2 ሳሙኤል 5 - Macaafa Qulqulluu Afaan Oromoo

Daawit Israa'el Irratti Mootii Ta'uu Isaa

¹ Kana booddee gosoonni Israa'el hundinuu Kebroonitti Daawit bira dhufanii,<<Kunoo, nuyi dhiiga kee ti, foon kee tis;

² yeroo darbetti, utuma Saa'ol mootii keenya ta'ee jiruu iyyuu, Israa'eloota gara duulaatti bobbaasee kan galchu si ture; Waaqayyos,<<Saba koo Israa'elin situ geggeessa, situ isaan bulchas>> siin jedheera>> ittiin jedhan*.

³ Jaarsoliin Israa'el hundinuu Kebroonitti Daawit mooticha bira yommuu dhufan, Daawit isaanii wajjin fuula Waaqayyoo duratti kakaadhaan walii gale; isaanis Israa'el irratti mootii akka inni ta'uuf isa in diban*.

⁴ Daawit yommuu mootii ta'e, nama waggaa soddomaa ture; waggaa afurtama immoo in mo'e.

⁵ Inni Kebroon keessa taa'ee, waggaa ja'aa fi ji'a ja'a Yihudaa irratti in mo'e; Yerusaalem keessa taa'ee, waggaa soddomii sadii guutummaa Israa'el irratti, guutummaa Yihudaa irrattis in mo'e*.

Daawit Mandara Yerusaalem Qabachuu Isaa

⁶ Yommus Daawit mootichi namoota isaa wajjin Yibusoota mandara Yerusaalem keessa jiraatan loluudhaaf itti in duule; Yibusoonni immoo,<<Daawit mandara kana mo'ee qabachuu hin danda'u>> jedhanii waan yaadaniif,<<Ati asitti hin galtu, warri jaamaanii fi warri naafti iyyuu of irraa si in deebisu>> ittiin jedhan*;

⁷ haa ta'u iyyuu malee, Daawit masaraa Xiyoon in qabate; iddoon kun ergasii<<Mandara Daawit>> jedhamtee beekamte.

⁸ Gaafas Daawit namoota isaatiin,<<Namni Yibusoota warra naafa, warra jaamaa, warra ani ijumaan arguu jibbu kana rukutuu barbaadu karaa jal'isii bishaanii haa ba'u!>> jedhe; kanaaf namoonni boodana,<<Warri jaamaanii fi warri naafti mana qulqullummaatti ol hin galan!>> jedhan.

⁹ Yommus Daawit masaraa isa qabate sana keessa in jiraate; kanaaf iddoo kana,<<Mandara Daawit>> jedhee moggaase; inni lafa <<Miiloo>> jedhamu kaasee gara keessaatti masaraa mandaraa jabeessee in ijaare.

¹⁰ Waaqayyo gooftaan maccaa isaa wajjin waan tureef, Daawit ittuma fufee jabaachaa in adeeme*.

¹¹ Yeroo kana Hiiraam mootiin Xiiros dhaabaa muka gaatirraa, namoota muka soofanii fi namoota dhagaadhaan mana ijaaran namoota isaatii wajjin Daawitiif in erge; isaanis mana mootummaa in ijaaraniif*.

¹² Daawit saba Israa'el irratti mootii akka ta'uuf Waaqayyo isa in cimse; saba isaa Israa'eliif jedhees mootummaa isaa in guddise; Daawitis kana in hubate.

¹³ Daawit mandara Kebroon dhiisee Yerusaalemitti erga galee booddee, achitti saajjatootaa fi dubartoota dabalee in fuudhe; dabalees ilmaanii fi intaloota in godhate*.

¹⁴ Maqaan ilmaan isaa warra inni Yerusaalemitti godhatee kanatti fufee jira; isaanis Shaamuwaa, Shobaab, Naataan, Solomoon*,

¹⁵ Yiibhaar, Eliishuwaa, Nefeg, Yaafii'aa,

¹⁶ Eliishaamaa, Eliyaadaa fi Eliifelex turan.

Daawit Filisxeemota Mo'uu Isaa

¹⁷ Daawit dibamee guutummaa Israa'el irratti moosifamuu isaa warri Filisxeem yommuu dhaga'an, hundumti isaanii isa qabachuudhaaf ol in ba'an; Daawit immoo kana dhaga'ee, gara iddoo da'oo jabaa qabutti gad in bu'e.

¹⁸ Filisxeemonni yommus dhufanii dachaa Refaa'iim keessa tamsa'anii iddoo in qabatan.

¹⁹ Yommus Daawit,<<Warra Filisxeem kanatti duuluu>> Ati harka koo keessa isaan in buuftaa?>> jedhee Waaqayyoon in gaafate; Waaqayyo immoo,<<Ani raawwadhee Filisxeemota harka kee keessa buuseeraatii, itti duuli!>> jedheen*.

²⁰ Daawitis gara Ba'aal-Pheraaziim dhaqee, achitti Filisxeemota rukutee in mo'e; kanaafis Daawit,<<Akkuma bishaan manii isaa cabsee yaa'u akkasuma Waaqayyo fuula koo duraa diinota koo in caccabse>> jedhe; kana irratti maqaa iddoo sanaa <<Ba'aal-Pheraaziim>> jedhee in moggaase; [<<Ba'aal-Pheraaziim>> jechuun <<Waaqayyo caccabsaa dha>> jechuu dha.]

²¹ Warri Filisxeemis waaqayyolii tolfamoo isaanii achitti dhiisanii in baqatan; Daawitii fi namoonni isaa waaqayyolii sana fuudhanii in adeeman.

²² Filisxeemonni ammas Daawititti duuluudhaaf deebi'anii dachaa Refaa'iim keessa tamsa'anii iddoo in qabatan.

²³ Yommus Daawit ammoo Waaqayyoon in gaafate; innis deebiseefii,<<Kallattiidhaan isaanitti ol hin ba'in, karaa fuullee mukkeetii qilinxoo naanna'iitii dugda isaanii duubaan isaanitti dhaqii isaan rukuti!

²⁴ Sagalee faana duulaa bantii qilinxoowwan sana irraa yommuu dhageessu, ani Waaqayyo loltoota Filisxeemotaa rukutuudhaaf fuula kee dura bu'uu koo waan ta'eef, garaa kutadhuutii itti ka'i!>> jedhe.

²⁵ Daawit akkuma Waaqayyo isa abboome in godhe; inni Giibe'onii kaasee hamma Gezeritti loltoota Filisxeem duukaa bu'ee in rukute*.