Macitilo 28 - Mapangano Alomba 1923

¹ TIKAPUZUMUKE tiziŵa kuti chitunda ni choitiwa Melita.

² Naŵo akunja aŵo etichitira viweme vyosaŵoneka pa malo ponse, pechikozya mulilo notipokelela seo sonse chikomo cha mvula yenzoloka na chikomo cha mpepo.

³ Lomba apo Paulo akaunge kamtolo ka nkuni noziika pa mulilo chipili efuma mchifundila nomlumilila kwanja.

⁴ Aŵo akunja pechiŵona chilwani chulelemba pa kwanja kwake elaŵizyana, Uyu muntu ni chipaya mwandi, wamene chukanga wapuzumuka pa chimana uchiliyozomezya Chilungamo kuti aŵe moyo.

⁵ Naye echivurumula chilwani pa mulilo wosamvwa kantu kaipa.

⁶ Naŵo elolera kuti avimbe kano kuwa pansi kufwa kankumu: sembe akalolere nsita ikuru nosaŵona keka kantu kozizwika kamponera eyaruka mitima nonena kuti ni mlungu.

⁷ Lomba pafupi palapa penze minda, mwine wa ine ni woziŵikwa ngako wa mchitunda, zina lake Publiyo; etipokelela notiteŵetera paweme nsiku zitatu.

⁸ Nipo yenzepo kuti awisi a Publiyo enzelwele wolwala chinyong'onyong'o na lunsindi: lomba Paulo eloŵa kwake nosenga, nomsintilila manja nompozya.

⁹ Ichi chikachitike ŵambi soti a mchitunda ana matenda echiza nopozyewa:

¹⁰ naŵo etilemekezya na vyamchinzi vinyinji, nopakizya mu wato petiimapo vintu vitisoŵa.

¹¹ Ikapite myezi itatu tiima mu wato wa ku Alesandriya wilala pa mwera umo mchitunda, chiziŵikwilo cha wine ni Amapasa.

¹² Tifwika pa Surakuse noswapo nsiku zitatu.

¹³ Kufumila pamene tikwenta nofwika ku Regiyo: nipo likapite zuŵa limo mpepo ya ku mwera iuka, na mmawa mwake tifwika ku Poteoli:

¹⁴ kwitifwanga akwasu, ŵetiyumilila kuswako kwaŵo nsiku zisano na ziŵiri. Teti tifwika ku Roma.

¹⁵ Naŵo akwasu a kwamene kula akamvwe zyasu echizotichinguzya mpaka na ku Walo wa Appiyo na Mang'anda Atatu a Alwendo: naye Paulo pechiŵaŵona emyamika Mlungu nokosa mtima.

¹⁶ Pamene petiloŵa mu Roma [kenturiyo epeleka a mnsinga ku chilolo cha mpingo wolindilila mnsaka: sembe] Paulo emzomezya ankale pa yeka na linjolinjoli lomsunga.

¹⁷ Lomba yenzepo pavuli pa nsiku zitatu elonganika aŵo ali akuru mwa Ayuda: naŵo akaungane eŵanenera, Akwasu, chukanga niliyoifisya ŵantu kano misango ya ausu wasu enitwala wa mnsinga kufumila pa Yerusalemi mmanja mwa Aroma:

¹⁸ amene akanikonsinshe esakonimangulula, penenzeve chikomo chopaiwa.

¹⁹ Sembe pamene Ayuda pechisusya nilipatikizya kuza kwa Kaisari; chukanga senenze na kantu kousimikizya mtundu wangu.

²⁰ Chikomo ichi ni panamuitani muniŵone nolaŵira nane: pakuti chikomo chololera kwa Israeli ni panumangiwa na linjerenjende ili.

²¹ Enena naye, Sitipokera tulata tofumila mu Yerusalemi twa mweo, soti kuliye nakuza na akwasu ŵonse kuzotiuzya nonena kaipa ka mweo.

²² Lomba tupangwa kumvwa kwanu vyamulinga: pakuti chipatuko ichi tuziŵa kuti chusushiwa ponseponse.

²³ Lomba akampange nsiku ŵechiza kwake anyinji mng'anda mwake; naye eŵalululila nouchitira untoni ufumu wa Mlungu, noŵaŵeteka zya Yesu zyofumila mdango la Musa na mwa aŵirizi, kutatikila mmawa mpaka mchingulo.

²⁴ Ayake ezomera vinenewa, ayake enyanyaizya.

²⁵ Naŵo paliyozomerezyana ŵefumapo, apo Paulo akanene lizu limo, Mzimu Mtuŵa elaŵira wino mwa Isaya muŵirizi kwa ausu wanu,

²⁶ echiti, Nkoya ku ŵantu aŵa ukati, Pakumvwa mumumvwe, simti mziŵisye peka patonto; Na poŵona muŵone, simti msingalwe peka patonto:

²⁷ Pakuti mtima wa mtundu uyu ni uluyume, Na mmatu mwaŵo ntempuvyakumvwa, Na mmenso mwaŵo ni mosinzinila; Kati kaya angasingalwe na menso ŵaŵo, Angamvwe na matu ŵaŵo, Angaziŵisye na mitima yaŵo, Angayaruke soti, Nane ningaŵapozye.

²⁸ Teti nachiziŵikwe kwanu kuti uyu upuzumushi wa Mlungu utumiwa kwa a Mitundu: naŵo soti aamvwe. [

²⁹ Akanene malizu aŵa Ayuda efumapo enze na ntota ikuru mwa ŵeve.]

³⁰ Naye elaluka virimika viŵiri vyamsuma mnanda yake yozyamika noŵapokera ŵonse eloŵa mwake;

³¹ enzoŵirizya ufumu wa Mlungu nosambizya vya Asikuru Yesu Kristo kwa mkanka ukuru, paliye muntu emlesya.