Macitilo 7 - Mapangano Alomba 1923

¹ MKURU wa ansembe echiti, Kansi ivi viri teti?

² Naye echiti, Akwasu na ausu wasu, imvwani. Mlungu wa mchinzi emuŵonekera ausu wasu Abrahamu peenze mMesopotamiya pakaliyonkazikika pa Kara,

³ echiti kwake, Fumapo pa charo chako na pa akwanu, iza ku charo chinti nkulangizye.

⁴ Pamene apo efumapo pa charo cha Akaldayo echizonkazikika pa Kara: nipo akafwe awisi Mlungu emfumyako kwamene kula emnyezizya ku charo chino chimunkalamo lomba:

⁵ ntempa upyani mwamene mula yai, chukanga pokanda lwayo lwake: epangana naye kumpa chamene chila kuŵa chake, na ku mbuto yake pavuli pake, apo pakaliye mwana.

⁶ Mlungu elaŵira tetino kuti mbuto yake yakuzuŵaila mcharo cha chilwendo, na ŵantu akoŵachisya ukapolo noŵachitira viipa virimika myanda ine.

⁷ Mtundu nawo uzoŵachisye ukapolo nize niupingule, echiti Mlungu: pavuli pake ninga afumemo nonitumikila pa malo apa.

⁸ Naye empa mapangano a chisirimuko: teti Abrahamu evyala Isake nomsirimula nsiku yakasano na katatu; Isake evyala Yakobo, na Yakobo evyala amausu wasu ŵala kumi na aŵiri.

⁹ Naŵo amausu wasu ŵala pomchitira Yosefe tima emsitisya ku Egupto: na Mlungu enze naye pamo,

¹⁰ empokesya mmazuzyo ŵake ŵonse, empa chisomo na nzeru pa menso pa Faraŵo mfumu ya Egupto; naye emkoloŵeka umbiri pa Egupto na pa chiŵanza chake chonse.

¹¹ Lomba chichiza chilala mu Egupto na mKanane monse, na matamano akuru: ausu wasu aliyoŵone kantu kochila nako.

¹² Sembe apo akamvwe Yakobo kuti kuli mapira ku Egupto etuma ausu wasu ulwendo woyamba.

¹³ Nipo polwendo wakaŵiri Yosefe elikumba kwa akwaŵo, na mtundu wa Yosefe wiziŵikwa kwa Faraŵo.

¹⁴ Yosefe etumizya eliitira awisi Yakobo na akwaŵo ŵonse, ŵantu makumi asano na aŵiri na mpuzyo asano.

¹⁵ Naye Yakobo echiya ku Egupto, efwilako mwine na ausu wasu;

¹⁶ eŵatemba ku Sukemu noŵaika mu msitu wechisita Abrahamu na chitema cha ndalama kwa ŵana a Emori mSukemu.

¹⁷ Sembe peyenzofwikila nsita ya chipango chechipangana Mlungu na Abrahamu ŵantu ekula nopaka mu Egupto,

¹⁸ mpaka piiuka mfumu iyakwene ya Egupto ila iliyomziŵe Yosefe.

¹⁹ Yamene ila iuchitira mochenjera mtundu wasu noŵachitira ausu wasu viipa, vyakuti aŵataisye malucheche ŵaŵo angaŵe moyo.

²⁰ Pa nsita ila evyalikwa Musa, enze muweme ngaye; enzomlela myezi itatu mwa awisi;

²¹ naye akataiwe kunja mwana mwanakazi wa Faraŵo emtola nomlela aŵe mwana wake mwine.

²² Naye Musa enzoyeruzyiwa nzeru zyonse zya Aegupto; ekosa mmalizu ŵake na mmilimo.

²³ Sembe vyaka vyake pevyenze pafupi na makumi ŵane kwiloŵa mu mtima mwake kwapempula akwaŵo ŵana a Israeli.

²⁴ Naye poŵona muyake ochitiwa lukanza empokesya nomuwezezyamo ula ozuzika, pomkoŵera Mwegupto:

²⁵ elinga kuti akwaŵo aziŵe kuti Mlungu enzoŵapa wanoŵene na kwanja kwake; sembe ŵeve aliyoziŵa.

²⁶ Nipo mmawa mwake eŵaŵonekera apo penzousyana echiti aŵayanisye enena, Mwe, nimwe pokwanu; ni chinji pamuponterana?

²⁷ Lomba wamene emchitira mnekwaŵo chiipa emkaŵizya echiti, Ni ŵani ekuŵika mkuru nopingula pali seo?

²⁸ Kansi usakonipaya neo umo muwimpaira Mwegupto mailo?

²⁹ Nipo Musa eutuka pa ili lizu echiyozuŵaila mcharo cha Midiyani, mwechivyala ŵana analume aŵiri.

³⁰ Vikasile virimika makumi ŵane malaika emuŵonekera mmalambo a lupiri lwa Sinai, mlulimi lwa mulilo mchimpuza.

³¹ Musa pechiuŵona ezizwa pa choŵoneka: naye penzovwendera pafupi kuzoŵona lichiza lizu la Asikuru lakuti,

³² Neo nne Mlungu wa ausu wanu, Mlungu wa Abrahamu na wa Isake na wa Yakobo. Na Musa etutumila noyopa kulolesyapo.

³³ Asikuru enena naye, Mangulula nkwaŵilo zya pa mendo ŵako: pakuti pa malo pawapanama mpozila.

³⁴ Kuŵona nuŵona mazuzyo a ŵantu ŵangu ŵali mu Egupto na kumvwa kukungula kwaŵo, nane ni panasika kwapokesya: lomba iza nze nkutume ku Egupto.

³⁵ Uyu Musa wechikana kuti, Ni ŵani ekuŵika mkuru nopingula? wamene uyu ni wechituma Mlungu kuŵa mkuru na mnunuli pa kwanja kwa malaika emuŵonekera pa chimpuza.

³⁶ Uyu eŵatangulila apo akachite vyamazuzu na viziŵikwilo mu Egupto, na pa chimana Chisweta, na mmalambo vyaka makumi ŵane.

³⁷ Uyu ni Musa ula echiti ku ŵana a Israeli, Mlungu akampanamikileni muŵirizi mwa akwanu nga ni neo.

³⁸ Uyu ni ula enze mu eklezya ya mmalambo pamo na malaika wamene elaŵira naye mlupiri lwa Sinai, na pamo na ausu wasu: ni epokera malaŵililo amoyo kutipa seo:

³⁹ wamene wechichitonyanyaizya ausu wasu, nomkaŵizya kwaŵo nowererako mmitima mwaŵo ku Egupto,

⁴⁰ echiti kwa Arone, Tichitileni milungu yotitangulila: pakuti uyu Musa etifumya mcharo cha Egupto situziŵa chimponera ni chinji.

⁴¹ Naŵo eyenga litole pa nsiku zilazya, echiza nayo nsembe ku kalango ako nosangalala na milimo ya manja ŵaŵo.

⁴² Sembe Mlungu eŵakwenukila noŵapeleka atumikile winji wa mululu; umo mkwilembewera mbuku la aŵirizi, Kansi mwenzonitilila zyonyema na nsembe Virimika makumi ŵane mmalambo, mweo mwa chiŵanza cha Israeli?

⁴³ Namwe mwiula chimsasa cha Moloki, Na ntandara ya mlungu Refani, Nito tulango twimwiyenga kutulambila: Neo nze nimsezyeni kuya namwe kunsei kwa Babuloni.

⁴⁴ Ausu wasu enze nacho chimsasa chontoni mmalambo, nga ni umo mwechisuzulila ula wamene epinga na Musa kuti achichite kwa mlingo wa chinngwa chechiŵona.

⁴⁵ Chamene ausu wasu soti popokezyana chechiza nacho pamo na Yoshuwa pechiloŵa mchipuna cha mitundu, yechiŵingila kunja Mlungu pa menso pa ausu wasu, mpaka nsiku zya Davide;

⁴⁶ wamene epewa chisomo pa menso pa Mlungu, nosenga kuti afwange ponkala kwa Mlungu wa Yakobo.

⁴⁷ Lomba emmangila ng'anda ni Solomoni.

⁴⁸ Sembe Uyo wa Kumulu ntonkala mmang'anda ŵomangiwa na manja; umo mwechinenera ula muŵirizi,

⁴⁹ Kumulu kula ni chilimba changu chofumu, Na charo ni pokandila pa malwayo ŵangu: Ng'anda yotyani imti mze munimangile? akuti Asikuru: Kano pa malo pa chifuto changu ni pani?

⁵⁰ Mwati nte kwanja kwangu kwipoza ivi vyonse?

⁵¹ Mweo mwayumu mikosi nosasirimuka mitima na matu, nsiku zyonse mumsusya Mzimu Mtuŵa: nga ni mwenzochitira ausu wanu tetyo na mweo soti.

⁵² Ni ŵani wa aŵirizi waliyoutusya ausu wanu? naŵo eŵapaya ŵala ŵelangizyira katera zya kuza kwake Uyo Wolungama; wamene umkuŵa lomba ŵomvumbula nompaya;

⁵³ mweo mwilipokera dango nga ni mliikiwira na malaika, ntimwilisunga.

⁵⁴ Lomba pechimvwa ivi echontewa mitima nomkwiila menu.

⁵⁵ Sembe yeve, wozula Mzimu Mtuŵa, elolesisya kumulu, eŵona mchinzi wa Mlungu na Yesu opanama kwanja kwendi kwa Mlungu,

⁵⁶ echiti, Ŵonani, nuŵona kumulu kwazuliwa, na Mwana wa muntu opanama kwanja kwendi kwa Mlungu.

⁵⁷ Naŵo ekuwa na malizu akuru, esinka mmatu mwaŵo nomkutukila pamo;

⁵⁸ emtaya kunja kwa linga nompozera myala: ntoni nazyo ziikamo nyula zyaŵo mnkonde mwa mlumbwana woitiwa Saulo.

⁵⁹ Naŵo empozera myala Stefano enzoita Asikuru na kuti, Asikuru Yesu, pokerani mzimu wangu.

⁶⁰ Naye efukama ekuwa na malizu akuru, Asikuru, msaŵapa aŵa mlandu wa chiipa ichi. Naye akanene teti elala tulo.