1 ሳሙኤል 2 - Macaafa Qulqulluu Afaan Oromoo

Haannaan Galata Dhi'eessuu Ishee

¹ Yommus Haannaan kadhata ishee keessatti, <<Waaqayyo ulfina waan anaaf kenneef, Garaan koo isatti in gammada; inni waan na gargaareef, ani diinota koo irratti ofan jaja.

² Yaa Waaqayyo, qulqulluun akka keetii tokko illee hin jiru; si malees kan biraa hin jiru; akka Waaqayyo keenyaas kattaa kan namaaf ta'u hin jiru.

³ Of tuulummaa keessan hin baay'isinaa! Of jajuunis afaan keessan keessaa hin ba'in! Waaqayyo gooftichi beekaa dha! Hojii namoota hundumaas miijana irra kaa'ee in ilaala.

⁴ Iddaan warra jajjaboo in caba, warri dadhaboonni garuu humna isaan jabeessu in hidhatu.

⁵ Egaa warri quufoo turan buddeenatti of gurguraniiru, warri beela'aa turan garuu si'achi hin beela'an; dubartiin isheen dhabduun ijoollee torba deesseetti; haati ijoollee baay'ee garuu gadda irraa kan ka'e laabbofteetti*.

⁶ <<Waaqayyo in ajjeesa, in jiraachisas; gara iddoo lafa jalaatti gad in buusa, achi keessaas ol in baasa*.

⁷ Waaqayyo nama in deegsa, in badhaasas; inni nama gad in deebisa, olis in qaba*.

⁸ Inni hiyyeessota awwaara keessaa in kaasa, warra dhaboos tuullaa kosii keessaa ol in kaasa; gurguddootaa wajjin isaan in teessisa, teessoo ulfinaas akka isaan dhaalan in godha; utuboonni lafaa kan Waaqayyoo ti, inni utuboota sana irra biyya lafaa in kaa'e*.

⁹ Waaqayyo miilla namoota isaaf of kennanii in eega; warri jal'oonni garuu dukkana keessa in balleeffamu; namni humna isaatiin mo'icha hin argatu*.

¹⁰ Waaqayyo waaqa irraa isaanitti in qaqaweessa'a, warri isaan morkatanis in hurreeffamu; inni daariidhaa hamma daariitti biyya lafaatti in farada; isa ofii dibee moosiseef garuu humna in kenna, ulfina Masiihii isaatiis ol in kaasa>> jette*.

¹¹ Ergasii Elqaanaan gara Raamaatti deebi'ee mana isaatti in gale; Saamu'el mucichi garuu Elii lubicha biratti hafee Waaqayyoof hojjechaa ture.

Ilmaan Elii Warra Waa'ee Hin Baafne Lamaan

¹² Ilmaan Elii Waaqayyoon kan hin beekne, namoota waa'ee hin baafnes turan;

¹³ akka isaan amala godhatanitti, yeroo namoonni aarsaa qalmaa dhi'eessanitti foonichi affeelamaa utuu jiruu, hojjetaan luba tokkoo filoo mataa sadii qabu fudhatee in dhufa.

¹⁴ Filoo sanaanis beddee keessaa yookiis huuroo keessaa yookiis okkotee keessaa yookiis xuwwee keessaa waraanee foonicha in fuudha, hamma filoon sun fuudhe hundumaas lubichaaf in geessa ture; namoota Israa'el warra gara Shiiloo dhufan hundumaa akkuma kana godhanii in rakkisu turan.

¹⁵ Kana duwwaas utuu hin ta'in moorri qalma sanaa gubamee utuu hin aarfamin iyyuu hojjetaan lubichaa dhufee namicha aarsaa dhi'eessuun,<<Lubichi foon affeelamaa si harkaa waan hin fudhanneef, ani isaaf nan waadaatii, foon dheedhii anatti kenni!>> jedha.

¹⁶ Yommuu namichi,<<Akka seeraatti dura moorri isaa gubamee haa aarfamu! Isa booddee hamma garaan kee barbaade in fudhatta>> ittiin jedhutti, hojjetichi immoo,<<Waawuu! Amma anatti kenni malee, yoo diddes humnaanan fudhadha>> jedhaan.

¹⁷ Aarsaa namoonni Waaqayyoof dhi'eessan waan salphisaniif, cubbuun ilmaan Elii Waaqayyo duratti sonaan guddaa in ta'e*.

Saamu'el Hojii Waaqayyoo Keessatti Guddachuu Isaa

¹⁸ Saamu'el mucichi dirata fuula duraa isa quncee talbaa irraa hojjetame diratee Waaqayyoof in hojjeta ture.

¹⁹ Haati isaas wagguma waggaan aarsaa dhi'eessuudhaaf abbaa manaa ishee wajjin yommuu ol baatutti, uffata ba'eessa irra keessatti uffatan xinnaa tokko qopheessitee in geessitiif turte.

²⁰ Eliin immoo Elqaanaa fi haadha manaa isaa eebbisee,<<Waaqayyo qooda mucaa isa Haannaan galchii gootee isumaaf kennitee isheedhuma irraa dhala siif haa kennu!>> jedheen; kana booddee isaan gara mana isaaniitti in deebi'an.

²¹ Ammoo Waaqayyo Haannaa in yaadate; isheen in ulfoofte, dabaltees ilmaan sadii fi intaloota lama in godhatte; Saamu'el mucichi immoo hojii Waaqayyoo keessatti in guddate.

²² Eliin yeroo sanatti baay'ee dulloomee ture; inni waanuma ilmaan isaa namoota Israa'el hundumaa irratti hojjetan, dubartoota balbala dunkaana itti walga'aniitii hojjetan bira akka ga'anis dhaga'ee,

²³ <<Namoota hundumaatii waa'ee hojii keessan isa hamaa nan dhaga'a; maaliif waan akkasii hojjettu>>

²⁴ Yaa ijoollee ko! Waa'ee saba Waaqayyoo karaa irraa kaachisuu keessanii kanan dhaga'u kun gaarii miti;

²⁵ namni nama tokko yoo yakke Waaqayyotu gidduu gala, namni yoo Waaqayyoon yakke garuu eenyutu gidduu gala ree?>> jedheen; ilmaan isaa garuu, sababii Waaqayyo isaan ajjeesuu barbaadeef abbaa isaaniitiif hin dhageenye.

²⁶ Saamu'el mucichi Waaqayyoof namoota irraa ayyaana argachaa, namummaadhaan guddachaa in adeeme*.

Maatii Elii Irratti Raajiin Dubbatamuu Isaa

²⁷ Yommus namni Waaqayyoo tokko gara Elii dhufee, ergaa Waaqayyoo isatti hime;<<Waaqayyo,<<Sanyiin abbaa keetii biyya Gibxii, harka Fara'oon jala yommuu turan, ani isaanitti mul'adheera mitii ree>>

²⁸ Abbaa kee luba akka anaaf ta'uuf iddoo aarsaa kootiitti ol ba'ee ixaana akka aarsuuf, dirata fuula duraas diratee ana duratti akka argamuufan gosa Israa'el hundumaa keessaa isa fo'adhe; akkasumas waan Israa'eloonni qalma gubamuuf dhi'eessan hundumaa sanyii abbaa keetiif nan kenne*.

²⁹ Atii fi ilmaan kee garuu aarsaadhaaf kennaa sabni koo godoo koo keessatti akka anaaf dhi'eessan abboommadhe maaliif salphiftan>> Ilmaan kee kennaa sabni koo anaaf dhi'eessan keessaa isa hundumaa caaluun foon isaanii akka gabbifataniif cal jettee maaliif ana caalaa isaaniif ulfina kennite?

³⁰ << <Ani Waaqayyo gooftichi Israa'el:- Dhuguma sanyiin kee, sanyiin abbaa keetiis yeroo hundumaa ana dura deddeebi'anii anaaf in hojjetu jedheen ture; si'achi garuu akkas hin ta'u; warra ulfina anaaf kennaniif ulfina nan kenna, warra na tuffatan immoo nan salphisa.

³¹ Kunoo, sanyii kee fi sanyii abbaa keetii keessaa jaarsi akka hin argamneef, yeroon ani itti ol adeemaa kee hundumaa karaatti hambisu in dhufa*.

³² Bara baraan sanyii kee keessaa namni jaarsomu hin argamu; ati immoo akka diinaatti ilaaltee wanta ba'eessa Israa'elootaaf godhamutti in hinaafta.

³³ Nama kee keessaa inni ani iddoo aarsaa kootiitii akka inni hojjetuuf hambisu iji kee akka dadhabuuf garaan kees akka gadduuf sababii sitti in ta'a; siif kan dhalatu hundinuu ijoollummaadhaan in du'a.

³⁴ Kanaafis ilmaan kee lamaan Hofnii fi Fiinehaas guyyaa tokkotti in du'u; kunis milikkita siif in ta'a*.

³⁵ Anis luba amanamaa isa wanta ani garaa kootti yaadu hojjetu nan kaafadha; inni yeroo hundumaa mootii ani dibee moosise duratti in hojjeta; ani immoo mana sanyii isaa jabeessee nan dhaaba.

³⁶ Yommus sanyii kee keessaa warri hafan gara lubichaa dhufanii in qoomma'uuf; adduma addaanis meetii yookiis buddeena isa in kadhatu; itti dabalaniis, hadaraa, cabaadhuma buddeenaa illee akka ittiin nyaannuuf hojii lubummaatti nu galchi jedhanii isa in kadhatu>> jedha>> jedhe.