessatti dhugaan jabaatee akka dhaabatu godhaa! Yommus Waaqayyo gooftaan maccaa, sanyii Yoseef keessaa warra hafanitti araara in argisiisa ta'a*.

¹⁶ Amma garuu Waaqayyo gooftaan maccaa gooftichi, <<Wal ga'ii karaa hundumaa irratti in boo'u, karaa jiru hundumaa irrattis, wayyoo! wayyoo! in jedhu; warra qotiisa qotan gaddaaf, boossiftuus boo'ichaaf in waamu.

¹⁷ Iddoo dhaabaa waynii hundumaatti iyyuu boo'ichi in ta'a; ani isin adabuudhaaf isin gidduu waanan darbuuf kun hundinuu isinitti in dhufa>> jedhe; inni kana dubbate Waaqayyoo dha*.

Gar-Malee Amanachuu Israa'el

¹⁸ Isin warra guyyaa Waaqayyoo hawwaan eeggattaniif wayyoo! Guyyaan Waaqayyoo maal isiniif godha>> Inni isiniif dukkanaa'aa dha malee ifaa miti!

¹⁹ Akka nama leenca jalaa utuu baqatuu amaaketi itti dhufutti, isa jalaa ba'ees manatti galee keenyan yommuu qabatu bofni harka isaa iddu in taatu.

²⁰ Guyyaan Waaqayyoo sun ifaa utuu hin ta'in dukkanaa'aa dha mitii ree>> Innoo duumessaa'aa dha aduus hin qabu*.

²¹ Waaqayyo, <<Ani ayyaana ayyaaneffachuu keessan nan jibbe, waa'ee isaas nan dhiise, wal ga'iin keessanis anatti in ajaa'e.

²² Qalma gubamuu fi kennaa midhaanii anaaf yoo dhi'eessitan iyyuu ani itti hin gammadu; horii coccoomoo qalma galataaf dhi'eessitanis ani hin ilaalu.

²³ Iyya faarfannaa keessanii ana irraa fageessaa! Sagalee maseenqoo keessaniis ani dhaga'uu hin barbaadu.

²⁴ Qooda kanaa bulchi qajeelaan akka bishaaniitti, qajeelummaanis akka laga yeroo hundumaa yaa'uutti haa burqu*!

²⁵ <<Yaa warra Israa'el, yeroo lafa onaa keessa waggaa afurtama turtan, qalma, kennaas anaaf dhi'eessitaniittu moo ree*>>

²⁶ Ammas isin waaqayyolii tolfamoo keessan <<Saakuut>> isa akka mootiitti fudhattan, <<Kiiyoon>> isa bifa urjii laattaniifii itti sagaddan ol fudhattanii in baadhattu.

²⁷ Kanaaf ani biyyaa isin baasee mandara Damaasqoo garasitti boojuutti isin nan dabarsa>> jedhee dubbateera; inni immoo maqaan isaa Waaqayyo gooftaa maccaa ti*.