Macitilo 25 - Mapangano Alomba 1923

¹ NAYE Festo akaloŵe mcharo icho pavuli pa nsiku zitatu echiya ku Yerusalemi kufumila ku Kaisariya.

² Nipo akuru a ansembe na Ayuda ŵoziŵikwa emuuzya zya Paulo;

³ empapatira kwachitira lusungu lomuita aze ku Yerusalemi, komuŵendamizya pa njira kuti ampaye.

⁴ Lomba Festo eyasuka kuti Paulo esungiwa pa Kaisariya, na yeve yeka esakoyako lomba pano.

⁵ Teti aŵo ŵena nsaka mwa mweo, echiti, naaye pamo na neo; kati muntu uyo eifya kantu akamsimikizye.

⁶ Lomba akalaleko kwaŵo nte kupula nsiku zisano na zitatu kano kumi esikila ku Kaisariya; mmawa mwake enkala pa chilimba chopinguzi nosuzula kuti eletewe Paulo.

⁷ Akaze yeve Ayuda ŵala efumila ku Yerusalemi epanama kumzinga, nomnenera vikomo vinyinji vikuru vyosaziŵikwa paweme.

⁸ Paulo polikanila echiti, Niliyoifisya kantu kano dango la Ayuda, kano chipupilo, kano Kaisari.

⁹ Sembe Festo, posakoŵatemwesya Ayuda, emyasuka Paulo echiti, Upangwa kuya ku Yerusalemi, ukapinguliweko kwamene zya ivi kwangu?

¹⁰ Sembe Paulo echiti, Nupanama pa chilimba chopinguzi cha Kaisari, pamene panuwamila kupinguliwa: Ayuda niliyoŵaifisya kantu, umo mmuziŵisyira.

¹¹ Teti kati nne muŵipa nochita kantu kowamila imfwa, sinukana kufwa: sembe kati ivi vyonse vyakuninenera ni vyatyala, paliye muntu ati anitwale kwaŵo. Naniye kwa Kaisari.

¹² Pamene apo Festo akauzyane na ansaka eyasuka, Wati naniye kwa Kaisari: kwa Kaisari ni kuuti uye.

¹³ Lomba akasile masiku ŵambi Agrippa mfumu na Berinike efwika ku Kaisariya nomlonjera Festo.

¹⁴ Pechilalako nsiku zinyinji Festo eitulila mfumu mlandu wa Paulo echiti, Pali muntu muyake wechisiya Felike womangiwa:

¹⁵ penenze neo pa Yerusalemi akuru a ansembe na akuru a Ayuda eniuzya zyake nosenga umkonde mlandu.

¹⁶ Ŵiniyasuka kuti nte msango wa Aroma kusuzula muntu pamene wosimikizyiwa pakaliyoŵonana na ŵomsimikizya menso na menso, na kuŵa na nsita iweme yolikanila mu mlandu wechipewa.

¹⁷ Teti pechilongana pano sinilembuka, lomba mmawa mwake ninkala pa chilimba chopinguzi nopanga ŵaze naye muntu.

¹⁸ Akapaname ŵomkanikizya ntenena chikomo cha viipa nga ni vinilinga;

¹⁹ enze nayo milandu yomsusya yolambilo waŵo ŵene, soti ya chite Yesu, wamene echifwa, wechinenesya Paulo ni wamoyo.

²⁰ Nane pozuvikazuvika munti nifwangile zya ivi, nimkonsha kati opangwa kuya ku Yerusalemi nopinguliwako zya mlandu uyu.

²¹ Sembe Paulo pesakosungiwa akapinguliwe na Augusto uyo, nisuzula kuti asungiwe mpaka penti nimtumizye kwa Kaisari.

²² Lomba Agrippa emnenera Festo, Nane kumo nupangwa kulimvwila zya uyu. Echiti, Mailo mumumvwe.

²³ Teti mmawa mwake akaze Agrippa na Berinike ŵozila kofumu noloŵa momvwila milandu, pamo na vilolo vikuru na ŵantu ŵoziŵikwa a mmunzi, pechisuzula Festo ŵeloŵa naye Paulo.

²⁴ Nipo Festo echiti, We mfumu Agrippa, na mweo monse muli nase muno, muŵona uyu muntu wilinitetelela zyake liumba lonse la Ayuda pa Yerusalemi na pano, nosema kuti ntowamila kuŵa moyo soti.

²⁵ Sembe neo ntenifwanga kuti echita kantu kowamila imfwa: naye akalinenere kuti naniye kwa Augusto ni penichiti nimtumizye.

²⁶ Niliye kantu konenesya ka yeve komlemberani, mfumu. Teti ni panamfumizya pa menso panu, ngakongako kwa mweo, kalonga Agrippa, kuti mkamkonsinsha niŵe na mfundo yolemba.

²⁷ Pakuti chuniŵera chopusa, potumizya wa mnsinga, kosaziŵisya soti vikomo vyomsusyira.