2 ተሰሎኒቄ 3 - Macaafa Qulqulluu Afaan Oromoo

Kadhataa Fi Amanannaa

¹ Kana irraa kan hafes, obboloota nana, dubbiin gooftaa dafee iddoo baay'ee ga'ee, isin biratti akkuma fudhatames, ulfinaan akka fudhatamuuf nuuf kadhadhaa*!

² Nama hundumatu amane miti; kanaaf Waaqayyo harka namoota yakkanii fi hamaa godhanii akka nu oolchuufis immoo kadhadhaa*!

³ Gooftaan garuu amanamaa dha; inni isin in cimsa, isa hamaa sanas isin irraa in eega*.

⁴ Wanta isinitti himne hundumaa akka raawwattan, raawwachuufis akka jirtan karaa gooftaa isin amananneerra*.

⁵ Gooftaan garaa keessan gara jaalala Waaqayyo ittiin nama jaallateetti, gara obsa Kristos argisiiseettis haa qajeelchu!

Hojii Hojjechuun Barbaachisaa Ta'uu Isaa

⁶ Ammas obboloota nana, isin keessaa nama hojjechuu dhiisee dhibaa'ummaatti jiraatu, nama akka barsiisa isa nu biraa argattaniitti hin jiraannettiis hidhata akka hiikkattan, maqaa gooftaa keenya Yesus Kristosiin isin in abboomna*.

⁷ Nuyi yommuu isin bira turre, hojjechuu dhiifnee dhibaa'ummaatti hin jiraanne; isinis fakkeenya keenya duukaa bu'uun hammam barbaachisaa akka ta'e ofii keessanii iyyuu in beektu*.

⁸ Nama tokkotti illee ba'aa akka hin taanef halkanii fi guyyaa hojiitti dadhabnee hojjenne malee, utuu gatii hin baasiniif nama tokko irraa buddeena illee hin nyaanne*.

⁹ Nu ilaaltanii duukaa akka buutaniif fakkeenya isiniif taane malee, ba'aa isinitti ta'uuf iyyuu nuyi karaa dhabne miti*.

¹⁰ Yommuu isin bira turre iyyuu, ?Namni hojii hojjechuu hin barbaanne, midhaanis hin nyaatin!? jennee isin abboomneerra*.

¹¹ Amma immoo isin keessaa kaan hojjechuu dhiisanii dhibaa'ummaatti in jiraatu; ofii isaaniitii waan tokko illee hin hojjetan, hojii namaa keessa lixuu isaanii garuu in dhageenya.

¹² Namoota akkasii kana gab jedhanii akka hojjetan, kan isaaniis nyaatanii akka jiraatan maqaa gooftaa Yesus Kristosiin in abboomna, in gorsinas*.

¹³ Obboloota nana, isin garuu wanta gaarii gochuutti hin laafinaa*!

¹⁴ Nama akka ergaa kanatti dubbii keenyaaf hin abboomamne yaadaan qabadhaa! Akka inni yeella'uttis hidhata isaa ta'uu dhiisaa*!

¹⁵ Akka obboleessaatti isa gorsaa malee immoo, akka diinaatti isa hin ilaalinaa*!

Nagaa Dhaamuudhaan Dubbii Isaa Xumuruu Isaa

¹⁶ Gooftaan nagaa ofii isaatii yeroo hundumaa, karaa hundumaan, nagaa isiniif haa kennu! Gooftaan hunduma keessanii wajjin haa ta'u*!

¹⁷ Ani Phaawulos nagaa koo kana harka kootiin isiniif nan caafa. Akki ani itti caafus akkuma kana; milikkinni inni ittiin beekamu kun ergaa ani caafe hundumaa irra jira*.

¹⁸ Ayyaanni gooftaa keenyaa Yesus Kristos hunduma keessanii wajjin haa ta'u*!