Macitilo 26 - Mapangano Alomba 1923

¹ AGRIPPA emnenera Paulo, Nayamikizya unene weka. Lomba Paulo etambikizya kwanja kwake nolikanila:

² Nulinga kuti nina shuko, mfumu Agrippa, panulikanila pa menso panu lero zya ivyo vyonse vyakunisimikizya Ayuda:

³ ngakongako pakuti muziŵisya misango yonse na milandu ya mwa Ayuda: ni panumsengani kunimvwila kosisikanya.

⁴ Mankalilo ŵangu chitatikile posaza wangu, wamene wenze chivyalikwilo mu mtundu wangu na pa Yerusalemi, oŵaziŵa Ayuda ŵonse;

⁵ onisingalwa kuyambila potatika, akazomera kuchita untoni, wakuti nenze Mfarisayo mwa chipatuko chokosesya dango cholambilo wasu.

⁶ Lomba napanama pano kupinguliwa zya chigomezyo cha chipango chichitika na Mlungu kwa amausu wasu:

⁷ chamene chiyugomezya kufwikako mitundu yasu kumi na iŵiri, yumtumikila Mlungu na ntina usiku na mzuŵa. Zya chigomezyo ichi ni zyanusimikizyiwa na Ayuda, mfumu!

⁸ Ni chinji pamulinga ni chosazomereka Mlungu kuusya akufwa?

⁹ Neo nane nilingilila neka kuti nochita vinyinji vususya zina la Yesu Mnazarayo.

¹⁰ Ichi chinichita soti mu Yerusalemi: niŵazalizya asanto anyinji mtumbolimboli, nikapoke nsaka kwa akuru a ansembe, naŵo pechipaiwa nizomerezyako.

¹¹ Nenzoŵalanga kaŵirikaŵiri mmasunagoge ŵonse noŵapimfya kuchita msikila; niŵaŵenkera ngako noŵasulusya mpaka ku minzi ya chilwendo.

¹² Pamene apo penenzekuya ku Damasko na nsaka na tetulo vya akuru a ansembe,

¹³ zuŵa pa mutu, mfumu, niŵona pa njira kuŵala kufumila kumulu, kupula kuyezima kwa zuŵa, kwinisakatira nonizinga na aŵo enenzekuya naŵo.

¹⁴ Nipo tikawe tonse pansi nichimvwa lizu luninenera mChihebrayo, Saulo, Saulo, unizuzyiranji? ni chokosa kwako kujinyisya mnyonkozyo.

¹⁵ Nichiti, Nimwe ŵani, Asikuru? Asikuru enena, Nine Yesu uuzuzya.

¹⁶ Lomba uka upaname na mendo ŵako: pakuti nakuŵonekera lona kuti nikuŵike mtumiki na ntoni ya ivyo viwaniŵonamo, na vila viniti nikuŵonekeremo;

¹⁷ kukupokesya ku ŵantu na kwa a Mitundu anukutumirako,

¹⁸ ukaŵatunamisye menso kuti afutatile mfinzi noloŵa mchiŵalilo, nofuma mu mpamvu ya Satana kumyarukira Mlungu, apokere kulekelewa kwa mpulupulu nopyani mwa ŵala otuŵishiwa ponichetekera neo.

¹⁹ Teti, mfumu Agrippa, nteninyanyaizya ku mensompenya ŵala ŵa kumulu:

²⁰ lomba niŵaŵirizyira aŵo a ku Damasko poyamba, na mu Yerusalemi na mcharo chonse cha Yudaya, na ku Mitundu nayo, kwakuti alape nomyarukira Mlungu nochita milimo iweme yowamila kuyaruka mitima.

²¹ Chikomo chake Ayuda ni pechinikata mchipupilo nosakonipaya.

²² Nane poyavyiwa na Mlungu nukoselela kuza na lero kwachitira untoni atonto na akuru, wosanena kantu kambi sembe vila vyechinena aŵirizi ŵala na Musa kuti vize viŵepo;

²³ vyakuti Kristo uyo azatamanishiwe, na kuŵa wotatika pozyuka kwa akufwa kuŵirizya kuŵala ku ŵantu na kwa a Mitundu.

²⁴ Lomba penzolikanila teti Festo enena kwa mparazanga, Ulufunte, Paulo; mano ŵako akuru okufuntisya.

²⁵ Sembe Paulo echiti, Niliyofunta, Festo mwaŵomvwika; lomba nunenesya malizu a vyendi ŵosisikanya.

²⁶ Pakuti mfumu yuziŵa ivi, anulaŵira naŵo kokaŵalala: nane nuziŵa kuti keka kantu ka ivi ni kofisama kwaŵo; pachiliyochitike ichi kunsei.

²⁷ We mfumu Agrippa, kansi muzomera aŵirizi ŵala? nuziŵa muzomera.

²⁸ Agrippa naye emnenera Paulo, Poniŵeteka patonto usakonichisya Mkristo.

²⁹ Paulo echiti, Nupangwa kwa Mlungu kuti patonto kano panyinji nte mweo mweka sembe ŵonse naŵo onimvwa lero apale neo, sembe nte nsinga izi.

³⁰ Lomba mfumu iima na mmbili na Berinike na aŵo ŵenzenkezi naŵo pamo:

³¹ akafumemo elaŵizyana kuti, Uyu muntu aliyochita kantu kowamila imfwa kano nsinga.

³² Naye Agrippa echiti kwa Festo, Uyu sembe wamangululiwa, angati aliyekuti naniye kwa Kaisari.