2 ተሰሎኒቄ 2 - Macaafa Qulqulluu Afaan Oromoo

Dhufa Gooftaa Dura Inni Hamaan Sun Bakkeetti Ba'uu Isaa

¹ Ammas obboloota ko, waa'ee dhufa gooftaa keenyaa Yesus Kristosii fi waa'ee isaa wajjin walitti sassaabamuu keenyaa akka beektaniif waanan isin kadhadhu qaba*.

² ?Guyyaan gooftaa ammuma iyyuu dhufeera? kan jedhu, wanta Waaqayyo nutti mul'isee himu keessa, dubbiidhaan yookiis caaffataan akka waan nu biraa ba'eetti isa odeeffamuun yaadni keessan dafee hin raafamin, hin naasifaminaas*!

³ Waaqayyoon mormanii isa irratti ka'uun utuu hin dhufin, inni hamaan seera malee jiraatus ilmi badiisaa sun utuu bakkeetti hin baafamin, guyyaan sun hin dhufu; kanaaf namni tokko karaa kam illee isin hin walaalchisin*!

⁴ Inni bakkeetti baafamuuf jiru sun ol of qabuudhaan Waaqayyo kan jedhamuun, waanuma namni itti sagaduunis in morma; ofuma isaatii Waaqayyo ofiin jechuudhaanis mana qulqullummaa Waaqayyoo keessa taa'umsa in dhaabata*.

⁵ Isa kana utuman isin bira jiruu akkan isinitti hime hin yaadattanii ree?

⁶ Yeroodhuma isaatti akka inni mul'atuuf amma wanti isa ittisu akka jiru in beektu.

⁷ Hamminni inni dhokataan sun kanumaan dura iyyuu hojii irra jira; garuu inni amma isa ittisu hamma karaa isaa duraa fuudhamutti hin mul'atu*.

⁸ Kana booddees inni seera malee jiraatu sun in mul'ata; Yesus gooftaan immoo hafuura afaan isaa keessaa ba'uun isa in ajjeesa; mul'inatti deebi'ee dhufuu isaatiinis isa in barbadeessa*.

⁹ Inni seera malee jiraatu kunis gochaa Seexanaatiin wanta hojii aangoo, milikkitootaa fi dinqii fakkaataniinis in dhufa*.

¹⁰ Warri baduuf jiran hundinuu immoo fayyuudhaaf dhugaa jaallatanii fudhachuu waan didaniif, gowwoomsaa hamminaa hundumaa isaan irratti in fida*.

¹¹ Kanaafis Waaqayyo, wanta dhugaa hin ta'in akka amananiif gochaa nama wallaalchisu isaanitti in erga*.

¹² Warra jal'inatti gammadanii dhugicha hin amanne hundumaatti akka faradamu in godha*.

Isin Fayyinaaf Fo'amtan Jechuu Isaa

¹³ Obboloota warra gooftaadhaan jaallatamtanii, hafuuraan qulqulleeffamuudhaan, dhugichattis amanuudhaan akka fayyitaniif Waaqayyo warra jalqabaa godhee waan isin fo'ateef, nuyi waa'ee keessaniif yeroo hundumaa Waaqayyoon galateeffachuun nuuf in ta'a*.

¹⁴ Ulfina gooftaa keenya Yesus Kristos isinis akka argattanitti inni karaa wangeela isa nuyi isiniif fidne kanatti isin waame*.

¹⁵ Egaa obboloota nana, barsiisa, dubbii afaaniitiin yookiis ergaa caaffataatiin, nu biraa isinitti darbetti qabamaatii jabaadhaa dhaabadhaa*!

¹⁶ Ammas gooftaan keenya Yesus Kristos Waaqayyo abbaan keenyas inni nu jaallate, ayyaana isaatiinis jajjabina bara baraa fi abdii gaarii nuuf kenne*.

¹⁷ Innumti garaa keessan haa jajjabeessu, hojii gaarii fi dubbii gaarii hundumaattis isin haa cimsu*.