Macitilo 9 - Mapangano Alomba 1923

¹ LOMBA Saulo nteleka kwafuzila asambili a Asikuru kuyofya nopululusya; echiya ku mkuru wa ansembe

² nosenga kwake tulata aye nato ku Damasko ku masunagoge, kuti akayofwanga ayake a Njira ila, kano analume kano anakazi, aze naŵo ŵomangiwa ku Yerusalemi.

³ Nipo yenzepo penzekuya mnjira epanamila ku Damasko: lomba kovurumukizya kwisakata nomzinga kuŵala kufumila kumulu:

⁴ naye echiwa pansi echimvwa lizu lenzomnenera, Saulo, Saulo, unizuzyiranji?

⁵ Echiti, Nimwe ŵani, Asikuru? Naye enena, Nine Yesu uuzuzya:

⁶ lomba uka ukaloŵe mmunzi, ninga chikanenewe kwako chamene chiuti wochita.

⁷ Naŵo ŵantu enzompelekezya epanama nuu, elimvwa lizu ŵosaŵona muntu.

⁸ Nipo Saulo eima pansi: akazuliwe menso ŵake aliyoŵona kantu; naŵo emkatilila kwanja echiya naye ku Damasko.

⁹ Naye enze nsiku zitatu wosaŵona, ntenzekulya na kumwa.

¹⁰ Lomba enzepo msambili umbi pa Damasko zina lake Ananiya; Asikuru emnenera mmensompenya, Ananiya. Naye echiti, Ŵonani, nili pano, Asikuru.

¹¹ Asikuru emuuzya, Ima, nkoya ku mseo woitiwa Wolungama, nokonsha mng'anda ya Yuda zya muntu zina lake Saulo, wa ku Tarso: pakuti ŵona, osenga;

¹² waŵona muntu zina lake Ananiya oloŵamo nomsintilila manja kuti alole soti.

¹³ Sembe Ananiya eyasuka, Asikuru, nikumvwa kwa anyinji zya uyu, mwechiŵachitira viipa vinyinji asanto ŵanu a ku Yerusalemi:

¹⁴ na pano kumo ana upinguzi wa akuru a ansembe womanga ŵonse oita zina lanu.

¹⁵ Sembe Asikuru emuuzya, Nkoya: pakuti uyo ni chiya chosaluliwa changu, choula zina langu pa menso pa Mitundu na mafumu na ŵana a Israeli:

¹⁶ nane nize nimlangizye mazuzyo aŵo anyinji ŵati azatamanishiwe naŵo chikomo cha zina langu.

¹⁷ Nipo Ananiya echiya eloŵa mng'anda; pomsintilila manja echiti, Saulo mkwasu, Asikuru Yesu emuŵonekerani mnjira imwenzozamo wanituma kuti mulole soti nozula Mzimu Mtuŵa.

¹⁸ Lomba pano apa efumamo mmenso mwake nga ni mamba, naye elola soti; nipo eima nobatiziwa;

¹⁹ eula chakulya nochizyiwa. Naye enze masiku ŵambi pamo na asambili enze ku Damasko.

²⁰ Lombalomba mmasunagoge eŵirizya Yesu kuti ni Mwana wa Mlungu.

²¹ Naŵo ŵonse emumvwa ezuzuka echiti, Uyu mwati nti uyo enzopululusya mu Yerusalemi amene ŵala enzoita zina ili? naye echiza kuno lona kuti aye naŵo ŵomangiwa kwa akuru a ansembe.

²² Sembe Saulo mpamvu yake ikula ngako, eŵazuvyazuvya Ayuda enzonkala pa Damasko, kolongosola kuti uyu ni Kristo.

²³ Nipo zikasile nsiku zinyinji Ayuda eyeruzyana kuti ampaye:

²⁴ sembe chiŵembu chaŵo chiziŵikwa kwa Saulo. Ŵeve ŵenzolindila pa milyango soti usiku na mzuŵa kuti ampaye:

²⁵ sembe asambili ŵake emuula usiku, empuzya pa linga nomsisya mchilwanga.

²⁶ Naye akafwike ku Yerusalemi esakolikungumizya kwa asambili, naŵo ŵonse emuyopa ŵosazomera kuti ni msambili.

²⁷ Lomba Barnaba emuula echiya naye kwa apostolo noŵalululira mwechimuŵonera Asikuru pa njira, na kuti elaŵira naye, na mwechiŵirizyira kokaŵalala mzina la Yesu pa Damasko.

²⁸ Enze naŵo pamo kuloŵa nofuma pa Yerusalemi,

²⁹ noŵirizya kokaŵalala mzina la Asikuru: elaŵira nosusyana na a Chihellene, naŵo echiti timpaye.

³⁰ Nipo akaziŵe akwaŵo echiya naye kusikira ku Kaisariya, nomsuzulira ku Tarso.

³¹ Teti eklezya ya mvitwa vyonse vya Yudaya na Galilaya na Samariya yenze na mtendere notang'ishiwa; nayo poyendayenda mkumuyopa Asikuru na mkumyalalikiwa kwa Mzimu Mtuŵa ikula.

³² Nipo yenzepo potantamo Petro mmalo mmalo echiya soti kwa asanto enzonkala pa Luda.

³³ Efwanga palapa chite zina lake Eneya wamene enze kalalilo pa malili vyaka visano na vitatu, pakuti enze na manjenje.

³⁴ Petro emnenera, Eneya, Yesu Kristo okupozya: uka uyanzule vya pa malili ŵako. Lomba pano euka.

³⁵ Naŵo ŵonse enzonkala pa Luda na mSarona emuŵona nomyarukira Asikuru.

³⁶ Lomba enzepo pa Yoppa msambili umo zina lake Tabita, ni kulongosola kuitiwa Dorika: mwanakazi uyu enze na milimo inyinji iweme na vyachitinti vyechichita.

³⁷ Nipo yenzepo mmasiku ŵala elwala na kufwa: naŵo akamsuke emsunga mchipinda cha pamulu.

³⁸ Nipo pa Luda pepenze pafupi na pa Yoppa asambili pakumvwa kuti Petro ali pamene emtumira ŵantu aŵiri emtetelela, Msalembuka kuza kwasu.

³⁹ Naye Petro eima echiya naŵo pamo. Nipo akaze ŵekwera naye ku chipinda icho cha pamulu: na anakazi ŵonse ŵofwilwa enzepeneme pamo naye nolila, nolangizya vyovwinikila na minjira vyechitima Dorika peenze naŵo pamo.

⁴⁰ Sembe Petro eŵafumya ŵonse, efukama nolomba; naye akachungulukile chitanda echiti, Tabita, uka. Naye etunama; lomba akamuŵone Petro euka enkala.

⁴¹ Yeve emtambikizizya kwanja kwake nomuusya; nipo eita asanto na anakazi ŵofwilwa noŵapa wamoyo.

⁴² Ichi chiŵirikila pa Yoppa ponse: na anyinji ezomera pa Asikuru.

⁴³ Nipo yenzepo kuti enkala masiku anyinji ku Yoppa kwa chite Simoni wopuka mikupo.