1 ቆሮንቶስ 2 - Macaafa Qulqulluu Afaan Oromoo

Kristosin Isa Fannifame Duwwaa Beekuu

¹ Yaa obboloota ko! Ani yeroon gara keessan dhufe, namoota kan biraa caalaatti dubbachuudhaan yookiis ogummaa argisiisuudhaan, dhoksaa Waaqayyoo isinitti lallabaa hin dhufne*.

² Hamman isin bira turettis Yesus Kristos, isa fannifame sana duwwaa beekuu koo akkan mul'isuuf murtoo godheen ture*.

³ Ani dadhabbii, sodaadhaa fi rom'a baay'eedhaanan isin bira ture*.

⁴ Dubbiin afaan koo, lallabni koos humnii fi hafuurri Waaqayyoo akka na keessa jiru argisiise malee, dubbii ogummaa namaa keessaa ba'een amansiise miti*.

⁵ Egaa amantiin keessan humna Waaqayyoo irra malee ogummaa namaa irra hin dhaabanne*.

Ogummaa Waaqayyoo

⁶ Haa ta'u iyyuu malee, ogummaa bara si'anaa, yookiis ogummaa warra biyya lafaa kana seerratanii, ofiis golgolaa'uuf jiranii, yoo ta'uu dhabaate iyyuu, warra bilchaatan keessatti immoo dubbii ogummaa in dubbanna.

⁷ Nuyi dubbii dhoksaa ogummaa Waaqayyoo isa hin beekamin ture sana dubbanna; Waaqayyo ulfina isaa irraa akka hirmaannuuf uumamuu biyya lafaa dura ogummaa sana yaadee qopheesse*.

⁸ Warra biyya lafaa kana seerratan keessaa tokko iyyuu ogummaa kana hin hubanne; utuu hubataniiru ta'ee, gooftaa ulfinaa hin fannisan turan*.

⁹ Caaffata qulqullaa'oo keessatti, ?Waan Waaqayyo warra isa jaallataniif qopheesse, ijji namaa hin argine, gurri namaa hin dhageenye, yaadni namaas bira hin geenye? in jedha*.

¹⁰ Waaqayyo garuu hafuura qulqulluudhaan isa kana nutti mul'ise; hafuurri qulqulluun waan hundumaa, yaada Waaqayyoo isa gad fagoo iyyuu qoree bira in ga'a*.

¹¹ Waan yaada namaa keessa jiru, hafuuruma namicha keessa jirutu beeka malee, namni biraa beekuu hin danda'u; akkasumas hafuura Waaqayyoo malee, eenyu illee yaada Waaqayyoo hin hubatu.

¹² Ammas nuyi kennaa isa Waaqayyo biraa nuuf kenname beekuudhaaf, hafuura isa Waaqayyo biraa dhufe fudhanne malee, hafuura biyya lafa kanaa hin fudhanne*.

¹³ Kanaafis nuyi dubbii hafuuraa warra hafuuricha argataniif waan hiiknuuf, isa dubbannu barsiisa hafuurichaatiin malee, barsiisa ogummaa namaatiin hin dubbannu*.

¹⁴ Namni hafuuricha hin argatin, kennaa hafuura Waaqayyoo hin fudhatu; kennaan sun isatti gowwummaa dha. Kennicha gargar baasee shallaguudhaaf iyyuu hafuuricha qabaachuu waan barbaachisuuf, isa hubachuu hin danda'u*.

¹⁵ Namni hafuuraa waan hundumaa shallaga, isa garuu namni tokko iyyuu hin shallagu*.

¹⁶ Caaffanni qulqullaa'aan, ?Eenyutu yaada gooftichaa beeka? Eenyutus isa gorsuu danda'a?? jedha. Nuyi garuu yaada Kristos qabna*.