Macitilo 8 - Mapangano Alomba 1923

¹ SAULO naye enzozomerezyana pa imfwa yake. Lomba wiuka siku lamene lila mkululusyo ukuru pa eklezya yenze mu Yerusalemi; naŵo ŵonse echulunganyiwa mdera la Yudaya na la Samariya, sembe apostolo yai.

² Nipo ŵantu a ulambilo emuŵika Stefano nomlilila kwene kantu.

³ Sembe Saulo eilofya eklezya, eloŵa mng'anda na mng'anda eŵakulika analume na anakazi noŵaika mkambolimboli.

⁴ Teti ŵala amene echulunganyiwa ezungulila ponseponse noliŵirizya lizu.

⁵ Na Filipo esika ku munzi wa Samariya noŵaŵilila mbila ya Kristo.

⁶ Maumba naŵo eteya matu na mtima umo ku vinenewa na Filipo, apo pechimvwa, noviŵona viziŵikwilo vyechichita.

⁷ Pakuti anyinji a aŵo ŵenze nayo mizimu ya lunsa ifuma mwaŵo nolila nkonde: anyinji naŵo a manjenje na ŵolemala epoleshewa.

⁸ Nipo mmunzi mula mwenze chimango chikuru.

⁹ Lomba enzemo muntu zina lake Simoni, wamene kale mmunzi enzochita mayere noŵakanganisya a mtundu wa ku Samariya nonena kuti ni ngana mkuru:

¹⁰ uyo wechiteyera matu ŵonse ŵala chitatikile atonto mpaka akuru echiti, Uyu muntu ni mpamvu ya Mlungu ila yoitiwa Ikuru.

¹¹ Naŵo emteyera matu chifukwa nsita ikuru enzoŵakanganisya na mayere ŵake.

¹² Sembe apo pechimzomera Filipo enzoŵirizya utumi uweme wofumu wa Mlungu na zina la Yesu Kristo ebatiziwa, analume na anakazi.

¹³ Na Simoni mwine ezomera: akabatiziwe enkala na Filipo; naye poŵona viziŵikwilo na vyampamvu vikuru vuchitika ezuzuka.

¹⁴ Lomba apo apostolo enze pa Yerusalemi akamvwe kuti a ku Samariya elipokera lizu la Mlungu eŵatumira Petro na Yohana:

¹⁵ amene ŵala akasikireko eŵalombera kuti apokeko Mzimu Mtuŵa:

¹⁶ pakuti akali wosaŵaponera yeka umo: ebatiziwa tyala mzina la Asikuru Yesu.

¹⁷ Pamene apo eŵasintilila manja, naŵo epokako Mzimu Mtuŵa.

¹⁸ Naye Simoni pechiŵona kuti Mzimu Mtuŵa epewa na maikilo a manja a apostolo esakoŵapa ndalama

¹⁹ echiti, Nipekoni nane upinguzi uyu wakuti ali wonse unti nisintilile manja apokeko Mzimu Mtuŵa.

²⁰ Sembe Petro enena naye, Ndalama yako naichenekeke pamo nawe, pawati uchipoke chabule cha Mlungu na ndalama.

²¹ Uliye chitwa cholondolera pa mlandu uno: pakuti mtima wako suli uweme pa menso pa Mlungu.

²² Teti wolapa ichi chiipa chako, nomsenga Asikuru angalekelewe kwako kaya malingililo a mu mtima mwako.

²³ Chifukwa nuŵona kuti uli pa nsangolulu yolula na pa chomangila cha mpulupulu.

²⁴ Simoni eyasuka echiti, Munisengere mweo kwa Asikuru kasanizila kantu ka ivi vyamwanena.

²⁵ Nipo ŵeve akachite untoni nolilaŵira lizu la Asikuru ewerera ku Yerusalemi noiŵirizya evangelo ku minzi inyinji ya Asamariya.

²⁶ Sembe malaika wa Asikuru enena naye Filipo echiti, Ima uye dera la ku kampambe ku njira yufumira ku Yerusalemi kusikira ku Gaza, iyo ya mmalambo.

²⁷ Naye eima echiya: nipo ŵonani, muntu wa ku Etiyopiya, mntungu ana nsaka ikuru kwa Kandake mfumukazi yaŵo a ku Etiyopiya, chisunga wa chuma chake chonse, echiza ku Yerusalemi kulambila;

²⁸ wamene uyu enzowerera na kuŵankezi mngolo yake, enzopenda mwa Isaya muŵirizi.

²⁹ Mzimu enena na Filipo, Uvwendere kwake, ukwere nawe mngolo iyi.

³⁰ Naye Filipo emuutukira emumvwa enzopenda mwa Isaya muŵirizi echiti, Mwati muziŵa chimupenda?

³¹ Yeve enena, Niziŵe syani, paniliye wonitangulila? Naye emtetelela Filipo kukwerapo nonkala naye.

³² Lomba pa malembo penzopenda penze apa, Euliwa nga ni mbelele konyemera; Nga ni umo kambelele pa menso pa wosesa usako mkalili nuu, Tetyo naye ni mwasapambanulila kanwa:

³³ Posishiwa kwake upinguzi wake wilondewa: Luko lwake ati azalilulule ni ŵani? Chikomo moyo wake ululondewe ku charo.

³⁴ Mntungu naye emyasuka Filipo kuti, Napapata, nga muŵirizi elaŵira teti zya ŵani? zya mwine kansi, kano zya mumbine?

³⁵ Nipo Filipo epambanula kanwa etatikira pa malembo apa nomuŵirizyira Yesu.

³⁶ Naŵo penzekuya mnjira efwika ku manzi akuti; mntungu echiti, Ŵonani manzi; chunilesya kubatiziwa ni chinji? [

³⁷ Naye Filipo echiti, Kati muzomera na mtima wanu wonse, mkumeko. Yeve eyasuka echiti, Nuzomera kuti Yesu Kristo ni Mwana wa Mlungu.]

³⁸ Naye esuzula ngolo ipaname: naŵo ŵonse aŵiri esikira mmanzi, Filipo na mntungu; naye embatiza.

³⁹ Lomba akatumpuke mmanzi Mzimu wa Asikuru emsompola Filipo; naye mntungu aliyomuŵona soti, pakuti enzekuya mnjira nosekelela.

⁴⁰ Sembe Filipo eŵoneka pa Azoto: nipo popitilila eiŵirizya evangelo ku minzi yonse mpaka pechifwika ku Kaisariya.