Macitilo 27 - Mapangano Alomba 1923

¹ PAMENE pechiti tiime mu wato kuya ku Italiya ŵesungisya Paulo na ŵambi ŵomangiwa kuli kenturiyo zina lake Yuliyo, wa mpingo wa Augusto.

² Lomba poloŵa mu wato wa ku Adramutiyo wisakakuya ku minzi ya mchinsinsi cha Asiya tiponesesya wato, Aristarko Mmakedoniya wa ku Tessalonika enze nase pamo.

³ Mmawa mwake tifwika nopimvukila pa Sidoni: na Yuliyo emchitira Paulo paweme nomzomezya kutandala ku viuza vyake novumukako.

⁴ Lomba tikaimileko kuya ku lyondo tilambalala kunsei kwa Kupro, pakuti mpepo yenze kuntanzi.

⁵ Nase tikapule pa chimana choteezyana na Kilikiya na Pamfuliya tifwika ku Mura wa mLukiya.

⁶ Kwamene kenturiyo kwechifwanga wato wa ku Alesandriya ukuya ku Italiya notiikamo.

⁷ Nase petenzekuya patonto patonto nsiku zinyinji na kuza kovupa poteezyana na Knido mpepo itilesya kufwikapo, nase tilambalala kunsei kwa Krete kufupi na Salmone;

⁸ nipo polamba mchinsinsi kovupa tifwika pachite zina lake pa Chau Chiweme; pafupi pala penze munzi wa Laseya.

⁹ Ikapite nsita ikuru na ulwendo lomba wipingulwa pelipita kale Siku lolitana vilyo Paulo eŵachenjezya

¹⁰ noŵanenera, Mwantumwe, nuŵona kuti ulwendo uyu uuŵe na milase nochenekeka kukuru, nte ku wato weka na viya vya wine sembe soti ku moyo wasu.

¹¹ Sembe kenturiyo emmvwila chiyoŵa na mwine wa wato kupula malizu aŵo enenewa na Paulo.

¹² Nipo pakuti pa chau sipenze paweme kulalapo pa mwera, winji wipingulana kuimapo noponesesya wato, kati kaya akafwike ku Foinika nonkalako pa mwera; pamene ni pa chau cha pa Krete, polola ku mpoto na kuli mzambwe.

¹³ Lomba peikunta konasya mpepo ya ku mwera elinga kuti yaŵazila yechipangwa, evuula chingoŵa na kuya mmbali mwa Krete mfupi na chinsinsi.

¹⁴ Sembe kansita katonto kufuma kwamene chikunta chinkuka chokukuma choitiwa Urakulo:

¹⁵ nawo wato ukamangiwe ntiwikuma kulola mpepo tileka nokankiwa.

¹⁶ Nipo poutukirako kunsei kwa katunda zina lake Kauda tivupa pokamangisya kawato:

¹⁷ naŵo akakaimye echitirako myando yotang'isya nokulunga wato; eyopa kuti angasintukile pa Surti, ni pechisisya mizati notwaliwa tetyo.

¹⁸ Lomba petenzovupa ngako na chinkuka mmawa mwake ŵeyambopoza viya mmanzi;

¹⁹ na mazo ŵepoza na manja ŵaŵo vyoyoŵera vya wato.

²⁰ Apo zuŵa na ntandara ziliyoŵoneka nsiku zinyinji, na chinkuka chikuru chenze pali seo, chigomezyo chonse chakuti tipulukwe lomba chisila.

²¹ Nipo pepenze nsita ikuru yosalya kantu pamene apo Paulo epanama pakati paŵo echiti, Mwantumwe, angati mwinimvwila neo nosaima pa Krete, sembe muliyoŵona milase nochenekeka uku.

²² Lomba numchimulani nkazikani mitima: pakuti paŵeve kutaiwa moyo mwa mweo, sembe wato weka.

²³ Pakuti wapanama pali neo usiku wa lero malaika wa Mlungu unili wake, wamene soti unutumikila,

²⁴ wati, Paulo, usayopa; ukapaname pa menso pa Kaisari: ŵona, Mlungu wakupa ŵonse aŵa auli naŵo pamo mu wato.

²⁵ Teti, mwantumwe, nkazikani mitima: panumchetekera Mlungu kuti paze paŵe nga ni mwaninenera.

²⁶ Lomba tisintukile pa chitunda chakuti.

²⁷ Pamene pewichiza usiku wakumi na kane, petenzotenukatenuka mchimana cha Adriya, nga ni pakati posiku achiyoŵa elukana kuti opanamila kusilya.

²⁸ Elinga manzi nofwanga mikwamba makumi aŵiri: nipo akapiteko patonto elinga soti nofwanga mikwamba kumi na isano.

²⁹ Naŵo poyopa tingasintukile kaya pa luuku lwa myala evisolomosya vingoŵa vine ku chipuna nopupila kucha.

³⁰ Lomba pamene achiyoŵa pesakopuzumukamo mu wato nokasisya kawato mchimana, ngosakowamya vingoŵa ku mutu wa wato,

³¹ Paulo enena na kenturiyo na manjolinjoli, Aŵa akakanonkala mu wato simpulukwa.

³² Pamene apo manjolinjoli etenda myando yomangira kawato kaye.

³³ Pekwenzekucha Paulo eŵapapatira ŵonse kuti ŵalye echiti, Zuŵa la lero ni lakumi na kane limwankala na njala yanu, ŵosaŵona kantu.

³⁴ Ni panumpapatirani kuti mulye: pakuti ichi ni chomchizyani: pakuti siliti litaike leka limo sisi la mmitu mwanu.

³⁵ Lomba akanene teti eula mitanda nomuŵonga Mlungu pa menso pa ŵonse noisuna, eyamba kulya.

³⁶ Pamene apo ŵonse echinchila, naŵo soti echilya.

³⁷ Nase tonse ta mu wato tenze myanda iŵiri na makumi asano na aŵiri na mpuzyo asano na umo.

³⁸ Naŵo akakute epepusya wato popoza mapira mchimana.

³⁹ Nipo kukache aliyochiziŵa charo: lomba eŵona chinkoloŵondo cha mseche noyeruzyana kano angasamisyepo wato.

⁴⁰ Akatendepo myando ya vingoŵa evisiya mchimana; nsita yamene ila emangulula myando yopindululila, nokwezeka chinyula cha kuntanzi ku mpepo, notintimika ku chinsinsi.

⁴¹ Sembe pachimzilamo pa nkumano ya vimana viŵiri esamisya wato; mutu wake wifyakama noloŵera wosasung'unzika, sembe chipuna chiyambong'anuka na mpamvu ya magapigapi.

⁴² Lomba manjolinjoli echiti aŵapaye a mnsinga, kano umo wa aŵo anganyaye nopuzumuka.

⁴³ Sembe kenturiyo popangwompuzumusya Paulo eŵalesya pa nzeru zyaŵo; esuzula kuti aŵo oziŵonyaya aponepo notangulofwika kusilya:

⁴⁴ na aŵo ŵosalamo ŵambi pa vikupa, ŵambi pa viyake vyofuma mu wato. Teti yenzepo kuti ŵonse epuzumukila kusilya.